發佈時間：17:00 2026-03-19
如果要選《夜王》MVP，我相信，飾演「葵芳」的蔡蕙琪會高票當選。她一口「譚仔」鄉音，加上對四捨五入的獨特睇法，笑到觀眾有腹肌。最意想不到的，是眼前卸下濃妝的她，跟片中打扮相差極大，幾乎認不出來。
「口音嘅參考對象係林明禎，造型就係美術組同事諗起鄺美雲而得來嘅靈感。不過我冇睇過鄺美雲嘅演出偷師，因為我今年29歲半，四捨五入29歲，冇機會接觸嗰個年代嘅節目啊。」
演藝學院畢業，曾加入中英劇團，作為影壇新人，今次交足功課，搞笑又得，要賺人熱淚，一樣得。
「舉手剃胳肋底毛嗰幕係即興㗎！導演話啲舞小姐為場大龍鳳要作最後準備，補妝、整頭都俾人做晒，我見有剃毛刀咪擸囉，咁啱又有支眉筆喺手，子華神見到，就即場爆咗句『刮緊嘢定畫緊嘢』喇。」
一人有一個夢想，憑《夜王》走紅的蔡蕙琪，這一站是葵芳，相信離下一站天后的日子不遠吧？
「唔知呢，可能喺屋企唱住〈下一站天后〉先。我想keep住有戲拍，試下喪屍片、監獄片或古裝片，仲好想去荷李活演超級英雄，或者《哈利波特》入面張秋嗰類角色。」
期待她進軍荷李活之前，她已成功踏出第一步，殺入港鐵葵芳站設有打卡位，還以「葵芳mode」作一日限定廣播，聽見都笑出聲。
子華神鼓勵
蔡蕙琪英文名叫Kay，緣於中學時的偶像謝安琪也叫這名字。比起Kay，觀眾更喜歡叫她「葵芳」或「Franchesca」。而「葵芳」這個名字，原來由《夜王》導演吳煒倫和編劇改，帶點土味之餘，又切合蔡蕙琪在中英劇團時，經常在葵青劇院出沒，有如葵青區吉祥物的背景。
片中，蔡蕙琪和黃子華有多場對手戲，原來兩人曾合作《毒舌大狀》，當時她飾演秘書，負責帶他入房見謝君豪。「我哋得一面之緣，所以拍《夜王》時佢唔認得我，後來同佢講番，就喚醒咗佢記憶。」
搞笑以外，有一幕蔡蕙琪向子華神哭訴日日要開工的苦衷，場面感人。能夠秒速落淚，跟她想起嫲嫲離世有關。
「我一方面代入角色處境，一方面再擺少少嫲嫲患癌嘅經歷入去。子華係一個好好嘅拍檔，一個眼神、搭下膊頭，對我已經係鼓勵，令我放鬆好多。我睇佢拍嘅劇長大，最鍾意睇《男親女愛》，好欣賞佢唔理個世界係點，都保持佢態度嘅性格。」
與「神」同行，令她獲益良多。另一收穫，是拉近了她和鄭秀文的關係。
「Sammi身為堂堂巨星，居然私下DM我，虛心問我究竟嗰場戲點做。好開心可以同佢交流，黐線！我係佢小粉絲呀！有機會嘅話，想同佢及子華唱K。記得慶功宴時，我哋逼子華唱〈藍天〉，佢真係開金口，唱咗少少。」
密密接廣告
蔡蕙琪在中英劇團5年多，發展不錯，曾經憑《加數機》獲得傑出演員獎，又曾演出《擊不倒的她》、《解憂雜貨店》等舞台劇。在comfort zone逗留久了，決定放手一搏外闖，以自由身接job。
「憑一個『信』字，我決定離開劇團。我信自己，相信吸引力法則，諗住自己做到乜，個世界就會幫你。搵食方面，咪做下part time囉，加加埋埋都夠交租，同埋乜嘢試鏡都唔放過。」
