發佈時間:17:00 2025-10-20
剪了一頭清爽短髮的鍾鎮濤,哼着幾句英文歌下車,心情愉悅,只差未吹埋口哨。這也難怪,鍾鎮濤剛憑跟張艾嘉合演的《二十四味》,贏得人生中第一個影帝殊榮;客串演出的電視劇《巨塔之后》,又被觀眾大讚演技出色;21歲愛女鍾懿今年7月成功考入北京電影學院導演系研究生,令他開懷笑說:「以後我可以當她是搖錢樹咯,哈哈!」
印印腳之路,尚是遙遠,但他走向敝公司影樓時,卻見步履有點蹣跚,原來在去年10月,溫拿在廣州開巡迴演唱會時,乾冰令舞台變得濕滑,正大跳十字舞步的他不慎跣低,足足醫了成年。
「當時陳友同阿強走過來扶我,點知我哋三個都一齊跣低,佢哋都好傷㗎 !我就連環跌兩次,到𠵱家都未算百分之百好番。」
跌低了,再爬起身,鍾鎮濤絕對有這樣的人生經歷。風雨過後,早見彩虹,更有范姜化身在低谷裏不離不棄的守護天使,共度日日是好日。
今年鍾鎮濤72歲生日,范姜寫下愛的宣言:「夫君生日快樂,祝福你快快樂樂,幸幸福福,白白胖胖,可可愛愛,健健康康~愛你!」
這一對「姜濤戀」,沒驚天動地,卻細水長流。
演得好,死得早
放下電結他,拿起疊疊劇本,走進香港電視劇的世界,對鍾鎮濤來說,原來已經闊別了32年。
「初初見到劇名叫《巨塔之后》,因為我習慣睇簡體字劇本,以為係指after巨塔,後面嘅後。原來係講Queen嘅后。」
還有一個賣點令他心動去接拍,是劇組會去布拉格拍外景。「一來我未去過,二來布拉格同英國好近,當時鍾懿(三女)喺英國讀書,我可以順道探佢。結果咁啱佢放假,過咗嚟布拉格,我哋一家人就擁有一段好值得紀念嘅回憶。」
當劇集播出後,不少觀眾都把焦點放在他的床上戲——墮機後他在醫院病床上奄奄一息,僅用眼神去跟萱萱演對手戲,被大讚演得有層次。
「我真係估唔到大家嘅注意力,竟然會去咗呢一幕。其實仲有另外一幕,我需要一take過讀五頁紙嘅對白,當中有好多醫學名詞,拍之前導演叫我唔使緊張,咁講法反而無形中俾我更大壓力。」
結果他一take成功,台前幕後即場拍掌致敬。識貨之人,還有觀眾,紛紛在網上留言,指怎麼他只演了頭兩集便死掉,平白浪費了好演員。
(會不會覺得不夠喉?)「現在睇返當然覺得唔夠喉啦,原來咁好玩,不過一切隨緣啦!」
情竇初開飲茅台
好玩的東西,除了拍電視劇,還有跟兩個寶貝女兒首度登台夾band唱歌。
今年8月,他在大馬雲頂開演唱會,鍾懿和鍾幗兩姐妹成為特別嘉賓,三父女同台合唱,溫馨滿載,鍾鎮濤更在台上稱鍾懿是他最棒的得獎作品,可以接他棒,把音樂傳承下去。
「其實我從來冇教過佢唱歌,但佢天生識唱,我知道佢嘅志願係做歌手、拍戲同埋做導演。以前佢成日拍video,會叫我喺斑馬線走過去,然後拍我再行返嚟,好多諗頭。好似去年我喺演唱會跣低,佢就剪咗條片,變成喜劇咁,等我可以帶歡樂俾人。」
當鍾懿越來越大,拍拖次數漸多,鍾鎮濤會化身Uber司機,廿四小時當值。
「有時佢夜晚要同朋友出去飲嘢,我就會話:『總之你幾夜都叫我接你啦!』試過明明我等到瞓着咗,佢打嚟問我瞓未,我即刻答:『梗係未啦!你喺邊?我即刻揸車嚟接你!』即使只有5分鐘車程,我都照去。」
