發佈時間：13:26 2026-01-08
人到中年，有人選擇在職場上繼續衝，有人選擇提早退休享受生活，有人參加《中年好聲音》追尋人生路上未完的夢。有白花油王子之稱的顏福偉，踏入中年後，卻選擇將原本營營役役和五光十色的生活模式，逐項剔除，實行源頭減廢，令生活更有質素。當下他更想做就做，早前為《中年好聲音4》擔任新馬區海選評判後，即興去韓國學唱歌，精進歌藝技巧；即使得weekend短短2、3日假期，他也來個快閃歐遊，享受獨遊樂趣；他又會透過禪修和量子物理學，去保持心境平靜。疫情時患過抑鬱，康復後的他，更懂珍惜活在當下的好光陰。「要識選擇自己的生活，開心唔止係短暫嘅享受，最緊要識揀。」
韓國學唱歌
顏福偉早前為《中年好聲音4》新馬區海選評判，並到馬來西亞參與選拔入圍參賽者，「公司同事話TVB想搵我做《中年好聲音4》新馬區評判，我見咁啱嗰個weekend有時間就飛過去。自己唱咗咁多年歌，大概都知參賽者嘅音準同拍子啱唔啱，有啲參賽者唱得好穩陣，但講唔到故事。」
他說看了數百位參賽者，好enjoy，因為看見別人不足，同時亦看到自己的不足，「雖然唱咗30幾年歌，但有啲歌自己都未必唱得好，所以返嚟冇耐，我就喺網上搵咗幾個英國和韓國嘅歌唱老師資料參考，想進修吓音樂，最終搵到個喺首爾嘅韓國老師book咗2堂，早前就飛過去體驗吓K-Pop同R&B唱法，學啲新嘢。」
65歲的顏福偉笑言，時下不少中年人鍾意追夢，但他就覺得到這個年紀，需要學識慢活，「我哋嗰輩好多人前半生都努力工作，建立家庭。因為睇住小朋友大，憂心幾十年，好多家長都冇咗自己，但我覺得人一定要有生活，而唔係只係生存。」
他笑言年前已開始啟動「減法生活」，「以前有去行山，但膝頭退化，就改去游水。以往去游水游2500米，𠵱家擔心體力負擔唔到減到1900米；唱歌高音去唔到，咪降key唱保養吓聲帶！此外，生活上面各方面都減，無謂約會唔去，toxic嘅朋友遠離，唔係對自己有益，包括飲飲食食，都減得就減，因為到咗呢個年紀，生活上每加一樣嘢都係壓力。有次見醫生，佢問我係咪食好多維化命丸，我話有，佢話呢啲咪壓力囉，食少一粒好似做少咗樣功課咁，周身唔自在。」
禪修量子學
他心態改變，源於五年前一場世紀疫情，「那段時間，原本嘅生活習慣翻天覆地改變，冇得游水，冇得出埠，好似乜都冇晒，成個人冇晒動力，唔想食嘢，突然間暴瘦，繼而患上抑鬱，睇咗一段時間心理醫生。到2022下半年，我去咗台灣生活半年，雖然嗰邊都封區，但其他生活相對鬆動。我早上7點出去踏單車，之後去食餐，跟住游水、打坐，再同公司視像開會，做到夜晚，食完飯有時一個人去睇恐怖片，一個人睇真係好驚㗎！哈哈！就咁過咗6個月嘅solo生活。」
過去多年，他稱禪修令他情緒變得平穩，「焦慮、抑鬱、Hyper我都試過晒，人生原本就係起起落落，40幾歲一日唱幾場騷，現場歌迷令我多巴胺上升，完騷後返到屋企仍然興奮到瞓唔到，有人要靠飲酒、食藥，我就唔使，靠禪修來穩定情緒，𠵱家做完評判好興奮，但返到酒店已經可以靜落嚟。
「我94年開始打坐禪修，到2015和2016年更到緬甸出家2次，不過做完和尚，返到現實世界，好快又會忘記Simple life，繼續享受日子。」
除了憚修，近年他又接觸量子物理學，更跟師父學習，「師父Ajahn Brahm喺澳洲有寺廟，佢本身係英國人，喺泰國出家。佢教我常存kindness嘅心，能量係有個wave，成日懷住抱怨心，覺得運氣差，會令自己磁場都唔好。師父好科學，唔迷信，佢教我慈愛心係最好嘅武器，energy可以化解好多事情，做嘢順啲。好似我同同事有時拗撬，我會同佢講，我會擺和諧喺第一位，如果佢覺得佢方案好，用佢嗰套。自己條氣唔順㗎，但我爭取落去，成件事嘅推進會變得唔順。」
快閃自遊行
現在顏福偉除了着手籌備公司2027年的100周年紀念，又着眼內地巿場的每年業績如何保持穩定增長。而每天放工，他亦例必去探望80多歲的母親。到假期，他則喜歡外遊，那怕只有3、2日時間，他都會出埠鬆一鬆。
「今年6月，見積分換到機票，我快閃西班牙2晚，又去咗1晚德國。其中喺西班牙距離巴塞隆拿半小時車程的小鎮Stiges，雖然只係喺酒店食嘢，對住陽光與海灘，攤唞咗2日，但去到咁遠心情就係唔同。
「之後再去德國Mainz，撞正嗰日係當地夏天日照最長時間，四圍都係街頭表演、好多小食攤檔，同有人唱歌，好似開Party咁。」
每當有連假或長假，他會離港更長時間，「歐盟27國我去咗25個，東南西北歐想去就去，日本我就去咗超過200次。不過喺歐洲試過俾人打荷包，𠵱家每次只帶100歐元出街，使晒就返酒店。」
每次外遊，他更愛在當地找地方唱歌，「台灣有間piano bar，琴師係一位69歲的香港人，好多廣東歌都識彈。即使去到馬耳他、愛莎尼亞及芬蘭等歐洲國家，只要有卡拉OK，我都一定去唱歌。」
眾多國家中，他最愛在日本酒吧唱K，「東京、沖繩啲卡拉OK bar都有觀眾，因為好多廣東歌都改編自日本歌，好似〈藍雨〉即係〈Rainy Blue〉，所以即使我唱廣東歌，佢哋會好enjoy咁聽。總之現在抱着感恩心態生活，嚟緊目標係減多啲，令自己生活得更平穩。」
《東周網》訪談系列節目《星桄伴我心》1月重磅嘉賓：
即睇：龔慈恩激罕剖白2次離婚傷痕：「我冇恨之入骨！」│25歲女兒林愷鈴閨房私密│點評佘詩曼、黃宗澤、王敏奕
立即追蹤《東周刊》全新WhatsApp頻道，緊貼全城熱話、突發猛料、獨家消息！
