發佈時間：13:00 2025-07-09
參選2021年度香港小姐入行的關楓馨（Fabienne），因樣靚身材好，而被網民封為「最索星二代」，入行4年，機會不絕。Fabienne表示，最開心就是與偶像佘詩曼合作拍新劇《正義女神》，她興奮的說：「我知道可以同阿佘合作，第一時間就返屋企同爸爸、媽媽講，不過真係好大壓力，喺劇裏面我係做阿佘嘅書記，所以有好多同場機會，為咗唔好失禮，我事前做咗好多功夫，例如去法庭旁聽、搵律師朋友傾偈，好彩一齊拍嘅時候，阿佘好nice，教我好多嘢，令到我個心都定啲。」
爸爸關禮傑教拍劇竅門
Fabienne透露，入行以來，爸爸關禮傑確實教了她不少拍劇的竅門：「爸爸話去到片場，第一件事就係要沉澱自己，唔好撳電話，熟讀劇本係最基本嘅，要全程投入，穩定情緒，感受吓劇本裏面嘅每一句對白，佢作為一個咁專業嘅演員，當然唔想佢個女失禮啦！」
若情投意合不介意閃婚
鬼妹仔性格的Fabienne，選港姐時就承認有一個拍拖7年嘅外籍男友Kris，可惜因長時間分隔兩地，令戀情無疾而終；其後，她又被爆出與排舞老師劉興健拍拖，但早前已分手。對於感情事，她坦言：「到咗我呢個年紀，我都想自己嘅感情順其自然，我覺得最緊要係對方心地好，我哋嘅價值觀一樣，如果真係情投意合，我唔介意閃婚，不過重點梗係要俾爸爸、媽媽過目先啦！」一切以父母行先，果然係孝順女。
Profile
姓名：關楓馨
英文名：Fabienne Kwan
年齡：30歲
三圍：33”24”34.5”
身高：162cm
入行：參選2021年度香港小姐
學歷：教育大學學位、南安普頓大學兒童權益碩士學位、倫敦大學學院等。
藝歷：劇集：《你好，我的大夫》、《飛常日誌》、《再見•枕邊人》、《黑色月光》 等；綜藝節目：《飲茶》、《家常便飯爭霸戰》、《玩轉深中懶人包》等。
延伸內容：關楓馨三角情緣 冼靖峰狂追 孖「欖球男神」煲煙談心
延伸內容：搣甩紋身漢 直擊關楓馨被型男狂媾
《東周網》訪談系列節目《星桄伴我心》7月重磅嘉賓：
即睇：馬國明揭媽媽與張國榮秘密關係 認扮過曱甴陪襯黃子華 爆2千個短訊追求老婆湯洛雯 激罕示愛：希望下一世都一齊