在鍾懿年少時,范姜的姊妹會教她飲茅台,訓練酒量以防被男仔灌醉。「佢覺得好好飲,梗係啦!係15年茅台啊,好貴㗎 !」
鍾鎮濤更會邀請鍾懿的男朋友回家食飯,一起看電視和電影,「去我屋企當然好過去人哋屋企啦,至少我會見到。你唔能夠唔俾佢識男仔, puppy love係必經之路。」
鍾懿這個寶貝女,身在英國讀書時,會習慣開住FaceTime,然後做自己的事,「等我哋望到佢,陪住佢。」最近在范姜生日時,鍾懿寫了一篇文章頌讚范姜,令父母動容:「每當有人說我長得像她,我都會感覺特别驕傲⋯⋯」
鍾鎮濤平日在銀包放的現金,都是隨時準備給鍾懿購物之用,「佢好孝順,明明自己好孤寒,唔捨得使錢,啱啱又買咗支好貴嘅洗手液送俾我,佢經常做啲令我好窩心嘅事。」
長不大的B B
鍾鎮濤說,也有問過15歲的細女鍾幗,將來希望做什麼工作?「我問過佢好多次,佢亦都變過好多個答案,到今日都未揸定主意,不過佢隻耳仔特別靈敏,彈結他又彈到,唔排除會做演藝界嘅可能性。」
除了兩個女兒,鍾鎮濤還有和前妻所生的35歲大仔嘉浚和30歲二女嘉晴,都未成家立室,雖然聚少離多,跟他的關係依然親密。
「嘉浚主要定居上海同美國,不時兩邊飛。佢成日搵我哋相聚,已經開始學識同我爭埋單,大個仔咯!有呢個習慣幾好,哈哈!佢同鍾幗都好鍾意車,成日一齊傾formula one嘅話題。」
「至於嘉晴就長駐北京,做醫美同埋健康食品工作。佢雖然已經30歲,但個樣仍然似18歲,我都仲係叫佢做BB,可能喺爸爸心目中,佢永遠都係咁細個啦!」
活到老,唱到老
作為四孩之父,鍾鎮濤依然腰肢挺拔,完全不像年過七十 ,經常哼歌,活力充沛。
「想個人唔衰老,一定唔可以退休,否則會謝得好快。」他還注重飲食健康,「呢方面千祈唔好慳,食生果就要買最好嘅,買肉類亦咪貪平,寧願買貴啲,食落肚㗎 !
「如果唔開心,唔好借酒澆愁,你有幾多個肝先頂得住呀!我最近喺雲頂個演唱會主題,叫《及時行樂》,總之做啲令自己開心嘅事。以我為例,音樂就會令到我好開心,我會一路唱到唔唱得為止,我個偶像Paul McCartney(83歲)都仲唱緊巡迴啦!萬一好多年後,我真係唱唔到,仲有鍾懿接棒,我咪做佢個演唱會嘉賓囉!」
25歲
訪問尾聲,我請鍾鎮濤致電譚詠麟,分享一下多年兄弟情,誰知鍾鎮濤打開手機的通訊錄,輸入「譚詠麟」或「Alan Tam」後,都沒法搜尋到他的電話號碼。
「咦!點解我會冇阿倫電話嘅?」鍾鎮濤的頭上,掛起黑人問號。
明星的手機,通常會以特別暗號,來代表某個圈中人朋友,以防當手機萬一遺失時,都不會外洩他們的電話號碼。
我多口建議:「你會唔會係用咗『食物焚化爐』或者『25歲』來代表阿倫?」
當他輸入「25」後,手機即彈出「校長25」的電話號碼,「哈!俾你撞中咗,原來我用咗呢個暗號。」不過可能阿倫踢緊波,一直沒有聽電話。
講開踢波,鍾鎮濤大爆阿倫今時今日相當錫身,只會指揮其他隊友衝啊射啊,自己則唔會點跑,享受樂在其中,「因為佢係校長,係領隊呀嘛!」
一場波,或一個人生故事,總能找到一頁頁會心微笑的小確幸。