發佈時間：18:46 2026-07-20
人家結婚請飲，究竟要畀幾多「人情」？最近一名港女在Threads出po狂呻，指自己剛在五星級酒店結婚擺酒，公審好姊妹的人情只有$1,000，認為自己蝕本兼「睇清楚對方真面目」，揚言叫對方PayMe補差額，隨即被網民圍攻指她失禮超肉酸：「你窮就咪學人擺酒啦！」
日前有一名自稱32歲的港女在Threads的專頁「matchmaker.office」投稿，稱早前在香港瑰麗酒店舉行婚宴，但最令她感到氣憤及委屈的，是指平時生活如中產的好姊妹，給她的人情只有$1,000，
港女寫道：「Honestly 我真係唔想做衰人，但噚晚結完婚拆人情，真係睇清咗所謂『好姊妹』嘅真面目。 我同老公擺Rosewood，早半年已經save the date俾佢，佢平時出街食飯打卡就扮晒中產，結果噚晚拆佢個人情，得 $1000？？？」
收到$1,000人情而嬲到爆的港女，不單直斥「好姐妹」扮中產但孤寒，又食又拎，更指自己蝕本外，又指如果手緊，可以不出席：「Excuse me??依家2026啦，仲有人封$1000去五星級酒店飲？我哋per head成本都幾千啦！你封$1000即係要我貼錢請你食飯？如果你真係窮/手緊，你大可以say no唔出席，我完全明白。但你著到靚一靚嚟狂影相，走嗰陣仲擸走多盒Godiva回禮，然後封2張$500蚊紙俾我？我老公叫我算數，但我真係吞唔落呢啖氣。我應唔應該直接send PayMe link俾佢叫佢補番差額？定係直接unfriend算？真係好肉酸囉！」
網民反擊：婚禮非商業演出
港女呻到爆，但網民的反應幾乎一面倒地反對這位新娘的說法。有人毫不留情地留言：「你先係肉酸嗰個。冇人規定賓客有義務幫新人回本，婚禮擺到咩規模、用幾多錢，全部都係新人自己嘅選擇。咁在意成本，咪揀平啲場地囉。如果每位賓客都要負責你嘅成本，不如直接開價賣飛入場。自己揀豪擺，就唔好將成本轉嫁俾人。無咁大個頭，就唔好戴咁大頂帽。」
也有網民直言不能把婚禮成本轉嫁到賓客身上：「點解你擺酒，邀請我去飲，但我有義務確保你收支平衡？明明成晚 enjoy 嗰個係你，唔係我喎。」更有網民用諷刺口吻調侃：「咁下次醒目啲，好似演唱會咁分價錢賣飛入場，坐最前最接近新人位標貴啲包 Godiva 回禮，遠離主家席平位就送麥提莎。」、「窮就咪學人擺酒啦，你成本幾多關人蛋治！」
當中有一位同樣在 Rosewood 擺過酒的新娘更留言：「我都係 Rosewood 擺，都收到幾百蚊人情，但我請得佢黎就係想得到佢既祝福，並唔係為左果 3 幾千。作為朋友可以抽空黎我已經好感恩。」
2026 年香港婚禮人情公價參考表
「人情」本質上是祝福的具象化，而非餐飲費的補貼。 當新人選擇高端酒店舉行婚禮，所產生的「高成本」，在邏輯上應由新人自行承擔。若將這些成本分攤給賓客，婚禮便不再是招待親友，而變成了「合資辦宴會」，這顯然扭曲了宴請的初衷。
究竟「人情」要畀幾多？根據 2026 年最新的婚禮人情市場行情，所謂的「人情公價」是根據婚禮舉辦的場地級別來劃分，大家可以參考：
婚禮場地 / 形式 建議人情金額 (港幣) |
高級酒店 $1,500
一般酒店、私人會所、特色婚宴場地 $1,000
酒樓、午間婚宴、西餐廳、酒會 $800
簽紙註冊即觀禮 $500
只派餅卡（不用出席婚宴） $300
以上公價只是參考，最終金額應根據你與新人的交情深淺，以及個人的經濟能力來衡量。若與新人關係佳，人情金額通常會高於公價；而直系親屬或長輩通常會給較大金額如 $2,000 至$5,000以上的人情。如不能出席婚宴，但已收到喜帖，禮貎上可封一份人情以表祝福。
