發佈時間：17:36 2026-02-05
因為2025 年電影版《尋秦記》，大家都多了回憶殺，當中陳國邦延續了 2001 年電視劇的經典角色「李斯」，其演繹被形容為更成熟穩重，獲網友大讚為「天選李斯」。陳國邦因為李斯而人氣急升，他更令多年前的一個網絡潮文「去沙灘唔𥄫女」而再度爆紅。
網絡潮文「去沙灘唔𥄫女」，猜一位男藝人，網友開估：「去沙灘唔𥄫女」是李斯，因為去沙灘唔𥄫女就是Silly癡線，Silly發音就係 See Li 斯李，在華人社會大家都習慣將last name 擺在前面，所以答案就是李斯，而做過李斯這個角色的TVB藝員就只得陳國邦，所以潮文答案就是陳國邦。
「李斯潮文」無限Loop
當年答案公布後，即時引起大批連登網民不滿，此後每逢有連登網民出IQ題時，便有網民以李斯潮文回答。陳國邦談及紅足多年的「李斯潮文」，他坦言知道自己多了個英文名「Silly」，但可能是年紀大的關係，難以領悟當中的笑點，不過每年都有浸大學生跟自己分享「李斯潮文」，認為學生笑得好開心，所以每年都有人提起，多了「Silly」這個名字，冇乜所謂，潮文內容合不合邏輯都不是重點了，重點是「輕鬆，多謝大家」而已。
去沙灘真係唔𥄫女
今日，帶現年58歲的陳國邦行沙灘，去到沙灘唔𥄫女，確實有點「Silly」。
「其實我係一個好悶嘅人，我年輕嘅時候，都會同兩三個男仔老友去沙灘游水，但我又真係純粹去游水咁簡單，你問我有冇『𥄫女』，『𥄫女』喺我認識中係有意圖去做嘅事，我唔會有呢個意圖，但我係會望到，等如你喺萬綠叢中見到一朵花，你都望一兩眼。」
送石油氣爐畀羅敏莊最浪漫
去到沙灘唔𥄫女，別人眼中確實有點「Silly」，但對太太羅敏莊而言就是「Attractive」，陳國邦和羅敏莊於2002年因拍劇《雲海玉弓緣》而邂逅，羅敏莊被眼前的戇直好男人所吸引，主動追求，二人於2009年結婚，婚姻生活甜蜜，育有一女陳禛。陳國邦為人專一，多年來給予大家的印象都是好好先生一名。問陳國邦多年來有沒有為太太營造浪漫，他即時分享一個他覺得自己對太太非常浪漫的一次。「我太太係一個好賢娘淑德嘅女人，佢又好鍾意煮嘢食，有一次我見佢出咗街，我就即刻買咗一個佢好鍾意嘅石油氣爐畀佢，安裝好，等佢返到屋企，就送咗一個好大嘅驚喜畀佢。」為搏紅顏一笑送石油氣爐， 陳國邦都真係有浪漫嘅一面。
同李斯一起成長
陳國邦和李斯有相同的地方，李斯為秦始皇鞠躬盡瘁，陳國邦也為娛樂圈貢獻不少，過去這麼多年演活過不少角色，《尋秦記》電影版李斯一角，為陳國邦贏得不少掌聲。
「李斯這個角色，的而且確引來好大迴響，最近都令我接了兩個廣告。我都也收到好多粉絲給我的回應，我想講我陳國邦先，我覺得是我儲回來的，我對每一個劇集、電影或舞台劇，每一個角色的演出，我都會用盡我所能去做好這件事，相信觀眾是看到的，但是可能未有一個爆發點，直至《大太監》的彭三順，就出現第一個爆發點，《尋秦記》李斯就是第二個。好多本身不認識我的觀眾，都因為看過我這之演出，會看返我之前的作品，對我而言係非常開心嘅，在我的情感上，這個回報是很強的。」
《尋秦記》謝票收花最窩心
可以做多一次李斯這個角色，陳國邦演出前，用了很多心機去建構角色，畢竟陳國邦和李斯都成長了，思想想法都有轉變，當年的陳國邦只有34歲，現在的他已經58歲，成家立室做了人父，昔日的他酷愛收埋自己默默耕耘，甚少走去前面和觀眾互動，今日的陳國邦為電影謝票又謝票，為電影努力宣傳。
「係嘅，係有唔同咗，首先當你見到《尋秦記》成班團隊周圍去唔同嘅地方做宣傳，我當然好樂意去做，這個不只是觀眾們的回憶殺，亦都係我嘅回憶殺，係好難得可以原班人馬再次走埋一齊去做一件大家都好想做嘅事，這個機會難能可貴，所以一定要好好去珍惜。同觀眾近距離接觸，的確實質感受到很多，我每次謝票都會收到花，都真係好令人感動同開心。」
延伸內容 : 陳國邦被評為「懷才不遇之星」：係咪真係去擦鞋就得？爆杜琪峰出一招教戲 再爆同周秀娜接吻感受 更爆羅敏莊曾離家出走
延伸內容 : 羅敏莊揭陳國邦屋企真面目 爆黃日華改名黃日謙 教講趣味泰文
延伸內容 : 《尋秦記》李斯陳國邦 夫妻宮穩定子女運強 | 麥玲玲
