發佈時間：16:44 2026-08-27
在香港飲食界的輝煌歲月中，鮑參翅肚是不可缺少的。這間屹立不倒三十載、享負盛名的鮑魚專門店，創辦人翁仰光（阿翁），憑着對食材「零添加、講求新鮮原味」的極致堅持，成功打造出名揚海內外的米芝蓮星級食店，更成為一眾明星與政商名流的私房飯堂。
視帝黎耀祥由於經常幫襯，久而久之與阿翁建立了深厚的情誼，更變成了好朋友，兩家人私底下還會一齊去旅行。至於一代「性感女神」葉子楣，更曾入股澳門的「富豪酒家」，對阿翁投下信心的一票！
白手興家
人稱阿翁的翁仰光原籍潮州，年少時帶着對未來的憧憬來到香港。當年剛抵港的艱苦歲月，他刻骨銘心：「我嚟香港嘅第一份工，就係喺鋼鐵廠做咕喱，嗰時20歲。因為唔包食住，一個月得700蚊人工，當時租個床位300蚊，攞280蚊返鄉下，剩番120蚊，所以經常食唔飽。」
為了改變命運，阿翁開始留意報紙招募，最終成功踏入飲食業，「我不停換工，見到報紙話呢個係『明星機構招人』，我就去應徵，咁就入咗『北京樓』。」進入飲食業後，他由基層一步步努力奮鬥，「初初入去係做侍應，捱咗差唔多一年半，識咗好多熟客，其中有一班『富萬年』嘅高層，佢哋覺得我幾好，問我有冇興趣去佢哋嗰度做嘢？結果加幾百蚊人工就去做。」憑着親切待客與勤奮好學，他隨後迎來更多轉機：「做咗幾個月之後，就遇到『富臨飯店』嘅經理，我跟住入咗佢哋酒樓做樓面，一年幾之後，就做咗部長。」
在「富臨」期間，阿翁積累了深厚的人脈與管理技巧：「喺北京發展嘅老細金董事，1990年話想喺北京開一間『阿一鮑魚』，我就去咗北京幫佢開業兼做埋佢哋嘅執行總裁，其後喺北京、上海、新加坡再開。」到了1996年，阿翁創立自己的「富豪酒家」；然而，開業不久即遇上1997年亞洲金融風暴，「96年開張，之後97年就金融風暴，嗰時啲生意，原本一個月做280萬，只係得番180萬，即係少了一截。」他靠靈活策略，總算度過難關。
捱過難關
捱過了金融風暴，2003年又到沙士疫情，跟着便否極泰來，阿翁分享說：「沙士嗰時啲人唔敢出嚟食，於是我就推出680蚊嘅超級特惠套餐，慢慢做，就咁樣度過沙士個難關。之後，好彩有自由行，我哋立即推出平價名貴嘅套餐搶客。」並成功建立自己的品牌。
「富豪酒家」能夠屹立三十年，核心全在於阿翁對食材「零添加、講求新鮮原味」的極致堅持。這份對品質的執着，不僅贏得口碑，更吸引一眾星級食客將這裏當成飯堂。阿翁表示，鄭伊健一直以來都是他的忠實擁𧄌，經常帶着家人前來聚餐，並對招牌點心愛不釋手，「鄭伊健好鍾意帶埋屋企人過嚟食，特別係灌湯魚翅餃；另外，糯米雞一般佢會食兩隻，打包兩隻。」
深厚交情
此外，視帝黎耀祥因為經常幫襯，久而久之與待人以誠的阿翁，建立了深厚的情誼，成為好朋友，兩家人私下還會一齊去旅行。至於幫襯了約20年的羅家英，近年因為患上重病，對日常飲食要求極為嚴格；而這裏完全零添加的健康菜式，正好讓他食得安心，所以經常結伴老婆汪明荃來撐枱腳。
至於一代「性感女神」葉子楣，與阿翁的淵源極深。當年，她因為男朋友呂錫照醫生的哥哥，而與阿翁認識；相熟之後，她還入股澳門的「富豪酒家」，另兩人又曾經一齊在香港及澳門開日本料理餐廳。至今葉子楣仍然經常幫襯這間酒家，無論是生日宴會或大節日聚會，她與一班親朋好友都會在此盡興。
從當年揮灑汗水的運輸苦力，到今天享譽中外的鮑魚大師，阿翁用三十年的堅持，證明了只要用心做好一件事，以真誠待人、以品質立足，就能在風雲變幻的飲食界中，寫下屬於自己的傳奇篇章。
