發佈時間：15:49 2024-01-23
北上到內地吃喝玩樂是近年大熱趨勢，除了北上購物行超市超市Costco同山姆之外，家長們都需要揾個地方畀小朋友放下電，齊齊享受北上樂，近日就有不少網友推介到交通方便的深圳野生動物園，讓小朋友同獅子老虎近距離接觸、親手餵袋鼠和草泥馬食生果嫩草。
有見網友們讚不絕口，小編即時帶隊親身試玩，睇下係咪咁好正先!
最受歡迎排隊餵老虎 小朋友超興奮
深圳野生動物園在1993年落成是一間放養式的動物園，園內的動物都可以在開闊的地方自由活動，整個園區約六十多萬平方米，劃分為三個園區：食草動物區、猛獸谷和表演區。
小編於周日下午一時左右到達深圳野生動物園，由於地方大，故此每一個園區都不算擠迫，只是餵老虎食嘢排隊時間較為長，排了大約半小時才可以登上投餵車直接駛入園區裡面，同猛獸近距離接觸。
登上投餵車的遊人都會有餵老虎一次的機會，小朋友就要由成人看管下才可以進行，現場直擊，工作人員都很注意安全，多次提示家長們要看管小朋友，不要伸手出外觸摸老虎，只可遠觀而不可手多多。
餵老虎的環節大約10至15分鐘左右，但小朋友就感到非常興奮，眼界大開。
4個表演場館節目多 一日睇唔晒
除了餵老虎，「表演區」裏都設有4個表演場館，每日有固定的演出項目，如大型動物歌舞劇《百獸盛會》、海洋表演《歡樂的海洋》、馬戲劇場《馬戲小鎮》等，以及潛水員與鯊魚在水中上演的《美人魚與鯊魚共舞》等，節目非常豐富，但若然是入園一日，就肯定玩唔晒，大家要作出選擇才可。
50蚊人仔餵袋鼠、長頸鹿
園內放養過萬隻野生動物，當中有部分更是來自世界各地的珍禽異獸，以及中國一、二級受保護動物等，如華南虎、金絲獄、東北虎、火烈鳥、長頸鹿、斑馬、亞洲象、犀牛等；亦有動物園自行繁殖的稀有虎獅獸、獅虎獸。
「食草動物區」內有長頸鹿、斑馬、大象、羊駝、袋鼠等，還有孔雀園及其他稀有動物的區域，場內可以即場購買飼料，與動物近距離接觸。
小編因為晏入場時間不足，所以只能作出選擇，餵完老虎之後，揀了餵長頸鹿和袋鼠，温馨提示袋鼠的作息時間較早，所以好想親近袋鼠的朋友就要早少少到場，否則錯過了餵食時段就要擇日再餵。
有唔少網友曾經喺分享過，早去餵好過遲去餵，因為動物食飽就唔理你，親身實測，動物們的消化力好似不錯，同埋園區內的動物的數目都不少，所以牠們對遊客們餵食都表現得非常熱情，只要你有飼料在手，要同牠們影下合照都冇問題。
深圳灣口岸：
深圳灣口岸乘搭高峰專線75路，於西麗法庭1站下車，步行前往西麗站，乘搭地鐵7號線至「西麗湖站」下車，步行5分鐘到深圳野生動物園。
深圳北：
深圳北站轉乘地鐵7號線至「西麗湖站」下車，步行5分鐘到深圳野生動物園。
門票資訊：
深圳野生動物園成人門票正價¥240人民幣，兒童及長者門票正價¥140人民幣。每張成人門票可帶同一名1.2米以下的兒童，
網上旅遊平台Klook推出港澳旅客門票優惠（必須出示香港／澳門身份證之有效證件），最平港幣$99就可以入園玩足一日。
