發佈時間：18:25 2024-02-27
藝人鍾采羲（Iris）憑住豐滿身材出過寫真和拍過電影，已36歲的她，近年減少幕前演出去搞生意，開完美容院，去年底再開Gym Room。以前不愛做運動的她，因身體變差，經過疫情後愛上做運動，先後考獲健身與瑜伽導師牌，她坦言唔做運動周身唔自在，要將運動融入生活一部分，好似食飯、去廁所、工作同休息咁，當習慣後連飲食都變得有節制，點會唔瘦！
做運動比醫美好
Iris坦言以前完全不愛做運動，但成日都覺得攰、又易病，疫情期間因無所事事便跟朋友去做運動，每次做完都覺得身心舒暢，慢慢便愛上，仲做到上癮。當她工作不多或少應酬時，一星期做4、5日運動，每次都1至2個鐘，「做開唔做周身唔自在，因為一唔做覺得身體濕氣好重，個人好攰，好似不在狀態咁。」她指出做運動不只用來減肥或Keep Fit，做運動時因產生快樂因子「多巴胺」，能令你身心放鬆、紓緩壓力，比醫美更可令人變得年輕。
瑜伽做Gym一齊嚟
問她是否滿意自己身形時，她即說：「唔滿意，想再完美啲，因為我全身都浮腫，所以要做多啲瑜伽，我覺得瑜伽好似中藥咁，會有少少調理你身體嘅荷爾蒙同埋成個人嘅體態平衡，如果一啲浮腫形或身體比較虛寒啲嘅女仔，會好適合做瑜伽。」至於做Gym就是她的興趣，她續說：「做Gym好發洩到喺生活上嘅壓力同紓緩疲累，其實係好好玩，聽住音樂同朋友一齊做，對我嚟講係Gathering。」她之所以開Gym Room，是想集兩者於一身，「做瑜伽有助身心靈，而Gym可以做肌肉訓練，係合併咗嘅健康Centre，可以幫到自己又幫到人。」
放縱一日平衡下
至於飲食方面，Iris稱當熱愛做運動後，個人也變得有紀律，「你會自動唔想食太油膩嘅嘢，都想食番健康啲。」但食得健康，並不代表只食低糖、低脂的食物，她笑言：「其實我𠵱家咩都食，但我會有Cheat Days，即健康10日，就會放縱自己一日，同啲朋友去食自己鍾意嘅嘢開心下，仲會食零食；咁樣唔會影響你健康進度，因為要Balance吖嘛，所以食完第二日要做運動、操番耐啲。」
成功要持之以恆
而護膚心得都是做運動，皆因她覺得做運動可以激發年輕的生長因子，令整個人容光煥發，骨膠原都會澎湃啲，並且要飲多啲水，一公升走唔甩，還有做好清潔和保濕，「敷多啲Mask，一星期最少敷3日，搽多啲水狀嘅精華，因為精華薄身啲容易滲透入皮膚，如果冬天會加天然嘅精油，盡量用多啲Organic嘅護膚品，因為愈簡單愈好，太複雜反而會導致我皮膚敏感、出粉刺。」她表示壓力大、轉天氣和食錯嘢都會引致皮膚敏感，發到全身都係紅疹，急救方法不外乎搽多啲保濕、休息多啲，故捱夜和睡眠不足都是護膚大忌。只要持之以恆，想靚想瘦都不是問題。
