更新時間：17:23 2025-07-22
發佈時間：17:23 2025-07-22
發佈時間：17:23 2025-07-22
近日有網民在社交平台分享一張照片，指石門某連鎖酒樓在開市前安排員工於門前列隊「檢閱」，由主管訓話打氣。他形容現場氣氛緊張，經理「好有火」，直言：「估唔到做酒樓都咁大壓力，又要齊聲喊口號，又要有士氣。」
員工列隊聽訓話 場面似紀律部隊
從照片可見，約二十多名員工身穿整齊制服，在酒樓門前分成兩列排隊，前方站著一名穿白色恤衫的男子，右側則有另一名穿西裝的男士，疑為管理層。員工大多為女性，有人戴白手套，有人手持托盤，神情專注聆聽訓示。畫面中亦見一名途人經過，場面頗為吸睛。
網民熱議：似內地做法 有人讚有人質疑
帖文引來大量網民討論，有人笑言：「我以為係紀律部隊！」亦有人認為這種列隊訓話方式似是模仿內地管理模式：「以前喺深圳見過，開工前要briefing、叫口號加油。」不少人猜測員工可能是外勞。
有網民表示認同：「好有feel，一齊唱《團結就是力量》都唔出奇。」但亦有人質疑成效：「士氣唔係靠叫口號，人工高、福利好，員工自然投入。」
另有網民好奇：「點解唔喺店內briefing？係咪做show畀客睇？」樓主則估計：「可能入面有客，唔方便喺內部開會。」亦有人笑問：「拎住個盤briefing係咩玩法？」
酒樓經理回應：行之有年 非喊口號式傳銷
對於事件引起關注，酒樓陳姓經理回應指，該聚會屬日常安排，目的是提升服務質素，「已經做咗廿幾年啦，唔係新鮮事。」他強調並非傳銷式喊口號，而是由經理講解當日重點事項，例如推介菜式、注意客人反映等。
聚會通常在早市及晚市前進行，每次約五至十五分鐘，參與者為當值接待員工。他澄清：「唔會叫口號，唔係員工發言，聽完就開工。」
至於為何選擇在門外進行，他解釋：「當時店內已有客人，唔想打擾，所以喺門外briefing。」他亦表示酒樓有聘請外勞，但聚會與此無關，純粹是提升服務質素的安排。
來源：advice.from.smith＠Threads
最Hit
