發佈時間：13:31 2025-03-07
人生路途總有高低起跌，心態好，就可以喺困境中逆流而上。 喬寶寶正是一個正能量滿滿，每次面對「風高浪急」都視之爲「小風波」的人。
父母不許他自由戀愛，娶港女，他就找到「盲婚啞嫁」的閃光點，拖着父母安排的喬嫂嫂走上人生路。
喬寶寶看得開、放得下，惟獨面對患上罕有病的細仔和 83歲年紀老邁和有腦退化的媽媽，一提即爆喊、淚如雨下！
入行有使命 為南亞裔帶來一點光
於2005年參加《殘酷一叮》，喬寶寶把胸毛剃成TVB的經典造型，邊搞笑邊唱廣東歌的演出，成功出位，他也因此而踏上這星光大道。
喬寶寶：「當日我老婆都真係有認真去商量過係唔係真係要放棄鐵飯碗，跳出個舒適圈而去接受挑戰呢?最後，我覺得我哋南亞裔人真係好少可以做演員，所以我好希望我可以試下，努力去做，話比人知南亞裔人都可以做得到，同埋可以做得好，就係咁，24小時之後，我就向懲教署遞辭職信。」
跳出舒適圈後後，喬寶寶揾到自己的發光點，多年來帶給大家不少歡樂，也為南亞裔帶來一點光。「係嘅，雖然我未去到天王巨星的level，但都好幸運，可以做到首個南亞裔全職演員，哈哈哈，我都參與過好多作品，所以對於當日嘅決定，都係正確。」
面對細仔患罕有病 喬寶寶：只想他活得開心
喬寶寶與印度籍太太Gurinder Kaur Gill於1990年結婚，育有兩子Inderpal和Arvin，大仔於蘇格蘭任職IT工作，娶了老婆，兩年抱兩。
對於大仔已經有家有室有小朋友，喬寶寶笑言已經盡曬老竇責任，可以放工。
至於患有先天性脊椎神經線疾病的細仔Arvin和83歲體弱多病的媽媽，喬寶寶即收起幽默和笑臉，吸了一口氣才說：「細仔一歲嘅時候，就見到佢行動唔係好好，之後我帶佢睇咗好多醫生做咗好多檢查，去到小學一年班，發現佢係有過度活躍症，佢唔可以讀正常學校，要去特殊學校讀書，老婆好唔開心，日日以淚洗臉，所以我哋就送佢去蘇格蘭生活，因為走路比常人需花多3倍力氣，每隔兩至三星期要注射肉毒桿菌素（Botox）來放鬆筋肌，佢喺嗰邊出世，喺當地醫療上，我哋唔使咁大負擔，同埋空間較大，對佢活動同成長會好好多。」
喬寶寶細仔的健康問題，使喬嫂嫂流下不少淚水，身為爸爸的喬寶寶無奈但得接受上天的安排。既然沒有能力改變，就得轉個心態去面對。「我個仔個病係好罕有嘅，全球患者唔夠五百人，叫做KIF1A，屬於痙攣的一種，嚴重啲係只有五至七年命，佢未去到好嚴重，我哋都想佢喺有生之年，可以過得舒舒服服。」
不能接受媽媽流一滴淚
對於細仔的情況，喬寶寶早已接受並做好安排，然而面對着83歲年紀老邁和有腦退化的媽媽，他似乎未能接受，一觸即爆喊。「我真係好愛我父母，以前娶老婆，佢哋唔鍾意我娶香港女仔，我接受唔到佢哋流一滴眼淚，所以就聽佢哋話娶喬嫂嫂。」
「我媽呢家係連屋企廁所喺邊度都唔認得，好彩仲認得我，所以我好珍惜同佢相處嘅每一刻，為咗媽媽，我呢幾年推咗好多Job，錢銀點重要，都不夠媽媽同我嘅家人咁重要，所以見得幾耐得幾耐。」
