發佈時間：16:40 2025-08-07
任何動物主人都必須謹慎看顧及照顧動物。日前一隻有牽繩的松鼠狗在散步時，突然被一隻無牽繩的洛威拿犬襲擊，小狗主人已經第一時間帶受傷愛犬到獸醫診所，獸醫檢查後指需要做手術，主人急送狗狗到城大獸醫診所，然而當刻診所沒有麻醉科獸醫當值未能立即做手術，未幾狗狗休克，獸醫急救無效，狗狗就一命嗚呼直奔彩虹橋，由受襲到死亡前後不過兩小時。
連跑兩間診所 松鼠狗身亡
對於愛犬突然被擊殺，狗主王小姐到現在都無法接受事實，向記者講述事件時仍禁不住哭泣：「點解，點解我隻狗就咁無咗，而對方仍然可以攬住隻狗！」
事發於8月3日星期日，當時王小姐帶着愛犬「王餅餅」到居所附近散步，途經粉嶺海聯廣場對開巴士站附近，突然不知從哪裏衝來一隻大狗，撲向她腳邊的松鼠狗王餅餅噬咬，「當時好混亂，我立即救王餅餅，抱起牠，之後定過神來，才發現王餅餅被咬到身體穿了一個洞，然後發現我的腳也流血……」王小姐說。之後她立即通知丈夫到場協助，盡快送狗狗到診所。
第一家診所獸醫檢查後認為要做手術，然而當時診所營業時間將完結，王小姐和丈夫於是送狗狗到有二十四小時急症服務的城大獸醫診所，然而，在到達診所後因未有麻醉科獸醫而未能即時做手術，而狗狗亦在這時撐不住，氣絕身亡。
對於事情發生經過，王小姐在沉痛及驚嚇中不記得細節，連對方是甚麼狗也不知道，其後丈夫及家中在現場了解及綜合各方資料，才能夠還原真相，以下是家人發文還原事發經過。
threads發文還原真相
王小姐妹妹在社交網絡的發文：
「我諗咗好耐，我都係諗唔明。。
呢個世界其實係咪冇公義？我諗咗好耐仲係替我隻小可愛好委屈真係好冤枉。。
點解你嘅不負責任可以害死人哋屋企人？
事源自於琴日五點幾我屋企人帶狗仔
散步喺粉嶺全程綁住繩
突然間前面有架車停低
主人冇綁繩嘅情況下，放咗隻有隻洛威拿衝咗出嚟
直接咬到我隻狗仔身體冇咗個窿.
當下我屋企人為咗保護隻狗仔 隻腳流晒血
亦都即刻送狗仔去急救睇醫生，佢哋交換咗個主人嘅contact影低咗ID就離開左，當下太情急連個隻會咬人嘅狗嘅相都冇影低到。
最後送搶救不治。。英年早逝。」
王餅餅剛過4歲生日
「前排先啱啱過四歲生日。佢喺我哋心中都只係一個小BB，一個一世自由快樂嘅快樂小狗。。係治癒我哋每個人心靈嘅存在，人生再世遇到好多難事，返工嗰陣得閒睇吓佢嘅片佢個傻樣就會開心返，我連WhatsApp icon都係佢個伸脷仔樣。。
琴晚我哋全家都沖去醫院探佢送佢離開
佢臨走嘅時候個樣仲係招牌嘅伸脷。。。
我嘗試強迫自己往好嘅諗佢係開心咁
走嘅，因為我愛嘅人都係佢身邊而我都深信佢只會去好嘅地方會上天堂
但一見到怇嘅傷口剃晒嘅毛毛我就有
創傷後遺症 我唔明點解佢要suffer呢啲咁嘅嘢？佢咁可愛點解要受傷？」
狗主未能接受狗狗已逝
「佢基本上係人見人愛嘅小狗，帶佢去到邊度都會有人讚佢可愛，去到周圍都r到零食，佢乜都冇做點解你要沖埋嚟咬佢？
我哋乜都冇錯點解要承受呢啲咁嘅嘢？點解我哋全家都要承受呢啲咁嘅嘢？以後都冇得聽佢放屁。打鼻鼾。
刮我房門。係咁錫我。。。。一入屋就衝過黎搵我
我真係好痛，好辛苦，完全瞓唔到覺返到屋企完全唔敢開佢啲相睇。
原來生離死別係咁痛 收到消息嘅時候
原來個人真係會好似電視劇咁係會軟到企唔到起身我坐喺條街度痛喊咗好
耐好耐 應該成條街都聽到我撕心裂肺嘅哭聲 係咁講，我真係接受唔到，今朝先同屋企人講完啱啱去韓國買咗件新衫仔俾你 遲啲俾你着。。。。。
點解一日內你就冇咗。。。點解咁突然我仲未幫你着件衫仔 你個日本和牛零食仲未食完。
我哋錫佢係連樓梯都唔捨得佢行一步，多過一步嘅樓梯佢都會望住我哋，等我哋抱佢。。。我哋咁錫嘅寶貝」
大狗未牽繩釀悲劇
而擊殺松鼠狗王餅餅的洛烕拿犬，是由一名年輕高瘦，年約二十餘歲，身上有紋身。王小姐說，事發後對方說不是狗主，她是狗主妹妹幫忙放狗。而她當時由朋友駕車至現場，開車門時疑未有上好牽繩，讓狗狗衝出來直奔向松鼠狗攻擊。
王小姐說，襲擊事件發生後，對方女狗主要向她say sorry，而丈夫而不讓她離開，對方一直陪同王小姐和受傷狗狗去獸醫診所，到狗狗斷氣後，對方提出支付善終費用，條件是不要報漁護署。王小姐拒絕。
小狗主人望法律制裁
「我哋咁錫嘅寶貝點解要俾你咁對待，而你仲可以繼續擁有你隻狗仔？仲可以帶佢出街？
呢個世界有天理咩？？最後淨係賠吓醫藥費？
咁我哋呢？點解香港唔可以立法呢啲未被training好嘅攻擊性犬點解可以養？要養又冇監管好嘅人又要點樣重罰。我唔想大家同我一樣失去屋企人。要經歷呢種咁撕心裂肺的痛楚。」以上是王小姐妹妹在社交網站threads的發文，亦是王小姐的心聲。
她希望政府能正視飼主疏忽導至其他動物傷亡事件，修例懲治，讓所有飼主都引以為鑑，謹慎看顧自己的動物。
「現在我失去我的家人，而對方甚麼也沒損失，也沒有法律可以制裁！如果有罰則，狗主需因疏忽而負上刑責，例如要罰款坐監，最少狗主們會小心看顧自己的狗狗！」
