發佈時間：18:22 2024-11-07
「借錢呃食黨」以新招騙財，肆虐屯門？有網民在facebook群組「屯門友」報料，早前在龍門居遇上一名白衣黑褲「Gel高頭髮」的中年漢，以普通話聲稱從深圳來港後與友人失散，盼能施舍飯錢。帖文引發網民熱議，有人質說詞，更有多名街坊大爆遇上「借錢呃食黨」的種種經歷。
樓主在帖文中寫道：「大家要注意下，大家要警惕，龍門居有大陸借錢黨出沒，話自己從深圳過嚟玩，同朋友失散咗，而家等緊朋友嚟接佢，想借錢食飯。白色T恤，黑色褲，Gel高頭髮中年講普通話嘅男人（Sorry，冇影低相） 呼籲啲老人家要小心。」
「呃食黨」肆虐屯門
網民紛紛回應，有指「呃食黨」已遍佈全港，在屯門尤其肆虐。不少區內街坊稱﹕「工廠區都有」、「西鐵站都有」、「友愛輕鐵站都有」、「大興邨都有借錢黨出現」、「曾見過屯門站搵獵物」、「碼頭區都有兩個女人攞錢食飯」、「兆康都有啦！仲一家三口添」、「翠寧都有、已年青化、沿途有你、大家小心」。
有街坊愈講愈詳細﹕「我昨天也在屯門偶遇過~我説我窮過你！」、「我昨天在碼頭區遇到，兩個國語女人，話無錢都食飯」、「好耐啦，幾個月前已經有啦，屯門碼頭有，我望佢幾秒恥笑佢」、「河田，市中心經常遇到！通常兩個女人，一老一嫰，已經Ｘ過好幾次」、「早幾日大興邨有兩個女人大約40（歲）左右四周圍問人借$50元食飯」。
有人更詳述過程﹕「星期一晚係盈豐出面都好似係呢個女人截停我，以為佢問路，點知話第一次嚟呢度旅遊，但微信壞咗，未聽完我講咗句拜拜就走了。旅遊遊到嚟盈豐都唔知邊個編行程」、「我都在置樂遇到一個，本人唔太明普通話，不過隱約聽到佢提及『饅頭』，我咪話帶佢一齊去買囉。不過最後去到間舖休息，佢又話唔耽誤我喎，事情就咁不了了之。可能我明啲唔明啲，避過一劫啩」。
對於以上發生在屯門區內的種種，有網民於是索性表示「呢個問題屯門區周圍都有啦 」，還有人稱「元朗都有」、「以前一早有喺太子旺角」。
網民提供對付騙徒妙法
有熱心網民就提供對付騙徒妙法﹕「買個兩餸飯叫佢即場食畀你睇」、「我會直接講，而家香港好多餐廳都收支付寶、微信支付，唔需要現金都食到飯 」。最多網民表明會報警﹕「冇錢？同朋友走散？幫佢打999」、「交畀警察」、「帶佢去警署幫佢」、「我會建議佢搵警察協助」、「遇到呢啲人，第一時間就梗係搵警察啦。等警察幫佢哋囉；同事最好就影埋佢哋個樣，等啲警察容易搵到佢哋！」。
