冤親債主攞你命
最初睇《贖夢》，一直認為是講夢境的所謂驚憟恐怖片，雖然張家輝和陳法拉樣子恐怖，但也沒有想過其實是一套講因果的恐怖「鬼」片。
《贖夢》告訴我們，鬼其實唔可怕，就只有寃親債主至會攞你命。
我會話《贖夢》係一套鬼片，仲要係一套都幾恐怖嘅鬼片，戲中張家輝和陳法拉呢對「神經」夫妻，喺夢與現實交錯之間，不斷出現既可能是幻覺，但同樣也可以解為心魔的各種恐怖影像，當然作為傳統睇港產鬼片大的人，第一個想法就是撞鬼，還要是嚟攞命的猛鬼。
鬼故事常常會有一個命題，就是撞鬼究竟有甚麼好怕？如果一切皆幻影的話，為甚麼要怕？如若都是「行過路過」的「朋友仔」，就更加與我何干？最多就是燒些金銀衣紙打發就ok。當然，這些都建基於傳統民間習俗和信仰，只對相信的人才有意義。
不過，如果出現的「鬼」，是你於心有愧的對像，那可能就另作別論。電影中夢境的猛鬼次次都係嚟索命，仲要蔡辛強(張家輝) 死得有幾恐怖得幾恐怖，當然唔係普通「料」。
正如常說寃親債主至會攞你命，欠下的遲早要還，就睇吓係點樣還，這方面其實非常正統港產片，撞鬼緊有原因，從來沒有無原無故的恨。
至於劉俊謙文醫生那一條線，反而不似張家輝那邊講到明返嚟報仇，但當中原由其實更加細思極恐曲折離奇，也有更多可能性和無法言喻的過程，特別喜歡女鬼在夢中的顯現方式，非常有80年代《幻海奇情》感。
文醫生細時遭遇，讓我較有感覺的是，有時候爭吵、打交不是問題，反而是解決內在矛盾的最佳方法，反抗比強忍更有用，打到對方唔敢再打你，比鬱到病、鬱到發夢撞鬼好吧！
《贖夢》好唔好睇可能人人有不同想法，但若果想重溫一下港產片經典鬼片的話，唔駛諗太多，絕對值得入場，仲有特別巨星客串，講真又真係估佢唔到嘅。
補充一句，我已經是睇鬼片睇到麻木嘅，都畀《贖夢》嚇咗幾跳。
作為一對「瀨嘢」的夫妻，蔡辛強(張家輝) 和紀慧玲(陳法拉)對夢和撞鬼各樣應對方法，最好也要承擔不同的結果。
