發佈時間：15:00 2026-04-02
人生有多少個16年？由2010年贏得《英皇新秀歌唱大賽》冠軍開始，38歲的譚永浩做歌手那團火，從沒有一刻熄滅過。
捲土重來之前，他加入藝訓班、主持《流行都市》、拍《愛‧回家》演「阿拾」、擔正音樂劇，甚至早前化名「鹿七伯」出戰《中年好聲音4》。
「我最辛酸時，試過戶口得番兩位數，撳唔到錢出嚟，要死死地氣去問朋友借100蚊搭車。同埋我唔覺得做主持好屈就，keep住有工開幾好，仲有師奶同學生粉絲𠻹。」
他近日推出了首支派台歌〈光〉，歌詞有句：「世界這麼漆黑總需要光。」迷失過，再能量滿滿出發，女友杜小喬一定撐到底。
為生活辬送貨
譚永浩早前以高難度的〈浮誇〉和〈爛泥〉，蒙面參加《中年好聲音4》，出局一刻脫下鹿面具，才揭曉真身。其實他和娛樂圈早有淵源，16歲遇星探，拍了劇集《赤沙印記@四葉草2》，之後繼續學業，畢業後找了一份銀行工作。
「嗰時覺得同自己想做嘅嘢背道而馳，當見到《新秀》接受報名，就好想為夢想試一次。」
年青有本錢，輸得起，或許正是這種從容態度，令他發揮水準，勝出比賽。但出道做歌手，要配合天時地利人和，輾轉之下，他加入藝訓班，認識了恩師鄭丹端，後來在他引薦下首次擔正音樂劇《我們的青春日誌》和《小男人周記》。
「做音樂劇，開始重燃我對唱歌嗰團火，之後一直想搵機會做多啲關於唱歌嘅嘢。到TVB問我有冇興趣參加《中年好聲音4》，咁我就諗係咪要再踏出一步追夢呢？」
在圈中打滾十多年，他坦言迷失過，亦捱過。「疫情期間工作量好少，咁啱有部戲叫《麥路人》，嗰種貧窮好恐怖，我好驚自己變成咁，於是同朋友創業搞買餸平台，親自推車仔送貨，點知有次架車反咗，蘿蔔、洋蔥跌到成地都係，我踎低身執。嗰一刻我好難受，話晒都係藝人，點解會咁呢？但冇辦法，為咗生活就要做。」
單親媽媽湊大
在單親家庭成長的譚永浩，很感激媽媽做最強後盾，令他放心追夢。
「我鍾意唱歌，某程度上都係受媽媽影響，因為細個屋企有部卡拉OK，每次家庭聚會，媽媽都會推我出去唱歌畀人聽。我做乜佢都支持，總之唔好餓死就得。不過初初入行，經濟狀況唔係太好，婆婆會間中攝少少錢畀我。後來唔夠錢使，我都唔敢同屋企人講，反而會問朋友借少少頂住先。」
他指，大概在10歲的時候，父母分開了。他依稀記得，當年爸爸生意失敗，媽媽幫他還了很多債項。自小缺乏父愛，他坦言對成長有影響，那麼有恨過爸爸嗎？
「老實講，有！有諗過如果媽媽唔使幫手還債，會唔會唔使咁辛苦做嘢，去捱大我哋兩兄妹呢？後來覺得有啲嘢發生咗，就發生咗，𠵱家我哋都生活得幾好。近年喺嫲嫲喪禮上重遇爸爸，成廿年冇見，第一眼唔係好認得，傾咗兩句，交換咗電話，佢有發訊息話約見面，但一直冇真係約過。我冇特別大動力去搵佢，但如果有機會見，都唔會抗拒。」
任職會計師的媽媽撐起整個家，問他可有見過媽媽辛苦到偷偷垂淚？他哽咽地說：「冇！我媽媽真係好強，永遠返到屋企都係開開心心，好似冇帶腦嘅師奶。我估佢壓力非常大，但唔會同我哋講，只想畀一個舒服嘅家我哋。」
神賜的禮物
譚永浩和杜小喬，因合演音樂劇《我們的青春日誌》而戲假情真。能夠將女神私有化，他形容為「神賜給我的禮物」。
「2012年，婆婆患重病，當時我祈禱跟神講，只要畀婆婆過到今晚，就相信神，結果婆婆真係過到嗰關。後來我開始返教會，冇一直特別話要受洗，偏偏喺2019年差唔多做《我們的青春日誌》之前，我跟教會去以色列，好順利有牧師，又經過約旦河，仲book到可以受洗，正式成為基督徒。返到香港，第一次見到杜小喬，我仲心諗：『佢講嘢咁倔，點同佢相處，仲要演情侶𠻹。』」
他原本以為女方有名氣，一定比較物質主義，但相處下去，完全改觀，「佢只會睇人心地好唔好而交往，好難得，開始欣賞佢。十五十六想行前一步時，突然聽到腦裏面有把聲同我講：『如果你再唔同佢講就冇㗎喇！』於是我就正式表白，而佢亦say yes！」
提起女友，他一臉甜蜜，「我哋相戀，絕對係神蹟顯現，係神賜畀我嘅禮物。我哋咁啱都想喺人生有改變時相遇，一齊之後，佢改變咗我好多嘢，包括待人接物、諗法等等。」
相愛多年，譚永浩試過擺烏龍，原本想買繡球花𠱁女友，結果買錯菊花。「佢𠵱家每次出街見到菊花，都會笑我㗎，話係繡球花。」
歌唱事業，他仍然要努力去追，但愛情方面，已認定與杜小喬白頭到老，「佢好重要，唔止另一半咁簡單。」
這個閃光彈，閃到核爆。
