發佈時間：15:13 2025-10-19
昨日（10月18日）有一班在深圳東門遊玩的香港青年在threads發帖，指在街頭發現一箱貓BB，急問網友可以怎樣處理？從發帖人的影片可見，紙箱內有六隻約一至兩個月大的貓BB，牠們的眼睛腫脹及流眼水，明顯是患病，發帖青年心急如焚，但當下有不知如何拯救？慶幸有不少網民幫忙聯繫到由住在深圳的港人Kathy成立的「梧桐山動物救助隊」進行拯救，最終貓BB由這班善心香港青年送到深圳的獸醫診所，並籌集了$1000作為貓BB的治療費用，後續則由梧桐山動物救助隊處理。
行街經過發現紙箱貓B
事件發生在昨日傍晚，港人cecilia在深圳東門街頭發現一箱貓BB而在社交網站threads發帖求救。她在今天更新的帖文交待事件經過：「事緣係我哋行街經過見到有人不斷望住個紙箱，個紙箱就喺馬路旁邊。跟住我同幾個朋友就停低諗吓點算。。。
始終香港見到就簡單，知道邊度有醫院，知道可以點做，甚至帶返屋企都可以，但係喺大陸唔同，人生路不熟，連自己喺邊都唔知。更加唔好講認識當地義工。
途中亦都有好多人叫我哋走啦走啦唔
好理。可能係後邊嘅士多呢……
經過我哋觀察，因為我哋都企咗20分鐘以上，如果啲貓喺後邊士多，佢見到咁多人圍住佢啲貓，點會唔過嚟阻止我哋？
如是者我哋不斷打俾唔同嘅人去求
助，最終搵到「梧桐山動物救助隊」
佢哋好好，都即時聯絡醫院，問到有醫院肯接，跟住我哋就即刻call的士過去醫院嗰度，本身間醫院已經關門，都特登有姑娘接貓貓。姑娘已經即時俾奶俾貓，而家觀察中，就咁睇應該全部貓都病，身上亦都有跳虱，我哋都捐咗＄1000俾「梧桐山動物救助隊」。
義工隊讚揚港青拯救
梧桐山動物救助隊義工Kathy亦在Facebook發帖交代事件及多謝這班勇敢的年輕人。
「關於東門呢一箱貓BB嘅🙏🏻🙏🏻，我立刻聯絡到發現人Cecilia。
嗰班年青人好好👍見到呢一箱貓BB，佢哋冇走開，亦都唔係現場打卡見死不救嗰種，反而佢哋幾個圍住呢班貓BB諗咗好多好多方法，希望諗到方法救到佢哋。
終於佢哋喺好多人推介之下聯絡到我，我就即刻提供醫院地址，然後我再去醫院等BB。
就係因為呢班年青人努力不懈尋求幫忙。就係咁樣，佢哋將呢一箱貓BB扭轉命運💪🏻💪🏻💪🏻
而且這班年青人好好，仲籌咗$1000檢查費用給呢啲小貓BB做身體檢查，❤️❤️❤️非常之有愛
呢班年青人非常之值得表揚👍👍👍特別係(Cally)，佢犧牲自己唔玩住、專程搭車送一箱BB去醫院🙏🏻🙏🏻。」
外遊遇待救動物對策
最後「梧桐山動物救助隊」義工提醒：「大家記得啦，出門旅遊，無論你去到世界上任何一個地方，如果你哋遇到有動物向你哋求助或者有需要你哋伸出援手，你哋唔使考慮、即刻喺當地尋求幫助、周圍問人點樣搵到寵物醫院，然後可以帶受傷嘅動物去醫院接受治療，放低少少銀両，再keep起當地醫院嘅聯絡方式，之後就算你哋返到香港亦都可以繼續和醫院緊密聯繫。
無論將來叫醫院幫你領養又好，你自己搵人幫忙又好，一定可以幫到小動物，尋找家庭。
世上無難事只盼有心人，辦法總比困難多、停一停想一想，自然有出路💪🏻
亦都好多謝好多香港人不停咁聯絡我、大家一齊接力，諗到方法去幫助呢一班全部生病嘅貓BB 🙇🏼🙇🏼🙏🏻🙏🏻❤️❤️❤️❤️❤️
非常之感激香港所有嘅愛心市民。」
如果想了解及支援唔同山動物救助隊，可以到以下連結瀏覽：梧桐山動物救助隊
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
