發佈時間：19:47 2023-11-10
養生要合時！要根據氣節變化，調整養生方法。立冬開始，天氣漸冷，陽氣漸衰，適宜溫補。所謂「冬藏補腎」，冬天着重補腎益肝及強化免疫力，首推食用花膠！花膠性平，補而不燥，滋陰補腎及養血，成人和小朋友、甚至熱底之人都適宜。口感彈牙又滑嘟嘟的花膠，每口都是骨膠原，其滋陰美膚功效，令女士趨之若鶩！
花膠品種五花八門，價格不一，如何選擇的確是學問！身為上環傳統海味店第二代傳人黃祺，推介性價比高的花膠：鱈魚膠，分享如何揀選及浸發的秘訣外，先後攻讀中醫營養學及藥膳課程的她，鑽研食療及湯水多年，更推介2款鱈魚膠湯水，整個冬天都啱飲！
冰島鱈魚膠經濟實惠
黃祺指鱈魚膠是「抵食之選」，更是女士恩物，有助保養肌膚及延緩衰老，當中所含的DHA，更是有助「醒腦」！她說：「膠原對皮膚嘅重要性大家都知，而鱈魚膠當中70%嘅膠原蛋白，令肌膚看更光滑有彈性！鱈魚膠含有大量膠汁，有活血、補血、止血、禦寒祛濕、滋補養顏等功效，尤其對於啱啱做完手術、或產後媽媽好有幫助！鱈魚膠非常煙韌Q彈，同傳統花膠嘅腍滑口感完全唔同，好有咬感同爽滑，非常耐煲，又容易浸發，平時粗食例如煲湯、炒餸、打邊爐等，點食都得，食多幾舊都唔肉赤！」
在云云鱈魚膠中，黃祺推介來自冰島的鱈魚膠，經濟實惠。她說：「冰島水質清澈，海產產量豐富，所以出產嘅鱈魚花膠，質量自然高，潔淨無腥，膠質豐富。睇表面以為係薄片，但口感厚實，容易浸發，唔易『瀉』身。加上冰島鱈魚膠產量大，所以價格相對經濟實惠，完全大受『花膠控』歡迎！」
浸發方法視乎厚薄
黃祺指浸發鱈魚膠的時間，要視乎尺寸厚薄而定。如果是鱈魚膠碎或薄片，先用清水煲5-10分鐘，熄火焗至水凍，再用清水浸過花膠面放入雪櫃，雪一晚便可。
浸發厚身的鱈魚膠，就要以用清水浸泡一天至軟身，期間需要換水，（冬天8小時換一次，夏天4小時左右換一次），晚上放入雪櫃。翌日取出，用清水煲鱈魚膠至捲起，就可以熄火焗，直至水凍便可。如怕腥，可放薑蔥。
鱈魚膠湯水推介
青紅蘿蔔螺頭鱈魚膠湯
材料: 鱈魚膠 數條、急凍美國螺頭 1-2個、紅蘿蔔 1條、青蘿蔔 1條、元肉8-10粒、杞子1両、無花果 3-5粒 、豬𦟌 適量、水 3500-4000ml
製法:
1.鱈魚膠完成浸發，其他乾貨浸15分鐘後沖水，蘿蔔去皮切塊。
2. 螺頭解凍，瘦肉和螺頭汆水後過冷河備用，切大塊。
3. 水滾後放入所有材料(除鱈魚膠)，再調細火煲約1小時，之後加入鱈魚膠再煲多1小時即成。
鱈魚膠燉竹絲雞湯
材料:
鱈魚膠2-3塊、竹絲雞半隻、石斛8粒、蜜棗3粒、酒1茶匙、鹽適量、薑數片、葱少許、滾水5碗
製法：
1. 花膠以凍水浸發過夜，其間可放在雪櫃內。
2. 用薑、葱將花膠氽水10分鐘，蓋上蓋子，待花膠回復至室溫。
3. 竹絲雞斬件，除去內臟及洗淨備用。
4. 再煲滾一鍋熱水，將竹絲雞氽水。
5. 將竹絲雞、石斛、蜜棗及酒等加進燉盅，再倒入滾水至7成滿，蓋上蓋子，以慢火隔水燉3小時。
6. 加入花膠後再慢火燉1小時，加鹽調味，即成。
