發佈時間：15:35 2025-09-29
每一個愛情故事，都會有一首只屬於二人世界的主題曲。
鄭子誠說，只要他在電台節目中，播出某一首歌，太太劉倩怡便會知道，這是他隔空傳情的心意。
那首歌，叫《唯獨你是不可取替》，是許志安於1993年推出的情歌。兩年後，鄭子誠和劉倩怡在電台初邂逅，不經意聊起，才知彼此都曾經被歌詞觸動過。
曲中意，打動聽歌的人。拍拖八年，醞釀成一紙婚書。「我哋拍咗一個video，將整個婚禮紀錄低，就係揀咗許志安呢首歌做配樂。」
還有譚詠麟的《半夢半醒》和陳艾玲的《悲秋》，都是劉倩怡說過最喜歡的歌，鄭子誠牢記在心裏，偶爾會出現在電台播歌的清單上，送上驚喜。
「早排佢坐喺書枱忙緊編輯本新書，我從梳化嘅角度望過去，我覺得我從未見過一個咁靚嘅老婆。」
甜言蜜語，由鄭子誠磁性的聲線說出來， 寧舍醉人。當我用鄭子誠的電話致電劉倩怡訪問，她情深地跟老公說：「我愛你！」然後才向我道出對鄭子誠的種種感覺，竟令鄭子誠感動得紅了眼。
62歲男人的淚光，閃出結婚22周年紀念的愛。
曾聽過有許多戀愛
一生中，可以為幾多人唱情歌？曲終，人難免要散。鄭子誠離過婚，育有一子，跟前妻仍有聯絡。
「因為當時自己年輕，對於愛情嘅珍惜度未夠高。加上我係做夜晚節目，而佢係正常嘅上班時間，聚少離多。」
會否在播放失戀情歌時，觸景傷情或者觸歌傷情？
「一定會，不過經一事長一智，喺一個過程裏，最重要係你唔好去怨恨自己曾經做過嘅決定，我喺節目都叫觀眾唔好執着過去嘅遺憾。」鄭子誠慶幸，和前妻是好來好去。
「現在再見亦是朋友，我同個仔每星期都一定會抽時間見一次面，星期六或者星期日我哋會食餐飯，呢個係我希望最少做到嘅嘢！」
當年離婚，他主動跟兒子解釋因由：「我唔係一個好爸爸，未必可以盡到我最好嘅責任，我覺得好抱歉。」時間把父子情扣在一起，沒怨恨，也無疏離，偶爾還會相約打波。
願你終身交託給我
當找到一首刻骨銘心的情歌，便會想唱到天荒地老，只要那個她一直伴在身旁，不離不棄。她，是劉倩怡。
不過在拍拖初期，兩人經常吵架，發生冷戰是家常便飯，只因大家的步伐完全不同。
「佢係一個黑白分明嘅人，我係一個灰色地帶嘅人。佢係一個主動出擊嘅人，而我係一個好悠閒嘅人。你淨係咁聽，就知道我哋嗰種凹凸係點樣，需要用好多時間去磨合、包容同實踐。」
其中一次冷戰，是因為劉倩怡想結婚，鄭子誠不想。「因為我有過一段婚姻，有陰影。佢想結，我又唔嗲唔吊，我哋決定分開一段時間，等大家靜一靜。」
誰知那段「分手」日子，劉倩怡為一個宗教機構飛去阿富汗做監製拍攝節目。「當佢飛咗之後，我發覺到周身唔聚財，就好似手指公，你平時唔會經常用到，但當你切咗佢出嚟之後，得返四隻手指，你又覺得好似有啲遺憾同唔舒服，就係佢離開咗我嘅感覺。」
鄭子誠終於知道劉倩怡的存在，對自己有一定的份量，於是就決定寫信挽留她。「嗰時未有WhatsApp，我用email每日寫封信，講出我心意，仲話當佢返來香港，我哋就結婚，點知佢幾日都冇覆我，我好擔心，後來佢話嗰度網絡差，收得唔好。」
就是怕失去，更加認定大家都願意一起走餘生的路，他們在2003年9月23日，於多倫多的教堂註冊結婚，並有共識不生兒女。
讓我獻出全部熱愛
情人眼裏出西施，在鄭子誠眼中，劉倩怡吸引他的地方，是烈女性格！
「我係一個優柔寡斷嘅男人，而佢就獨來獨往，好果斷、好清晰自己做緊乜嘢事，我見到佢咁飄逸，但我係冇呢啲特質，所以俾佢吸引住。」
可會知劉倩怡情傾鄭子誠，竟是因為：「覺得我型囉，仲有嗰種平易近人嘅感覺。（會唔會你把聲都係吸引之處？）都有啲關係嘅！」
曾幾何時，劉倩怡遇過情緒病的困擾，鄭子誠試過用言語去安慰，卻被她覺得似在做節目。
「現在回想起來，我其實盡量要少說話，因為我都係講啲人生哲理，勸佢唔好呢樣唔好嗰樣，佢唔受呢一套，佢覺得唔係要聽啲勵志說話，反而留喺身邊嘅陪伴同聆聽，等佢知道我永遠都會喺度先至最重要。同埋要試吓用佢個角度去睇件事，要有同理心，我現在仍不斷地學習中。」
這些年來，原來鄭子誠收過不少劉倩怡給他的情信，一直收藏至今，內容是綿綿情話嗎？
「通常係佢表達對我嘅不滿，佢會解釋晒所有原因，一定要我清楚到底發生乜嘢事。而我寫嘅情信，懶係情深款款，全部遊花園唔到肉嗰啲囉！」
女的理性，男的感性，鄭子誠說近年最感動的事，是他的60歲生日，劉倩怡扮作沒安排節目，事前不動聲色，約齊他在圈中的幾個資深好友，又特別邀請了鄭子誠的媽媽、胞妹和兒子，齊集在餐廳貴賓房。當鄭子誠一推開門，見到全部都是生命中最重要的人，驚喜萬分。「我老婆為我做呢件事，我真係感動到喊。」
下半生淮我留住你
訪問尾聲，我請劉倩怡通過電話，講出平日不會對鄭子誠傾訴的心底話。
「我好欣賞佢！咁多年佢都安於現狀，唔會去計較，但係佢一直都好努力去接每一個工作，盡力去做好。反而我有時會有退縮驚慌嘅時候，我就會諗佢真係好叻。
「幾年前我遇上低潮，佢從來冇俾過我壓力，唔會話又使咁多錢去睇醫生，佢永遠唔會令我覺得內疚。反而有時我WhatsApp佢反映一啲事，佢一定會答我：『係我做得唔夠好，我會再努力。』」
此時此刻，鄭子誠感動地聽着，眼框濕潤地告訴我，畢竟他平日不會問：「老婆，你覺得我點樣？」這次電話對談，令他知道老婆的心中所想，也令他有點歉意。
「近年老婆講情話比我多，反而我覺得都老夫老妻啦，有時會奉旨咗。係我做得唔夠好，老婆，我會改進！」
於是在上星期的結婚22周年當天，鄭子誠在社交平台上載了100張兩夫妻合照，並寫下：「22年前今日許下的承諾，永遠有效！ Happy Anniversary ！」
62歲男人的情話，甜如初戀。
立即追蹤《東周刊》全新WhatsApp頻道，緊貼全城熱話、突發猛料、獨家消息！
