發佈時間：18:01 2024-08-23
早前主持巴黎奧運獲網民盛讚的「東張女神」何沛珈，趁着夏末秋初大解放，在水上樂園拍攝一輯索爆泳照。比堅尼說不了謊，一穿盡顯身材優劣，以粉紅色比堅尼上陣的何沛珈，身材玲瓏有致，散發健康性感的氣場。何沛珈在ig派水着福利後迅即吸Like，不少網民大讚是最索東張女神，又玩食字笑言看到她的水着照，很難東張西望四處看，就連「無綫咪神」陳庭欣也留言：「流鼻血中！」
何沛珈的水着福利是年度派發，對上一次的水着福利，是去年9月，當時以黑色兩件頭上陣，另一輯令人難忘的水着照是2019年所拍下，身穿橙色比堅尼的她坐遊艇出海，享受藍天與白雲。
保持52kg
由2019年那輯橙色水着照至今，明顯可見身材基本上未有太大變化，何沛珈接受東周網訪問，說現時體重約52kg，早前拍旅遊節目時都有以水着示人：「但係就冇咁性感，加上嗰次我哋去拍飲飲食食，真係唔係好夠fit。」
對於今輯水着引起極大迴響，被指身材保持有道，何沛珈說：「以前邊夠膽影全身？好多時我都只係夠膽影半身相，唔係話好肥，但係會感覺有啲浮腫。其實做運動瘦同節食係有好大分別。依家嘅我，會夠膽好自信咁着，因為我覺得影出嚟感覺，其實係好健康。」
跑出健康
何沛珈強調運動是永遠保持健美的方法，只要找到適合自己的運動，不單令身心狀態更佳，更會享受運動的樂趣，而年齡從來不是借口。
「好多人都話年紀越大越難減，但只要搵啱方法就冇問題。我雖然係上年先開始跑步，但係跑步畀我嘅好處真係好大，依家就算食多少少都唔會肥，因為跑步提高咗我嘅新陳代謝。」何沛珈說。
保持瘦身，不可一成不變。何沛珈說要視乎身體的變化，來進行不同程度的運動。「要keep fit，就要學識一個字：變。之前我減肥成日遇到樽頸位，但只要將方法改變少少，就可以輕而易舉地再slim 啲。我嘅運動方式就係跑步，但我跑步都有分兩種，第一種係跑耐啲，40分鐘或以上。第二種係HIIT Running，即係高強度間歇性咁跑。」
日飲1.5公升水
「之前天氣冇咁熱，我一個星期都會跑4至5日，但最近天氣好熱，我就會夜晚跑，一星期跑2日，每次大約30分鐘。因為我依家唔使再減，要做嘅嘢只係保持。但係我唔建議太重嘅朋友去跑步，可以多啲行，飲多啲水，將個體重減低少少後，先至再跑。」
除了運動，每天飲大量清水，也是何沛珈保持健美的小秘密。「瘦身除咗要識變，另一樣好重要嘅，就係要飲足夠嘅水，加上成日出街食嘢，需要飲多啲水，沖走體內嘅廢物，我成日都拎住1.5公升水周圍走，哈！」
