發佈時間：07:13 2023-11-05
經歷兩段婚姻、現年69歲的Maria Cordero（肥媽），本和第二任丈夫施曉洋（Rick）恩愛甜蜜，可惜在2020年11月Rick不敵癌魔，天人永隔，肥媽慢慢從喪夫之痛走出來，至今仍然是單身，過着獨守空幃的生活。向來語出驚人的肥媽，在個人YouTube頻道發布《一講到婚姻中的問題 難免會講到性生活嘅問題》的影片，強調性生活是維繫夫妻感情的關鍵，她七情上面的說：「如果你唔需要性生活，你就係一個失敗嘅女人！」
在片中肥媽被工作人員問到：「良好婚姻生活同良好性生活有冇關係？」時，她語氣堅定的說：「有，絕大關係！所以我絕對唔贊成擺個細路哥喺中間瞓！」此時工作人員再問：「好多女人話又要生仔，夜晚有時間都湊仔啦，又要返工好難平衡，仲要滿足埋老公需要。」肥媽強調一定要取得平衡。
唔需要性，係失敗婚姻
肥媽連珠炮發的說：「呢個唔係淨係老公，如果你唔需要（性生活），你就係一個失敗嘅女人！真㗎，你冇可能唔需要，如果係唔需要，你就已經係失敗婚姻！因為你一定要平衡！你擺低個細路囉！你畀朋友、邊個都好，你兩公婆一定要有自己時間，幾廿歲都好，都要拖吓手，拍吓拖，係你放棄咋嘛！如果你老公拖吓你手、行吓海灘買吓雪條、行吓蘭桂坊，夜晚返去個心情都好啲，連呢個需要都冇，你做咩女人呀？係你自己將自己變成一個生仔機器、煮飯嘅機器，係你自己做出嚟。」
肥媽續說維持婚姻關係，是需要雙方付出及溝通，要注意說話的語氣及態度，以免把「分享」變為「質問」：「你同自己愛嘅人都唔可以細細聲講嘢，一定要大聲㗎咩？男人唔喜歡喺人面前數佢，畀着你都唔鍾意啦！『你點呀？你公司究竟點啫？』呢啲唔係分享，係質問！咩叫分享？就係：『做嘢有冇壓力？』、『係咪好辛苦呢？唔好意思，要你咁辛苦。』、『有咩我可以幫到你？』」
氹老婆等於氹女
之後肥媽越講越激動：「講嘢係藝術，如果冇呢個藝術，你又要你個麻甩佬對你溫柔，但你好似潑婦，咁點溫柔？男人又係，成日話：『你識咩？』但喺出面就話老婆唔理解自己，但你有冇同太太分享過？你氹女時又咁叻？氹老公如氹仔一樣，氹老婆等於氹女一樣！」
肥媽更說大家要學做小女人：「到我老公死嗰日，喺佢心目中我都係一個小女人，佢臨死前同人講話要睇住我，話我唔識過馬路！就算係咪大男人都好，佢心目中都會有大男人嗰種保護你嘅心態，但你乜都得，整厠所又得乜都得，傻㗎？人生如演戲，演得好，你就有一個好生活。咁點解唔演？」
