發佈時間：14:26 2026-10-21
這間位於西貢、樓高3層的海鮮酒家，早已憑藉絕頂廚藝，連續17年斬獲米芝蓮1星的榮譽；加上，酒家私隱度極高，故許多明星、名流都揀選這裏作為私房食堂。
去年，胡楓（修哥）慶祝93歲大壽，就特意包下了一樓全層擺壽宴，邀請親朋好友歡聚一堂；而平日前來光顧的貴客更是不計其數，包括：陳百祥、方力申等，星光熠熠。
店名由來
這間深受星光加持的菜館，於2006年正式開業，憑藉新鮮的海產及獨特的烹調手法，自2010年開始已連續17載獲選為米芝蓮的一星餐廳，可謂香港飲食界的傳奇。提到入行的經過，老闆陳志偉憶述：「我自己做咗三十幾年，喺澳洲入行，嗰時讀書半工讀，喺啲中餐廳入邊做下廚房同洗碗幫手，開始半隻腳踏咗入飲食業啦。」
回港後，陳志偉與一班夥計原於清水灣一間酒樓共事，2005年結業時，當時的老闆六哥與福哥於2006年買下西貢現址，鼓勵昔日夥計自己搞生意，甚至豪言有錢才分帳、沒錢不用交租。陳志偉感激的說：「呢度喺西貢開咗20年，當年舊老闆非常好，舊食肆租約期滿結束後，老闆覺得呢班舊夥計做得幾好，不如買個物業畀啲細路玩下，同事們覺得老闆咁好，個招牌就歸番畀佢哋，一個叫阿六哥，一個叫阿福哥，咁就變咗『六福菜館』。」
人手充沛
這種「零壓力」的營運模式，換來了各方面的穩定性，譬如：廚房人手充沛，令人人專心做好手藝，連外面大酒樓做的大菜，好似新鮮豬肉生炒骨；每日以數款海魚熬湯底等，這裏都能完美呈現。2010年，米芝蓮榮譽突如其來，陳志偉坦言：「2010年嗰粒星係從天而降，跟住連續17年都攞到！其實當年好朦朧，因為嗰時米芝蓮評審嘅標準大家都唔識，不過可能評審或者客人覺得好好食就推薦，一攞咗之後，就更加要加強品質控制同提升服務標準，好彩都keep到17年。」
酒家只有約一百個座位，雖然客似雲來，但陳志偉認為座位太多會難於管理。至於菜式則融合了漁民海鮮原味與客家山珍風情，因為創辦人福哥一家是漁民，所以菜單保留着艇仔飯與海鹽蒸魚；而廚師團隊則是客家人，北菇燜雞腳與客家炆腩仔樣樣拿手。
明星喜好
陳志偉又笑言：「最熱鬧嗰次就係胡楓喺度擺生日宴，仲有阿叻哥（陳百祥）嚟得好頻繁，佢好畀面，覺得嘢食得吓，有時仲會幫手拍下影片。」除了修哥與阿叻，張智霖、蘇志威、蔡一智、方力申、陳煒、黎芷珊、張景淳、陳曉華等，都是座上客。在諸多招牌菜中，一眾明星也各有偏愛。
黎芷珊最愛每天以4、5款雜魚熬足4小時，再加入野生東星斑蓉與蛋白製作而成的「金湯魚蓉羹」，陳志偉透露：「張景淳好鍾意食呢度嘅『椒鹽奇趣豆腐』，皮脆裏邊好滑，佢一個人都可以食一碟。」而鎮店之寶「椒鹽焗大連鮮鮑魚」，選用5頭大連鮑，以溫水慢慢浸煮令肉質鬆弛再蒸炸，口感絕非一般食肆可比，他表示：「可能十幾年前做嘅地方唔多，攞咗米芝蓮唔多唔少都係因為呢個『椒鹽鮑魚』，幫手打起名堂，陳煒嚟食過都專登幫手拍過一段短片介紹，呢幾年都keep住嚟食。」至於陳曉華最欣賞「豉油王炒龍蝦球」，食完後還會要求用龍蝦汁配合芝士製作煲仔炒飯，而叻哥陳百祥則對鑊氣十足的「蟶子炒米粉」讚不絕口。
面臨考驗
歲月流轉，西貢海鮮街的市道大不如前，通關後不少港人選擇北上或外遊，加上內地旅客消費模式轉變，酒家生意面臨考驗，而總廚等靈魂人物年事已高，廚藝傳承亦是一大課題。然而，陳志偉依然堅守着對食材品質與味道的承諾：「我哋最主要用個味道，要求食物嘅原味同埋鮮味，師傅用最簡單、最原始、最傳統嘅方法去烹調，儘量唔好遮住海鮮本身個鮮味。炒海鮮最緊要唔好過熟，我哋嘅師傅呢樣技巧掌握得很好，所以好多客翻頭再翻頭，我哋又唔係咩大集團，只不過用個心去服務啲客，啲客就覺得好滿意！」
展望未來，陳志偉透露未來會嘗試打入大灣區，探索在內地發展的可能性，繼續將這份獨特的香港美味傳承下去。
