發佈時間：16:47 2025-07-25
法國老虎狗扁面短鼻短腳身形圓碌碌，外表十分可愛。然而可愛背後，卻潛藏不少疾病。有一位法虎主人在面書中的「狗狗椎間盤/腦炎/🐶🐱抽筋及神經系統分享區」發表長文，講述狗狗患上急性椎間盤突出，然後出現併發症，病發至去世僅7日的過程，提醒法虎主人們注意狗狗的健康及提防這種可致癱瘓甚至死亡的常見疾病。
4歲的法國老虎狗Odie原是Stan的寶貝，ig記錄了他和牠玩樂的片段。不幸的是，Odie經歷一場急病風暴，主人已立即求醫，可惜無法挽回Odie性命。以下是他以愛犬第一身寫的病發經歷：
「大家好！我叫Odie！今次出現除左同大家講聲bye bye（因為我係7月5號已經去左彩虹橋🌈），仲想分享我最後嘅經歷，希望大家可以多多關注自己法豬嘅身體。
先簡單講左我嘅經歷：我喺患上急性椎間盤突出（IVDD），兩日內由一級惡化至五級，途中神經劇痛引發中度中暑，五日後出現脊髓軟化症（Myelomalacia）而離開。」
主人自幼小心照顧 避免患椎間盤突出
「我今年四歲，自問係身材標準嘅法虎（見圖😬），因為爸爸媽媽怕我會患上IVDD，從細都唔俾我跳，所以我係連普通梳化都跳唔到👉🏻👈🏻。另外因為有朋友仔喺上年9月患上左二級IVDD，大半年前開始爸爸都盡量抱我上落樓梯。加上我每日食鮮食同出兩次街，身體狀況同體能都唔錯 😎
但係，我最後都中左IVDD，仲要五級添 😞」
Odie主人總結愛犬病發過程，整理出幾個重要事項，希望其他法虎主人注意。
1. 病發初時症狀不明顯
「一開始有IVDD嘅症狀唔算太明顯，主要坐立不安企喺度，腳仔有輕微震。第一晚夜診急診醫生都好難分辨喺IVDD定係拉傷，都係食住消炎止痛藥先。所以如果有症狀，最好要嚴格限制行動同小心觀察 👀」
2. 痛楚致氣喘 肌肉發熱致中暑
「法虎天氣熱會中暑大家都應該好清楚，但今次中暑嘅原因唔係因為天氣熱（Odie可以30度高溫出街行一個鐘，但大家千祈唔好隨便試！！好易出事！！），而係因為喺事發第二晚留院期間神經太痛，連打左止痛針都止唔到，痛到狂喘身體肌肉發熱導致中暑，雖然已經盡快降溫，但身體多個器官已經受到破壞同內出血，包括肺部、腸同凝血功能等等 😞」
3. 病情急劇惡化 兩日內由3級變5級
「其實我中暑後身體情況已經極差，轉院到另一間有ICU既醫院後，醫生睇我維生指數覺得生存機會唔超過10%。不過可能我平時身體都幾健康，所以聞咗兩三日氧氣、打咗幾日抗生素同輸咗一包血清後，我身體狀況就慢慢有好轉，喺ICU第二晚已經食到我爸爸煮俾我嘅雞肉。不過，我由入ICU第一日（即係出現IVDD後兩日），IVDD已經惡化到第五級，即係後腳郁唔到同時失去左深層痛楚，而我前一晚住院前都只喺三級。」
4. 併發「脊髓軟化症」
「住左5晚ICU之後，我身體狀況逐漸有好轉，雖然未完全好返，但急症專科醫生話隔多日都有條件做脊椎手術，希望可以減低壓力令神經有機會以後恢復。但係一朝早神經科醫生發現我背脊開始失去神經反應，懷疑出現脊髓軟化症（Myelomalacia）。呢個病好恐怖：『皮肌反射隨着時間向前側慢慢消失，而後肛門及腹部張力消失，前肢喪失自主運動功能，最終因呼吸肌麻痺而窒息死亡。多數的狗狗基於人道理由，在發生呼吸抑制前，即會進行安樂死。』
相信大部分法虎主人都有聽過IVDD，但我估好多人都未聽過原來IVDD有機會引發呢個致病嘅病。其實第一日入院醫生就話有機會發生呢個病，但因為IVDD病發後過左幾日都未出現，本來覺得自己有一線生機，我爸爸仲諗緊手術後點樣照顧我同做復康運動，可惜呢個終極殺手最後喺手術前就已經出現左。」
5. 盡最後努力失敗 忍痛放手
「最後一日朝早係前肢仲有知覺下，想試下盡最後努力輸血提高紅血球指數，再做麻醉做MRI同手術。但中午輸完血後我已經失去左腹部張力，唞氣開始有小小辛苦，神經科醫生臨床判斷我應該真係中左脊髓軟化症。爸爸媽媽決定唔想我咁辛苦，最後三個鐘喺一個房間陪住我做最後道別，喺我意識開始模糊前就忍痛放手俾我去彩虹橋自己跑。」
提醒法虎主人重視椎間盤突出
「呢件事發生得好快，從開始到結束剛剛好一個星期。好多事情如果從結果倒反轉黎睇，都可能會搵到做得更好嘅地方，但今次其實從第一日發生後已經睇左醫生，同我之後一直都已經得到專業照顧，只能夠話呢個IVDD惡化得太快(其實唔常見)，亦都引發咗中暑呢個併發症，有太多不幸嘅事導致左極度不幸嘅結果。
呢個post其實希望大家唔好做任何批評或質疑，因為我分享呢個故事，只希望所有狗狗嘅主人會對IVDD更加重視，尤其係預防措施同察覺初期病徵，同埋認識脊髓軟化症呢個病。最後我祝願所有狗狗都健健康康，唔好咁快黎彩虹橋搵我玩 😜」
