「七公主」大家姐馮素波（波姐）早前上電視節目《晚吹 - 總有一瓣喺左近》，談及先夫「三七」回魂時聞到的一種味道。

波姐於節目上稱，當年丈夫因中風入院：「嗰陣佢留醫過個幾月就走咗，佢中咗風之後，我喺醫院見佢右手右腳好似撐船咁不停咁郁，但係左手就揸住拳頭，我見啲手同腳甲都長，咁我咪幫佢剪，我打開佢隻手，雖然佢有沖涼，但係佢隻手啲水冇索乾，所以有醫院啲藥水味同一陣酸餿味，於是我每日都用棉花棒隊入去抹一抹。」

丈夫離世後，波姐每晚都會坐在佛壇念經：「有一晚我都唔知原來係回魂夜，嗰晚我嘅心情係特別難過，所以我咪坐喺佛壇念經，點知我望到房門個手鉸，突然聞到我先生隻手嗰啲酸餿味，充滿整個佛壇，咁我咪望下，係喎，呢間房啲鎖匙係我老公收埋，因為我哋啲鎖舊咗，個『的』撳咗就會開唔到，所以幾間房連埋啲門匙都係佢收，可能係佢提我要搵門匙，如果唔係倒鎖咗，我去邊呢？」馮素波稱念完經後，走到丈夫生前用的寫字枱：「我見到一個環保袋好當眼咁擺咗喺櫃桶入面，除咗鎖匙外，仲有護照、入籍紙，原來仲有啲現金喺度，之後我諗，可能佢預咗自己會有咁嘅一日，如果中風出嚟再學，未必識得去銀行撳機，所以咪擺定啲錢喺度，佢入院前兩晚都講過『醫生話要個心臟微創手術，如果醫生話我可以轉食佢隻藥而唔使做手術，你就應承醫生我會食，我都玩活多一兩年，我唔想開刀』。」

當時想大家只是閒話家常：「點知佢隔一日已經入醫院，再冇出過嚟。我覺得呢啲醫院咪帶咗我去搵返佢喺外國個仔啲身份證，咁係咪好奇呢？我第二日就問咪大哥返嚟呢？我有個皈依咗嘅弟婦話係大哥嘅『三七』。」

接着馮素波再說：「我記得喺疫症期間，有一晚發夢問『我要返工坐乜嘢車』，點知有把聲同我講『你打開呢度門，行過對面就有車返工』，咁我咪打開度門，係一條河流，水流好急仲係米黃色，我又唔識游水，點行去對面嘅車站？跟住見到我先生喺我隔離，左手執住我右手，右手就攬住個四方盒，身上着住佢最鍾意嘅白色衫，拉住我跳咗入河，跟住拉返我個頭上水，佢就放咗我隻手，順住水流去咗對面嗰度門，之後冇再見過佢。」

之後馮素波身體出現問題而入院做手術，有一個朋友探病時望住她說：「『大哥好開心喎，佢好錫你』，我初初以為係嗰陣佢中風都唔出院，即係唔想我辛苦，點知佢話呢幾次嚟探我，見到大哥好開心，原來佢見到我先生喺我側邊，個朋友仲話大哥見到我身體健康就好開心。」