發佈時間：14:40 2026-04-17
22歲已開始參選港姐的陳美濤（Tomato），屢敗屢戰，終於在2024年以29歲之齡，勇奪亞姐三料冠軍，吐氣揚眉！Tomato表示，兒時已有這個選美夢，故誓要奪得后冠才心息；而篤信風水的她說：「選咗咁多年都唔得，我於是試吓喺屋企擺個強勁啲嘅風水陣，希望助旺自己，結果選亞姐贏咗，又入咗福布斯，呢個風水陣真係好勁！」
因為家人從事中港運輸業，所以Tomato自小就與父母在上水居住，這裏兩房、兩廳，面積約1,200呎，空氣清新兼景色怡人。甫進她的香閨，最震撼的必定是在客廳旁邊的「飛魚躍動」風水陣；此外，為了助旺Tomato的事業，風水師更將她的后冠及彩帶放在陣上面，好讓她飛黃騰達。
圓后冠夢
現年30歲的陳美濤（Tomato），8歲已開始發選美夢，並且誓要戴上后冠才心息。22歲時，她首次報名參加香港小姐競選，但只進入複試階段。死心不息的她，3年後捲土重來，但依然未能入圍。
2020年，25歲的Tomato決定轉玩另一條賽道，參選沒有年齡限制的亞洲小姐，可是連續兩年參選亞姐都落敗。屢敗屢戰的她，之後又參加Miss Grand International（萬國小姐）國際選美，結果還是未能獲得名次。然而，她不到黃河心不死，2024年以29歲之齡，第3度參選亞姐，今趟終於吐氣揚眉摘冠，並獲得親善大使及最佳口才獎。
Tomato笑言：「選美係我自細嘅夢想，好細個我就同媽咪講，我見到電視啲姐姐行嚟行去，我要好似佢哋咁。媽咪起初都唔知我想做乜嘢，其實我就係好想攞一個后冠。我呢個人係想做嗰樣嘢，就一定要達到目標，所以我好有決心，參加完一次又一次比賽。但係參加咗咁多次都唔得，之後俾我認識咗保師傅，佢幫好多明星擺陣㗎；跟住，佢就幫我擺咗一個『飛魚躍動』陣。呢個風水陣好勁啊！擺完之後，我唔止攞冠軍，仲要係一攞就攞3個獎添。」
在選美場上身經百戰的Tomato 直言，從來都沒有任何潛規則及黑幕發生在自己的身上，她憶說：「記得有一年有一間外判公司嘅負責人，負責嗰個選美項目，佢因為一啲錯失，就俾人革走。事後，其他選美嘅佳麗就喺度紛紛討論佢，話呢個負責人，需要有一啲潛規則先會有獎攞，又曾經試過俾佢摸。我聽到之後都覺得好驚訝，唔知點解咁多年我都冇試過俾人潛規則，可能啲人覺得我係讀書人，唔會做呢啲潛規則，我記得嗰個負責人淨係叫我俾心機啲讀書，哈哈！」
甫走進Tomato兩房兩廳、1,200呎的香閨，屋內沒有可愛的布置，亦沒有富麗的裝潢，而是充滿書卷味。自小受爸爸薰陶，她也愛上了中國歷史，終日就拿着歷史書日睇夜睇；而擁有一目十行能力的她，最高紀錄是一日可以看完三本書。前年，Tomato更獲得香港大學中國歷史系博士學位，成為香港選美史上最高學歷的冠軍，她開心的說：「有好多人問我點解選美之後唔入娛樂圈，我唔係唔入娛樂圈，只不過係娛樂圈太多靚仔、靚女，我唔夠人爭。我想用學歷取勝，我已經出咗12本著作，寫咗一啲好有趣味性同歷史相關嘅書，都賣得幾好㗎！」
告別上水
去年，Tomato就以香港作家身份，入選福布斯的「亞洲30位30歲以下精英榜」及「全港時尚專業女性」。不過入選福布斯，並非Tomato的終點站，她最想憑着自己對文化界的貢獻而成為傑青：「提名我選美嗰個係傑青委員會嘅前主席，我都希望好似佢咁樣為社會作出貢獻，嚟緊我會不停出書，我希望能夠以唔同、有趣嘅角度，俾大家知道更多歷史。」其實，她最嚮往可以做文化界最靚女的一個。
原本，Tomato的父母在大圍的一個新樓盤，購入了一個單位，只可惜因建築結構出現問題，而要拆卸重建，遲了兩年才收樓，她表示十分期待可以搬入新屋：「平時爸爸、媽媽都因為有揸車，所以佢哋出入好方便，而我唔識揸車，所以住上水對我嚟講有啲遠。我細細個就喺上水居住，小學一年班就搬入呢間屋，因為我屋企做中、港運輸，為咗方便屋企人就住喺呢一區。好彩，我之前10年大學生涯都係住宿舍，畢咗業先搬番嚟，住喺呢度想食個餐蛋麵，都要坐車出去市中心先食到，收咗樓搬去大圍住，我哋就可以好方便啦！」屆時，Tomato都係時候要擺番一個覓得如意郎君的風水陣嘞。
