發佈時間：17:26 2023-11-18
言行大膽狂晒豐滿身材、被封為「性女」的網台主持貝依霖（Chantale)，既對自己上圍和臀部有要求，務求做運動和療程keep住葫蘆身形，對肌膚更是緊張，每次出街必是全套「防曬」裝備，還要每晚做深層清潔、深層補水和深層美白，仲要做埋HIFU提升，保住白滑靚肌。皆因仲有一年就30歲，𠵱家唔保等幾時。
內服外敷
Chantale坦言白滑肌膚是辛辛苦苦下了很多功夫補養返嚟，一講護膚心得，即連珠炮發說：「一定要深層清潔、深層補水同深層美白，仲要做HIFU（High-intensity Focused Ultrasound）去提升同緊緻，防曬都好緊要，我會內服外敷，食啲美白補充品、搽防曬、用防曬遮，我揸車仲會着埋冰絲防曬手袖。」
慘痛經歷
她笑言全副裝備似打仗，皆因2019年去摩洛哥旅行時有慘痛經歷：「噴晒最高度數嘅防曬，着晒長袖衫同長褲都係曬到非洲咁嘅膚色返嚟，仲要係痛。之後用咗差唔多成個月先整走啲唔均勻嘅印，嗰時用好貴嘅美白面膜敷喺個身度，敷好多張，又用補水嘅facecream搽喺個身度，仲食好多美白丸，嗰個月盡量唔出門，就算出門都搽好厚嘅防曬，要完全回覆原狀，都用咗3、4個月時間。」
戒飲奶茶
如果要Keep住皮膚一路白滑，Chantale仲話要戒飲奶茶，她解釋：「其實我好鍾意飲奶茶，但奶茶通常落好多糖，而糖份會令肌膚變得又黃又老得快，所以我會食啲superfood（高營養密度食物）同食番多啲蛋白質食物如三文魚、雞蛋、藍莓、紅桑子同飲豆漿，對皮膚都好好。」
80/20食法
除了保住皮膚，戒口對Keep Fit都有幫助，不過Chantale坦言：「如果全部食健康食物，都唔知捱到幾多年，所以我會揀80%健康食物，20%自己鍾意嘅食物balance番，因為好多健身人士都係推廣呢個比重嘅食法，呢個食法對於身形上同皮膚上都係好work嘅。」
重訓臀部
Chantale擁有32C、25、35的Fit爆身形，不過高要求的她仍不滿足，並表示豐胸修臀都是必要，「蜜桃臀我都想有，所以pat pat位有做重量訓練令佢更堅緻，豐胸？都想吖，所以想試下豐胸療程，因為我一直嚮往葫蘆咁嘅身形。」問她豐胸想升幾多Cup時，她續說：「只係想（胸部）膠原蛋白多啲再脹啲，因為有番一定年紀會開始下垂、開始乾，我只係想提升多啲more than升Cup。」
