發佈時間：18:52 2025-09-01
行走於虛擬世界，本來就可以天馬行空，加上近年蓆捲全球的AI狂熱，任何事做起來都變得新奇好玩，最近連明星都要注入AI元素。前周秀娜經理人、GME環球狂熱的老闆鄺君賢（Roy），近日亦食住熱潮，以AI科技結合粉絲數據，將32歲的前日本AV女優上原亞衣，還原其22歲最顛峰時期狀態，變身AI上原（ai-ue）虛擬偶像再出道。
Roy在娛樂圈行走27年，於英皇盛世時代入行；自組公司後又創造𡃁模潮流，一手捧紅周秀娜。現在更搶先炮製AI虛擬偶像，他的眼光和步伐總是走得比人前，「𠵱家所做的一切，都係源於過去近30年喺呢個行業的經驗，同埋我所看見並會發生的未來。我會形容自己是一個偶像建築師，是一個Imagineer，將構想實現，我會用『AI上原』向全世界展示香港娛樂文化的無限潛力，推動亞洲娛樂走向世界舞台的最前線。」
AV女優變歌手
這天拍照，Roy刻意預留位置給其「partner」，「揀好相，我返公司用AI就將上原放埋喺相入面，要佢咩造型，咩表情都得。」
Roy口中的「上原」，是日本AV界，被譽為「暗黑潮吹女王」的上原亞衣，她自19歲出道後，迅速走紅，曾在2013年AV女優銷隻排行榜第一名，2014年獲得最優秀女優賞白金獎，推出過寫真集、參與電視、電影、遊戲等演出。2016年離開AV界後，她積極創新轉型進軍商界，及成為Youtube、Tiktok上的人氣網紅，累積了數百萬粉絲及超過2億播放率。
Roy看中她的fans base，早前洽談購入其肖像IP（知識產權），再將其打造成虛擬偶像歌手再出道。「因為打造一個全新偶像，只係由零到一，那段時間已經好漫長，而我一直相信未來IP係會好值錢，所以好想搵啲已有固定粉絲群的偶像IP去實踐呢件事。咁啱以前認識一班專攻日本藝能界的製作人，向我推薦上原亞衣，因為多年前她退出AV界後，仍然好aggressive，除了從商，又保持跟粉絲互動，在社交平台的粉絲數量過百萬，人氣極高。
「2023年AI熱潮之初，她已出了第一本AI寫真，雖然製作技術和質素比較粗糙，但極具前瞻性。而跟她初步接觸後，她完全明白我想做乜，最重要係大家都覺得成件事係work的，所以就一拍即合。」
至於為何要用偶像歌手去包裝AV女優，Roy說：「因為我覺得音樂巿場一向需求很大，隨着Spotify、Apple Music和Tido等大型音樂平台發展迅速，你會睇到現在的世界音樂潮流，係可以令一個創作者、一間專心做音樂的公司賺錢，舉例韓國Blackpink成員Rose的〈APT.〉，十四天串流平台的收入是一千萬美金，這件事喺以前的世界，我相信係冇人會預計同理解到。歐美市場好早期已掌握到，近年連韓國市場都掌握到，我覺得冇理由香港咁多相關人才會做唔到，而我睇見今天的音樂世界，是過去一百年來，最好的發展機遇。」
客製「特別服務」
始終上原亞衣是著名的AV女優，故Roy亦想在AI上原身上，加入一些AV元素，「AV係日本一個歷史好悠長嘅行業，等同香港功夫片一樣咁有份量，我會看成係另類功夫片。每個AV女優嘅fans Base都好大，雖然年年都好多新人湧現，但數據睇到最高ranking，通常都唔係新片、新人，而係儲落大班粉絲的退役女優，上原就係其中之一。今次做AI上原，我當係文化保育㗎，哈哈！」
Roy強調其創造的AI偶像，優勢是能夠全天候陪伴，玩法亦多元化，「粉絲可以透過app將AI上原放入手機、平板電腦，或擁有高科技器材，立體投射出來，24小時隨時隨地都能見到偶像，既可以同佢傾偈，玩遊戲，又可以要求佢以任何造型出現，甚至有啲劇情可以一齊發生。而透過手機充值，更可同偶像有更深層次嘅互動。」
他又啟動Aidol Merch 眾籌偶像共創計畫，邀請粉絲一同參與研發產品，打破以往單向偶像的經營模式，為粉絲提供共創、共感、共鳴的新體驗。而上原亞衣對於這個項目亦十分積極，Roy續說：「上原同我哋開會前，她親自在網上向粉絲收集意見，問他們最想跟AI上原有甚麼互動，而粉絲大多亦積極回覆，部分更希望可以同AI上原關係close啲，甚至將上原早年的AV經典場面加入成為場景之一。呢啲建議令我哋做出嚟嘅AI偶像，更接近粉絲嘅期待，粉絲提出的特別要求，我哋都會盡量在程式做出來，甚至可以為個別粉絲客製想要的場景，俾到最大的滿足感。」
捧紅周秀娜
在娛樂圈打滾27年，Roy在不同機構都能發揮出其造星的能力，早年在TVB工作3年後便加入英皇娛樂，協助將謝霆鋒、容祖兒、Twins和Boyz等打造成人氣偶像。
「在英皇工作8年，真係好幸運，做咩項目都好順利。當時英皇盛世，最好、最有潛力的新人，都喺晒公司入面。當中霆鋒係我覺得最獨一無二，他好清晰自己條路點行，有時跟他傾咗一啲嘢，我自己都未消化晒，他就已經明白，並一步步實踐出嚟。他一出世就注定做明星；而祖兒就好勤力，性格倔強，唔認輸，係冇港姐咁靚女，但亦唔會輸俾任何人，她是那個時代的代表女性；而Twins就要做到3歲到70歲都鍾意，最開心係見到個個都好成功。」
08年他離開英皇，自組公司並創造了𡃁模世代，先後為新八模和周秀娜（Chrissie）出寫真，而周秀娜在書展出攬枕後人氣急升，更成旗下皇牌，「𡃁模其實唔係全新概念，只係將日本藝能界女新人成為偶像前，必影水着條橋，照搬嚟香港。隨着少女Model掘起，同期還有Janice Man和Angelababy等，當時我嘅策略係用最短時間，將Chrissie推上主流，之後拍咗旦哥幾部戲，一路推到佢拍《29+1》角逐埋金像獎最佳女主角，上到高峰。」
其後二人因錢銀瓜葛幾乎要對簿公堂，Roy說：「同每個藝人合作係緣份，緣份盡了關係就完結，不過我亦開心她成為了主流女演員，亦得到要她想要嘅嘢，我作為觀眾，亦會期待她未來的作品。」
近年Roy涉足電競行業，今年回歸娛樂圈打造AI偶像，他稱自己不能稱為造星高手，但可說是偶像建築師，「好有信心將AI偶由香港帶去全世界，我亦會全情投入去創作音樂同作詞，做更多影響全球嘅音樂作品娛樂大家。」
《東周網》訪談系列節目《星桄伴我心》8月重磅嘉賓：
即睇：譚輝智親解拉姑寵愛之謎 爆喊陪最愛開刀「望住手術室盞燈，我真係好驚！」
即睇：楊思琦破天荒講跳水前度吳帥：「好多人話我貪慕虛榮！」 親揭神秘老公底細 收$1200傾偈5分鐘解謎 與13歲女兒獨家真情對話
即睇：譚俊彥大爆與李佳芯電話傾心事內容│太太放棄演藝事業下嫁│親解爸爸狄龍與姜大衛不和謎團
