世侄女今年大學畢業，志願是入國泰做空姐，我勸她要三思，因為今時今日做一個國泰空姐，需要的不只是美貌與智慧，還有超級無敵的EQ及危機處理。
我平均一個月飛兩次，去年飛了廿幾次，搭飛機嘅次數肯定多過我坐天星小輪10倍。今天坐國泰CX986，香港飛成都天府機場，就遇上了一個千古未見的奇葩乘客，以及機智應變的香港空姐，加日籍空少，在3萬呎高空大鬥法兩小時，令我大開眼界，歎為觀止。
一位皮膚黝黑的單身師奶，同我同坐出口位的一行，由於旁邊就是逃生門，所以一定會執得特別緊。起飛前例行檢查，她不肯將手袋放上行李櫃，一位戴口罩的外籍空少搞唔掂，於是叫了另外一位香港空少用普通話同佢解釋，師奶仍然死死攬住手袋。於是又驚動另外兩位空姐以及Purser（機艙時務長），5個人團團圍住佢勸喻，她終於肯交出，原來並不是甚麼名牌袋，只是一個普通不過的買餸袋。空姐最後一次檢查，原來師奶仲有一個保溫壺擺在地下，空姐叫她放在前面的雜誌籃，她又不肯，叫空姐幫手放上去，空姐說這是她的私人物件，叫她自己放，擾攘一番，最後才肯自己鬆開安全帶，將保溫壺放上雜誌架。
外籍空少非常有禮貌，全程面帶笑容，飛機起飛之後，馬上跑過去主動問師奶，要不要拿回個手袋，幫她在行李架上攞出手袋交俾佢。
這都不算甚麼，最奇葩的是，空姐送上午餐，今天是豬肉薯蓉或雞肉飯。她叫了雞肉飯，不過就唔食。
空姐收碟嘅時候，她叫空姐俾個膠袋，要將飯盒、雪糕、生果，全部打包帶走！由於當時飛機開始下降，空姐無暇睬佢，她就不停在座位上大叫，我要打包啊，我的塑料袋在哪裏？
飛機降落之後，空姐將打包好的飛機餐交俾佢。外籍空少將她的行李箱及手袋由行李架取出交俾佢，但她就坐在座位上，動也不動。
飛機停定艙門打開，大家開始落機了，這時候，令我震驚的畫面就出現了！
打死都唔起身的師奶打開膠袋，攞出飯盒，搣開錫紙，欣賞了一下，一陣香味傳遍整個機艙。大家都在拿行李落機了，她開始拆了餐具，滋滋油油，開始一個人的小確幸午餐了。
空少睇到○晒嘴，這時候我問這個敬業的空少，是甚麼名字？我諗住表揚佢，原來是日本人，叫Asado，我用日文同佢傾偈，稱讚他做得好，而且全程辛苦了他！
香港飛成都天府機場，就遇上了一個千古未見的奇葩乘客，以及機智應變的香港空姐，加日籍空少，令我大開眼界，歎為觀止。
