更新時間：16:19 2026-10-15
發佈時間：16:19 2026-10-15
發佈時間：16:19 2026-10-15
程瑤（Donna）日前為製作公司38周年舉行了一個周年晚宴，適逢又是老公兼公司創辦人朱仲賢生日，她就特別安排咗個慶生環節，全場嘉賓一齊唱生日歌，場面熱鬧得嚟又極之溫馨。講到嘉賓陣容，除咗身兼「仁美清叙」主席嘅 Donna 叫埋一班亞姐姐妹到場支持之外，仲見到林曉峰、李思捷、陸詩韻、Sunny Wong、劉曉彤、海兒、楊洛婷同老公陳智燊、宋熙年、梁麗翹、黃建東、鄭衍峰、阮浩棕、趙浚承（Gary）、波波（黃婧靈）、游莨維、李志剛同埋 Chiu B（洪崎峻）等等，真係星光熠熠、人強馬*土壯！
孖大仔勁歌熱舞 細仔化身做 DJ
講到全晚最高潮嘅焦點，一定係 Donna 粉墨登場孖住大仔一齊登台，又唱又跳火力全開，台上台下氣氛即刻爆燈！在台下食花生睇表演的女神海兒就睇得非常開心，拍晒手掌，大讚 Donna 表現出色，仲直言要畀足「1000分」。
Donna同大仔又唱又跳，而細仔就化身做 DJ 在場打碟，炒熱氣氛，連星級排舞師 Sunny Wong 同李思捷都忍唔住跳埋上台，一齊勁歌熱舞，成個會場氣氛推到最高點！
兒子英國留學 廣闊眼界
東姑問 Donna會唔會安排兩個帥氣仔仔返公司接棒幫手，Donna 就話兩個仔仔仲喺學習階段，仲有好多進步空間。佢仲向東姑透露，原來兩個仔目前喺英國劍橋大學修讀碩士課程，希望佢哋學成歸來之後，可以將新視野同新想法帶入活動管理行業，真係用心良苦呀。
同韓國超人氣女團、天王合作
至於周年晚宴過後有咩大計？Donna 透露過幾日就要飛往韓國首爾製作大型活動。最令人期待嘅係，佢話屆時將會與一個韓國超人氣女團，以及一位大家非常熟悉嘅天王級偶像男歌手合作！到底係邊位天王同天團？東姑都好想知呀！
最Hit
