發佈時間：18:00 2026-04-17
剛於上周五（4月10日）度過38歲生日的港產騎師楊明綸，有「好好先生」之稱，最為人津津樂道的好人好事，非2023年在樂聲盃中墮馬後，他不顧傷勢，跑去安撫斷了腳的「自勝者強」莫屬，事件感動全城，更意外令他收穫了一段愛情，認識了外籍太太Jessica。
「非常感恩，好似好多嘢都整定。之後開始有好多馬主、馬迷對我有好印象，人家肯將實力馬交畀我。」
入行18年，今個馬季，他贏了16場頭馬，又有份策騎打吡大賽。回望過去低潮期，他一度想退下做「騎馬人」，他說：「計劃趕不上變化，我享受做騎師嘅每一日，唔強求，所有嘅安排就係最好嘅安排。」
隨遇而安，最緊要自己開心。
努力有回報
俗語有云：「行船跑馬三分險」，楊明綸在賽馬生涯中，有不少墮馬經歷，連他自己也說大吉利是。曾經有段時間，差不多一年總會有一、兩次墮馬。而每次受傷，閒閒地要休養兩、三個月。
「喺賽馬世界入面，冇得練點樣跌，因為隻馬時速60公里，可能距離地面只有一米高，正常人係唔會有足夠時間去畀反應。
「記得有一季我連續跌了3次，嗰次跌到有後遺症，每次上馬都驚，驚到經過出事地點，墮馬情景會喺腦入面失控重播。嗰一刻我開始諗，係咪夠鐘要退落嚟？好彩咁啱馬會有心理治療師，我又識咗太太，幫我慢慢走出陰霾。」
騎師想出頭，首先要得到練馬師、馬主的支持，偏偏楊明綸性格內向，不喜歡交際，奉行有麝自然香的原則。
「我覺得好難開口提出想要馬騎，我又唔係要發達，要爭取名譽，純粹鍾意騎馬。我寧願對着啲馬10個鐘，每日做gym操弗自己，或者每個星期上從化幫手試閘。」
默默耕耘，任勞任怨，結果獲練馬師蔡約翰讓他策騎「至尊高超」參加打吡大賽，最終跑第8，「後尾睇番蔡約翰嘅訪問，原來佢好感謝我喺從化幫佢試咗好多閘，想喺大賽中提供坐騎畀我當回報。嗰場比賽我入直路時，曾經有一秒諗過攞到冠軍㗎！」
捐血旺賽績
楊明綸跑過4次打吡大賽，有次和「玖寶」拍住上，贏得殿軍。回想當日踏上騎師之路，緣於楊明綸不適應上海讀書的寄宿生活，回港度暑假時，見到馬會有招聘會，便報名投考見習騎師學校，最終過五關斬六將，成為6位入選學生之一。
「我覺得係騎師呢行選擇咗我，由細到大，全家都冇人睇馬，我對賽馬係零知識，純粹因緣際會入行。同期仲活躍馬壇嘅同學有梁家俊、蔡明紹，蘇狄雄就做咗副練馬師，下一屆就有何澤堯。」
全部都是華人騎師佼佼者，當中何澤堯有一隻贏過很多大賽的馬叫「金鎗六十」，問楊明綸有否妒忌？
「完全冇！因為係一齊成長嘅兄弟，每次兄弟贏馬都會替佢哋開心，好想有一日見到香港冠軍騎師嘅名字係華人。有冇好馬呢回事係講緣分，如果個天要畀你，自然會有。」
根據都市傳說，當騎師或練馬師覺得不順時，會到車公廟拜一拜，轉風車轉運。信佛的他說：「我成日都去，順唔順都去。本身會定期去寺廟，每日都會誦經，臨睡前又會抄經。我仲有定期捐血嘅習慣，捐咗30次喇，多數捐完血之後嗰排，出賽成績都會好啲。」
太太貪靚仔
騎師為楊明綸帶來事業，也帶來愛情。3年前他墮馬後，飛奔去捉實受傷的「自勝者強」，令現已成為楊太的Jessica對他心心眼，主動結識。兩情相悅下，更於去年結婚。問外籍太太除了喜歡他有愛心，還喜歡他甚麼？
他不加思索地說：「靚仔囉！佢係外貌協會，大家都好鍾意動物，好愛馬。佢份工好有意義，負責安排退役馬去外國過退休生活。馬季唞暑時，人人歐遊，佢就陪我去泰國入靜修營，捱足兩個星期，令我覺得呢個女仔可以共度餘生。」
認定對的人，楊明綸就計好時間，在北海道二世古滑雪場放煙花時，於聖誕樹前上演浪漫求婚。「佢嘅出現令我有咗意義，想努力啲，等佢為我感到驕傲。」
Jessica常入場為他尖叫打氣，有傳每逢騎師生日，或者有父母、妻子入馬場打氣，跑出來的成績會特別好，可有其事？他笑說：「唔關事啦！咁多騎師輪流生日，唔通個個都會贏咩？但生B係會旺啲嘅，好似艾兆禮咁。」
馬迷最想知道贏馬心得，他認為最主要係心態，「本住想贏嘅心態去研究賽事，考自己眼光，或者覺得隻馬名好聽，同你好夾而去投注，我諗滿足感會大過人哋畀貼士你。」
小賭怡情，永遠都是長勝貼士。
