發佈時間：16:00 2026-01-12
人生有無限的可能性。在《金枝慾孽》中被鄧萃雯賜死的「陳妃」羅泳嫻，由演員華麗轉身，轉做地產經紀，再到塔羅師，贏得《通靈之王》第一季冠軍，最近更推出了著作《塔羅行運天書2026》。
她用塔羅牌幫助很多人解困，但自己的情路似乎一仆一碌。03年和疑似北京尋歡的吳啟華分手後，離婚又再婚，現育有一子，家庭生活美滿。
「我經歷過花心、唔夾同埋夾，先至知𠵱家嘅婚姻係真正人生，平凡是福好重要。我唔係每一步都會占卜嘅人，但大路我會睇，我知道自己會病死，走先過老公，所以我哋已經講定下世相認嘅密碼。」
這份今生來世約定的愛，陪她到場做訪問的老公Jeremy收到晒。
通靈天賦
綽號「裸泳」的羅泳嫻，小時候住唐樓，已發現自己有天賦，見過似男又似女的靈體，經常趁她睡覺時觀察自己。
「佢出現時會令我感覺好凍，所以我成日凍醒，氣管好差。後來我上靈異節目講番，媽媽好震驚，原來佢細個都係咁。我開始睇書了解靈異、占卜嘢，中學時仲研究埋相學，試過小息時被老師沒收把眉鉗，因為我鍾意幫人修靚條眉，令佢哋條命好啲。到我大啲，喺澳洲跟女巫學塔羅牌，佢哋教我攞住張牌要冥想，捉住感覺，完全顛覆我睇書學嗰套，自此我就開始同朋友、同事占卜。」
2022年，她在《通靈之王》第一季奪冠。參賽前，她為自己揭牌，問致勝方法。「我抽到一張『愚者』牌，意思叫我傻吓傻吓，就有符碌運，最後真係一關過一關。比賽前，我同梁思浩完全唔識，比賽期間都唔熟。佢好公道，同所有參加者保持距離，冇造馬㗎！我唔會『磅水』買個冠軍返嚟，要買都買自己做劇集女主角啦，我唔會嘥呢啲錢。」
由演員轉換跑道，不怕被外界質疑實力嗎？
「我由細舖做起，𠵱家好多都係熟客，靠口碑，再介紹新客。當年我參加《通靈之王》，都係多得伯樂李思蓓，係佢覺得我準，所以提名咗我參加。」
靈界求助
羅泳嫻在2000年代加入TVB，因為識玩塔羅牌，同事都愛找她占卜，測算下一套會演甚麼劇。
「後來我好羨慕江芷妮讀咗個碩士，我都想放眼世界，於是決定去日本進修美容，贏埋大賽。返港後，撞正我人生大運同踏入玄學最興旺時期，又用到我學到嘅嘢，幫女仔睇姻緣教化妝，於是決定放棄喺美容界同演藝界發展，主力鑽研塔羅。」
多年來，她透過塔羅幫人趨吉避凶，亦試過遇上靈界朋友求救。她記得有位美國客人透過視像問其胞妹猝死的原因。
「有一晚，我突然凍醒咗，走廊有個疑似着住制服嘅女士，我就估到係嗰位客人嘅妹妹。佢同我交帶咗啲嘢同佢家姐講，我話口講無憑，佢就話：『你同佢講坐梳化嗰個就係我，佢就明。』第二日同個客講番，佢話兩姊妹習慣相約喺屋企睇電影，有日感覺到妹妹坐喺身邊，問咗句：『妹，係咪你？』世事就係咁奇妙。」
同行如敵國，她宗旨做好自己，亦慶幸甚少有網民惡意中傷，「是非可能係娛樂方面，早排我祝黃澤鋒夫婦（58歲）早日生第3胎，結果被網友鬧我心地差。其實嗰日澤鋒為二女擺百日宴，佢滿場飛，話自己有氣有力，生多個都得。同埋我真係唔覺得佢年紀大，篤佢仲有胸肌㗎！」
說着說着，她即場致電對方，獲黃澤鋒代為平反：「裸泳係我好好好好嘅朋友，其實佢講笑，真係冇嘢，祝我生多10個都得㗎！我哋識咗幾十年，佢又靚又聰明，我仲搵過佢幫我解夢㖭，佢都幾準㗎。」
相認密碼
2002年一部《黑夜彩虹》，令羅泳嫻和吳啟華撻着，可惜戀情來去匆匆，翌年男方被指「偷食」，她灑脫地斬纜，問她這算是情劫嗎？
她笑說：「佢係一個好演員，我無謂講嘢傷害佢，不過世界有樣嘢叫鬱結，初時男女地位唔對等，全世界攻擊我，到分手時，咁啱佢有緋聞，就輪到佢被攻擊。」
新戀情在2011年再次降臨在裸泳身上。那年，她在飛機上邂逅了德國前夫，有如浪漫愛情劇。「我幫佢成功建立咗公司王國，可惜大家只可共患難，不能共富貴。其實當年我曾經占卜，知道我哋有機會分開，但年少時就係唔信命，鍾意嘛！分開後，我傷心咗3日，就即刻見新工喇。」
轉做地產的她，其後遇到現任老公Jeremy。「佢攞我時辰八字睇先，一夾完就心心眼我，知我旺佢。我都睇過牌，知道大家過到人世。𠵱家望到老公同囝囝，先知平凡是福好緊要，老公我好愛你，永遠愛你！」
兒子不經不覺5歲半，原來羅泳嫻當日生仔，在鬼門關前走了一轉。「我止唔到血，半昏迷狀態，嗌救命都冇力。後尾見到老公就喊，好驚再見唔到佢同囝囝。同埋因為生仔用咗好多麻醉藥，我驚將來老人癡呆，於是同老公講定密碼，方便將來可認出對方，仲有啲密碼係用嚟防騙同下世相認嘅。」
她自言並非一個每一步都占卜的人，但大方向會睇，「我知我會早走過老公，所以我食好着好，唔會慳自己。我心願好簡單，希望離世時佢兩父子嚟得切同我講再見，等我有機會多謝老公一直的陪伴，同埋多謝囝囝帶俾我無限歡樂。」
珍惜眼前人，說來老土，但真實，也感動。
