發佈時間：16:58 2023-12-21
06年港姐亞軍兼最上鏡小姐周家蔚（Janet），與洪金寶兒子洪天明結婚11年，育有10歲大仔洪大仁及8歲細仔洪竟稀，婚後專心照顧家庭，十分賢妻良母。近來熱衷於教煲湯的她，對於keep fit護膚更有自己一套心得，她坦言要搽油保肌底、餓自己來燒脂瘦身，唔極致唔做。
保完濕搽油
Janet稱用護膚品種類唔使多，最緊要啱自己皮膚。而護膚心得是做好保濕和畀營養皮膚，她解釋：「搽完保濕後，要搽一層油封住佢，如果有多餘嘅油就印番走，否則好易有油脂粒。因為皮膚要有油先可以提供到營養畀皮膚嘅表層同底層；而隨住年紀嘅增長一定要用油，我呢個年紀最適合用，等皮膚keep住有彈性。」
自己調校油
她表示自從學識咗用油去護膚，便會親自去調校適合自己皮膚的油，「首先個油嘅底我鍾意用可可巴、猴麵包樹、牛油果同甜杏油等，因為呢啲油比較厚啲，再加精油如沒藥、檀香、乳香等，可以考慮用啲靚啲、貴啲又係anti-aging嘅。如果搽眼部可以用濃啲，但要親和嘅，make sure唔會太強、太刺激，否則會乸眼。」除了面部，她連全身都會搽油，但跟面部用的會有些不同，她續說：「例如出外病毒多，我會搽多啲抗菌嘅精油如肉桂、Oregano等，其實對我濕疹都有幫助，因為會有少少消炎作用，我臨瞓前同朝早起身都會搽。」
禁食好有效
至於keep fit方面，呢位靚媽笑言有好多心得，呢排就興用fasting（禁食）的方法，她說：「168間歇性斷食我諗大家都聽過，但fasting係會盡量餓自己，愈耐愈好，亦係瘦得最明顯嘅。其實有飯局或者有好味嘅嘢我會照食，如果冇我就會餓自己，可能一日淨係食一餐，因為身體飢餓時會產生一種keytosis係可以燃燒脂肪嘅。」通常她肥一至兩磅就會即刻禁食，減番自己覺得標準的磅數就會停，再加埋personal training和不停帶仔仔去放電，咁要瘦番都唔難嘅。
