發佈時間：16:22 2025-09-13
再見不是朋友，更何況是死纏難打的前度？世界真細小，冤家路窄撞返前度之餘，對方更是上司的未婚夫，有冇咁邪？
日前FB專頁「奴工處」公開一名港女的「撞邪」經過，該名港女投稿自白，指昔日共事的女上司，邀請她和一班舊同事飯聚，原因是女上司將結婚，特意約吃飯派帖。
港女說和一班舊同事及上司已有兩年沒見面，更指女上司已單身5年，突然說結婚，所以被對方「炸」喜帖，感到十分興奮及驚喜，誰知驚喜變驚嚇！
港女說：「等到兩位主角出嚟，我一望…真係嚇親！我阿姐個未婚夫係我前度嚟，仲要係我初戀，拍咗七年拖，後尾佢偷食而分手…之後拖拖拉拉咗幾年，我避佢避到改電話…」
港女重遇舊情人嚇到O嘴，當年為同對方割席，連電話號碼都要改，但令港女再O嘴的，是舊情人竟然讓準太太即是港女的前上司知道他們一早相識。「佢見到我嗰下笑一笑點頭…我阿姐見到，問佢：『咦，你識xx(我）架？』佢：『係，xx（我）係我讀書時，F.5自修室啲書友！當年好fd，我哋成十年冇見啦！』阿頭：『嘩！咁橋撞返！！到時播成長片段一定要加你哋啲相啦！』我當下面都青埋，心諗：『咁多年冇見…扮唔識唔得咩！』
這位舊情人再出招，當眾要港女給他電話號碼，港女迫住冇得say no！「食完飯前，佢仲當眾話冇咗我電話，問我攞返…我阿姐仲叫我俾佢..點知完咗個飯，佢真係WhatsApp hi我，但我冇覆到…我而家有啲驚..點算好…」
港女發文求救，不少網民獻計出招，大部份網民叫港女立刻封鎖前度的電話外，更叫她最好缺席婚宴：「之後同舊阿姐話有事去唔到婚宴，但做足去的人情」、「九秒九block，如果舊阿姐係好人，內心好好祝福佢；如果舊阿姐係衰人，你誠心誠意恭喜佢便可」、「Block 佢, ignore 佢. 到時搵藉口唔去婚宴但係俾足人情」。也有不少網民指那位前度是擺明想和港女再續「前緣」欲打「友誼波」！
