發佈時間：16:58 2025-07-04
有「ViuTV一姐」之稱的藝人陳俞希（Hailey）是愛狗之人，最近在IG發表帖文，介紹陳家新成員「波叔」，是一隻接近10歲的老年松鼠狗，牠是義工從繁殖場救出，正要尋找暫託家庭照顧。Hailey初次見牠時一口爛牙，全身毛打結，她本打算暫時照顧一星期，結果因為媽媽的一句話，Hailey由暫託變領養，「波叔」成為陳家狗！
Hailey家中原有五隻狗狗，包括三隻芝娃娃、一隻唐狗和迷你都柏文「Mousse」，隨着年月逝去，狗狗們都上了彩虹橋休息。作為資深狗奴才，Hailey近年經常到狗場做義工，幫忙清潔、幫狗狗洗澡、帶狗狗散步等。而2023年底她亦領養了一隻混種小型狗女BB，名叫Habibi，Hailey說牠每次沖涼都非常怕水，於是帶牠去做spa、學游水，克服怕水心理。現時Habibi已經兩歲，Hailey在緣份驅使下帶了新成員回家，牠是一隻老年松鼠狗，名叫「波叔」。
Hailey在ig向大家介紹波叔：
「喺度我要同大家講我哋屋企
嘅新成員 “波叔”😅😅
係到講吓佢嘅由來
其實我周不時都會去做領養日嘅義工
因為幫佢哋親手搵到屋企，真係好開心😁
有一日，我心血來潮就問吓 @utahlee
嚟緊會唔會去做義工，就係咁我就跟住佢去啦
波叔並唔係當日有份出席領養日嘅狗隻
去到領養日尾聲，負責人話佢要出去接幾隻係繁殖場救返嚟嘅狗，當時佢一共接咗三隻狗
三隻狗啲毛係打晒撠，啲牙污糟到不得了
個口仲非常之臭（因為我估計佢哋從來冇洗過牙）
佢哋問我哋有冇興趣幫手暫託一個星期
第一時間係要問我媽咪
因為佢係對得佢哋最多嘅人
當時佢就話，幫手暫託一隻囉
咁佢就跟咗我哋返屋企啦」
阿媽指狗狗體形小 照顧方便
「當時我都有問身邊嘅朋友有冇人有興趣領養
點知去到第二定第三日…..
我阿媽竟然同我講：其實佢咁細隻，照顧佢都好方便啫，其實佢喺度住我都冇問題㗎🙃
(因為好多時候我出埠媽咪都要放狗，佢係好多時都會仆親🫠以前養唐狗嘅時候，佢都叫做行路比較好啲，所以大狗對佢嚟講係難handle)」
獸醫估計狗狗約9-10歲
「其實根據佢哋差到不得了嘅牙，
醫生只能夠估計佢可能係9-10歲
跟住我就同其他屋企人研究同埋商量
因為年紀都係一個考量，我諗有去睇過領養狗隻嘅朋友都會諗，老狗喎 （老實講，我係從來冇諗過自己會領養一隻老嘅狗，因為要面對寵物離開從來都唔係一件容易嘅事）
跟住我阿媽竟然話….. 我哋都習慣㗎啦，養過咁多隻狗都已經😅
我真係俾佢激死🤣🤣 (心軟的女人😒)」
揭繁殖場殘酷實況 呼籲勿購買
「就係咁佢就嚟咗我哋屋企啦
但係我必須要再三呼籲唔好再去繁殖場度買狗
你哋真係冇辦法想像佢救出嚟當下
嗰種惡劣嘅程度！🤬😡!!!!!!!!
愛狗嘅人，根本無可能接受啲人咁樣對狗狗
tea cup size , 通常就會搵一胎入邊最細嘅，然後係咁繁殖，再變態啲嘅就比少啲嘢佢食，甚至乎會變態到比減肥藥啲狗媽咪，唔夠營養生出嚟嘅狗仔就會細身🤬，今日佢出嚟已經係9歲定10歲,我估佢之前嗰10年，都係生活喺不停繁殖嘅世界入面，好彩嘅就可以出得返嚟，唔好彩嘅，分分鐘就喺入邊咁樣繁殖到有病，然後就俾人掉出街，甚至喺狗場死埋！」
繁殖場購買=助長惡行
「睇到呢度可能你會話 ：哎呀，之前我唔知道乜原來佢哋咁慘㗎！
如果之前唔知道唔緊要，希望你哋知道之後轉發俾啲想買狗嘅朋友睇，請佢哋三思而行
係！我明！養狗梗係想搵隻得意啲㗎啦
領養有好多手續喎，好麻煩呀梗係買啦！
但係你哋每去繁殖場購買，就等同助長緊佢哋呢啲行為，而且係我做嘅領養日入邊，有好多好靚品種嘅狗有poodle 有哥基 ，希望你哋養寵物嘅時候唔好心急，緣份到一定會遇到你適合嘅狗狗🐕❤️」
小編都希望想養毛孩的人都能夠領養，拒絕購買！
寵物領養 | 「緣來是你」感人領養故事大徵集｜人氣王將贏價值逾HK$2,000度身訂製寵物禮包！
