發佈時間：19:31 2025-05-08
有女網民日前在社交平台Threads發帖，憶朮自己曾因耳朵突然劇痛，大半夜「飛的」到急症室求診，最終竟從耳中「飛出」一條疑似蜈蚣的昆蟲！她上載了當時拍下的一張帶血蟲蟲照片，形容當時心情崩潰，被蟲蟲入耳時，還感到「好似有嘢鑽入個腦」，還聽到怪聲。由於過程與相片畫面過於嚇人，不少網民被嚇到打冷震。
據女事主指，事發時她就讀中學，有一晚凌晨睡覺時突然感到其中一邊耳朵很痛，便「叫醒我老豆睇下耳仔入面，佢照嚟照去都睇唔到有嘢。但我真係痛到瞓唔到，我老豆以為我想詐病唔返學，之後我就坐喺廳喊」。正好此時她哥哥落樓上廁所，看到她哭便上前關心她，得知她耳朵很痛後，還聽到「卡卡聲」，當即帶着她搭的士到醫院急症室求診。
她寫道﹕「喺的士嗰陣我以為我係平時戴耳機太大聲，耳膜穿咗仲發誓我以後聽歌唔會再咁大聲。」兩人在醫院等了幾分鐘後，「個姑娘一照就話：阿妹你耳仔有隻蟲。嗰刻內心已崩潰。坐多幾分鐘就到我見醫生，醫生一望就話：嘩你個隻蜈蚣嚟。內心崩潰到喊晒口。之後唧咗啲水入耳仔，隻蜈蚣就飛咗出嚟了。個醫生同我講如果佢再爬入啲，穿咗耳膜嘅話就可以人生拜拜了」。
她指此次經歷讓她畢生難忘，「因為真係超級痛，本身蜈蚣啲腳就好硬，仲要多腳，個感覺好似有嘢鑽入個腦咁，卡卡沙沙嘅聲」。她還上載了「飛咗出嚟的蜈蚣」相片。
網民：諗下都打冷震
由於相中昆蟲帶有血跡，不少網民看後驚呼「有血」、「嚇死人咩」、「睇到好驚」、「諗下都打冷震」、「好彩你最後冇事，但真係諗到都起毛管戙」。有網民則表示，「你圖片嗰個係千足蟲唔係蜈蚣嚟㗎！雖然佢哋都有好多腳，但起碼千足蟲無毒」，另有人猜測女事主「應該係住村屋多」，建議「安裝蚊網買定殺蟲水」。
女事主隨後補充指：「好好彩我哥凌晨3點去咗屙尿，如果唔係我都唔知點算」。有網民當即回應，大讚「你阿哥救咗你，抵請食飯啦」、「好彩你阿哥有帶你睇醫生」、「多得你阿哥！ 當時簡直係英雄」。
有人好奇女事主父親之後的反應﹕「想問你老豆知道後有咩反應？好彩有你哥咋，最後有冇話你阿爸？」「你阿爸差啲害咗你，佢知你冇講大話有咩反應？ 」女事主則回覆稱：「無話佢呀，我爸都有道歉，最後無事」。有人就問女事主﹕「最後有冇返學？」她表示「無，返去繼續瞓」。
網民自爆耳筒耳塞入耳經歷
女事主的經歷讓不少網民表示「以後塞住耳仔先瞓覺」，還有人同時自爆同類驚嚇經歷：
「雖然唔係蟲，但我都試過戴耳筒嗰陣，個耳筒最出嗰層入咗落耳到，然後返到公司上司同事都話幫我照過都係睇唔到，最後收工去睇耳鼻喉科，個醫生10秒就幫我拎番出嚟，有埋醫保都收1,660元。第2日上司問我收幾多錢佢哋個個都話貴，嗰次之後我就轉咗用耳機，頭戴式嗰隻。」
「上年第一次瞓醒發現有一邊耳仔聽唔到嘢，又有嘢梗住咁，醒咗之後有啲驚唔知咩事，然後發覺因為環境太嘈要戴耳塞瞓覺嘅我，檢查下個耳塞，原來佢哋個尾有粒的，可能用得耐粒的斷咗喺耳道，拿拿臨返工前去搵醫生，家庭醫生都話驚搞唔到要我去急症，好彩醫生幫我搞掂咗。」
資料來源：hailey.ee_＠Threads
