發佈時間：19:52 2025-06-11
朝早上班卻遇到有人大鬧巴士，實在是令人困擾。日前有巴士乘客發帖講述其糟心經歷，指有老婦因樂悠咭餘額不足，但又堅持要享用「2元乘車優惠」，拒絕付4.5元全額車資，迫使車長停車與她理論，這名乘客亦因此受累，最終「搞到我返工遲到」。
據事主在事發在社交平台Threads及「大埔TAI PO」FB專頁發布的帖子指，涉事的九巴72K路線巴士來往大埔富蝶及太和，全程車資僅4.5元。但老婦登車後發現「八達通（樂悠咭）冇錢」，卻只肯付2元而堅拒「畀全價」。
從事主上載的影片可見，站在巴士中間落車門前的老婦正與一名男乘客爭辯。她一手握有一張普通個人八達通咭，另一手持有一張樂悠咭。估計是由於樂悠咭餘額不足下，她堅持以普通八達通咭付2元車資不果，而大鬧起來。
全費車資僅$4.5 堅持要畀$2 反問乘客：你係邊個啊？！
男乘客斥道：「嗰款（普通八達通）就唔係兩蚊！呢個係法例嚟㗎！」有女乘客附和：「你識唔識法律㗎你！」婦人未有退讓，還囂張反問：「你係邊個啊？！」
其間她舉起手上普通個人八達通咭說：「我嚟，我事實上就係兩蚊！」並揚手喊停：「得啦，你唔係巴士公司啊，唔好講！」 隨即轉身走向車長駕駛座。女乘客聞言怒斥：「巴咩士公司啊，法律係咁講㗎，關巴士公司咩事啊？！」
孭疑似名牌袋 網民：有錢買名牌冇錢搭車？
事件引發網民熱議，有人嘲諷涉事老婦道：「我只知佢張咭是全數，綠悠咭$2，老人八達通半價，一拍就知，不需跟她討論！」有眼利的網民就留意到老婦孭著疑似名牌袋：「自己唔識嘢又唔聽人講，阻住全車人，孭個goyard慳幾蚊，好難搞。」「有錢買名牌冇錢搭車。」
另有網民則分享了類似經歷：「試過一次，攪咗十分鐘，忍唔到幫個阿伯畀車錢，阻Ｘ住哂開車，趕時間嘛。」
按規定，現時60歲或以上香港居民必須使用樂悠咭搭車，才可享有2元乘車優惠，普通個人八達通咭需付車資全費。至於不記名長者八達通咭（65歲或以上），亦由去年8月25日起不再適用於2元乘車優惠，但在部分行車路線可享長者半價優惠。