現時她已辭去cafe的兼職工作，專注演藝事業。提到當日為《夜王》試鏡，靠口音突圍而出，她回憶道：「副導一開始要求我試下發姣，但我姣唔到，唔甘心就咁返屋企，咪諗一個方法，講嘢有口音，令自己享受咗個casting先，唔理最後有冇被選中都好。」
演出之前，一眾「小姐」都要填「點心紙」，剔出接受的親密程度，聞說她全部打交叉。
「拖手可以，接吻、露胸唔得，被人摸，咪喇！知道自己唔係主角，只係坐後面湊人數，唔使呢啲啦！坐前啲都唔使，總數都係收咁多錢，哈哈。其實要睇劇本同角色需要，先決定為唔為藝術犧牲，湯唯拍《色，戒》都靚啦，同埋要問觀眾想唔想睇，無謂污染人哋眼睛嘛。」
在「葵芳」效應下，她密密吸金，「多咗一啲廣告，好似脫毛、耳機贊助等，其實好好彩，咁啱廣告商同觀眾都鍾意個角色。」
目標荷李活
別以為蔡蕙琪天生好運，一切唾手可得，實情她的人生挫敗經驗豐富，考演藝學院考了兩次，車牌也考了三次才成功。
「我好硬頸，有啲強迫症，唔畀自己失敗。考車牌『肥』咗兩次，唔甘心到第三次都搵番同一個師傅，揸同一架車，最後仲抽番同一條路，喺忠義街考試，咁樣成功感超大。人要不斷戰勝自己，唔好氣餒，唔好覺得人生就咁玩完。」
霎時間，成為話題人物，當面對壓力或者不開心的時候，她會沖涼減壓。
「返到屋企，我會第一時間去洗澡，將自己同外界嘅生活隔開。我會開一盞燈仔，或者點蠟燭，播住歌沖涼，沖完可能有另一種睇法，然後走去瞓覺，瞓醒又係新一日。」
蘇民峰師傅曾批算她這兩年的事業，會更上一層樓。她將這番話當作信念鞭策自己，絕對不會安坐家中等運到。
問她這刻的夢想？她想一想後笑說：「嘩！死喇，我係一條鹹魚。其實做演員已經達成夢想，自己鍾意喎，人生仲有乜嘢強求？好想試唔同角色，同埋去荷李活，做下超級英雄都好。」
超級英雄暫時未做到，但《夜王》令她初嘗人氣王的滋味，「未巡迴謝票時，我以為網絡上嘅讚賞，只係讚『葵芳』，唔係exactly讚我。去到現場聽到觀眾掌聲，我先真實感受到佢哋嘅力量，好warm。」
愛的紋身
蔡蕙琪有個拍拖多年的男友黃楚軒（Hinson），兩情相悅，她左手的HK紋身，正是愛的印記，並非解作香港。
「H、K分別代表我同佢嘅英文字母，將來如果分手，咪當我愛香港囉，哈哈！」
口裏似沒信心，實情心裏只容得下男友。
「希望有一日，我哋可以好似廖子妤同男友盧鎮業咁一齊拍戲。佢成日對身形樣貌冇乜自信，覺得唔輪到佢做主角。其實佢好努力，經歷同我好似，都係演藝畢業後加入劇團，佢嘅發展仲多元化過我，喺IG有個頻道叫『壞蛋蛋』，會二次創作一啲電影短片，希望電影都可以早日見到佢嘅身影啦。」
提起演藝學院，當時她學了一句格言「驚錯就係錯」，有否用來開導男友？
「呢句啱我用多啲，男友係容貌焦慮啫。嗰時喺演藝更衣室，我發覺自己好驚scene work出錯，唔知點算，就同個朋友訴苦。佢唔知喺入面沖緊涼定屙屎，佢同我講：『你驚錯就係錯啦！』真係一言驚醒夢中人，又係喎，唔驚咪得囉。」
這句格言，她袋到今時今日，令她勇往直前，相信自己。
