發佈時間：12:00 2025-04-01
有「翻版李嘉欣」之稱的倪樂琳（Ellyn），以大熱姿態成為2024年港姐冠軍，實至明歸。
因為自小已經很想在鏡頭前表現自己，不想任職沉悶的文職工作，所以去年就毅然參加選美比賽，挑戰自己，「如果我冇參選香港小姐，我相信我應該會去考公務員，因為工作比較穩定，加上我是讀類似公共社會政策的學科。」
倪樂琳坦言家人亦非常支持她選美入行：「其實爸爸每一年睇到香港小姐嘅宣傳廣告，就會叫我去參加，不過因為我仲讀緊書，同埋我真係冇勇氣着住件泳衣行出個台度面對觀眾，所以次次我都會推佢。」
拍寫真集改變心態
不過至去年倪樂琳與女團MORII GIRLS成員一同拍寫真後，就完全對着泳衣改變了心態，她坦言：
「出過水着寫真之後，我發現着泳衣都唔算係一件色情嘅事，因為着泳衣都係可以散發出青春、健康嘅一面，其實同選香港小姐一樣，着泳衣一樣可以好靚，不過其實影寫真嗰次就多布過選港姐嗰日囉！」
雖然倪樂琳的胸前和手臂等部位都有胎印，但完全無損她對着泳衣的自信，她笑言：「有胎記呢個先係我嚟㗎嘛，我媽媽同我講，如果有一日我哋失散咗，佢都可以憑胎記俾佢搵返我，哈哈！我嘅身體係父母俾我，我係唔應該嫌棄嘅。」
參選香港小姐 一圓爸爸期盼
倪樂琳有見自己大學畢業，於是應承屋企人參選香港小姐，一圓爸爸的期盼。
「我細細個就經常攞住屋企張冷氣被，扮香港小姐的披肩，然後拎住雞毛掃扮權杖，喺屋企繞場一周。」
去年適逢大學畢業，她想送一個特別的禮物給自己，加上爸爸用激將法對她說：「因為你怕攰又懶惰，所以先至唔去參選咋嘛。其實選港姐都係辛苦幾個月，係一個特別嘅經歷，點解唔試吓？」
結果倪樂琳就以「城大李嘉欣」的綽號，過五關斬六將，成為應屆香港小姐冠軍。她坦言為了參選，沒有進行什麼地獄式減肥。
「其實集訓期間，個人就一定會瘦，因為一日只係食得一餐，根本唔需要刻意減肥。」她更自爆那段期間，她每晚都會幫襯麥當勞食麥樂雞餐，「不過唔知點解，我點食都唔會肥，哈哈！」
在填報參選香港小姐的表格上，她需要填寫「我的志向」，結果她寫下了：
「我要成為一個能帶別人正能量和充滿活力的人，做類似一個開心果！因為我個人其實係比較有趣，幾搞笑㗎！」
思想正面樂觀，她希望能夠感染所有人，一同活在當下，活得開心。「我的中文老師曾經告訴我一句金句，令我一生銘記，因為好有意思：『回首向來蕭瑟處 ，歸去，也無風雨也無晴 。』」共勉之！
延伸內容 : 港姐三甲絕密揭秘 | 爆冠軍倪樂琳靠Red Bull搞High自己
延伸內容 : 易得貴人有利揚名 倪樂琳 | 麥玲玲
Profile
姓名： 倪樂琳
英文名：Ellyn
年齡：24歲
三圍： 33、22.5、33吋
身高： 167.5cm
點入行： 2024香港小姐冠軍
學歷：香港城市大學畢業
藝歷：2022年曾加入香港女子音樂組合MORII GIRLS成為組員
技能：唱歌、跳舞、彈琴
