發佈時間：17:18 2024-06-07
「全港創意公關大賽2024」日前在香港城市大學舉行，並邀請到扮嘢高手黃建東擔任嘉賓。他由參選香港先生至最近於《福祿壽訓練學院》演「一人AVANTGARDEY」，他都稱創意最緊要，更分享心得說：「要諗啲天馬行空嘅Idea，總之諗一個冇人聽過嘅，你就贏！」而林峯、張敬軒、鄧麗欣和倪晨曦等均拍片鼓勵參賽學生，十分支持這次學界比賽。
延伸閱讀：黃建東試食洞鈜法師至愛沙嗲烤肉
戲劇系高材生
42歲的黃建東，是紐約州立大學佛東尼亞分校戲劇系學士，並以高級榮譽畢業。他不但是位高材生，更是「比賽控」：「其實我係一個好鍾意參加比賽嘅人，我參加過新秀歌唱比賽，又因為參加《香港先生選舉》而入行，至於參加《全能司儀大賽》，就令我做咗台慶司儀，最近參加《福祿壽訓練學院》，令我走出一條新路，所以我鼓勵各位同學仔，要把握機遇參加比賽。如果輸咗都唔緊要，可以知道自己仲欠啲咩，贏咗又知道自己有咩優勝之處，多參加比賽係為咗知己知彼。」
度橋奪才藝獎
他憶述2011年參加《香港先生選舉》時，因為自覺不夠靚仔，又唔夠大隻，他笑言：「首先最佳體態獎、最上鏡先生獎，應該冇我份。而我係讀戲劇出身，以前做過幾年話劇，所以我想設計一個表演可以令我奪得才藝獎，結果我攞咗演藝潛能大獎同地區公投Pose王獎！」
創意帶來回報
黃建東對演藝充滿熱誠，在扮演多個搞笑角色中，最令人印象深刻的相信是Piko太郎《PPAP》和「一人AVANTGARDEY」。他坦言：「2016年喺日本有條好Hit嘅片叫《PPAP》，內容為「I have a pen, I have a apple, Apple pen」，席捲香港同東南亞，我見好多Artist開始翻拍呢條片，於是我又翻拍，我仲加入創意，將佢變成粵語諧音如「gun chi ma= chi ma gun（芝麻gun）」和「pork lego guy」。他用了一天時間拍這條片，結果出街後10小時，已有過百萬瀏覽人次，之後工作接踵而來，包括：做司儀、唱歌、登台、拍廣告及電影等，他直言是創意帶給他的回報。他自爆就連蔡卓妍（阿Sa）都鍾意看他拍的片，令他滿心歡喜！
參賽走得更遠
曾有人批評他「降低身段」參加《福祿壽訓練學院》與素人爭獎，他豁達回應：「我鍾意扮鬼扮馬，既然TVB有呢個比賽，我好想活在當下捉緊呢個機會，睇下參加呢個比賽可以帶我去到邊個位，而今次比賽所有配套都係我一手包辦。有次好多人扮四大天王，我就諗不如扮近年好Hit嘅AVANTGARDEY，男扮女再加上騎呢舞步，視覺上一定好好睇，估唔到3位評判王祖藍、阮兆祥同李思捷評價咁高，我仲被選為嗰集嘅Top Student。」
天馬行空就贏
黃建東坦言：「朋友話我除咗做藝人，其實都好適合做公關，因為我嘅交際能力、人脈同處事方法都唔錯，而創意係最緊要。」他更寄語參賽學生：「記熟比賽框架，因每個比賽都有佢嘅規則，然後搵出無限嘅可能性，包括天馬行空嘅Idea，要令人估唔到嘅；由於公關要推廣產品，知道客戶想要啲咩，建構一個Idea係客戶冇聽過嘅，你就贏！切勿留喺舒適圈裏度橋，而且創意係要令人記得，唔使太複雜，例如諗下最近有咩大眾嘅話題，或者係Hit嘅人物，諗到後，要試試身邊家人或朋友嘅反應。記住要相信自己，把握比賽嘅機遇！」
群星拍片網址：https://www.instagram.com/hkcprc
