發佈時間：14:41 2026-04-17
五一假期就快到啦！想避開廣東省嘅擠迫人潮，尋覓一個清靜又靚景嘅度假地點？不妨將目光投向內地華東地區，杭州嘅徑山花海絕對係不二之選！呢個被網民盛讚為「杭州版阿勒泰」嘅隱世秘境，此時正處於花田黃金期，不僅有千畝鮮花鋪就嘅莫奈式畫境，更有復古小火車等特色體驗，性價比超高，無論係情侶打卡、親子放電，定係獨自放空，都能擁有愜意嘅假期時光，輕鬆逃離都市煩囂，即睇詳情吧！
避開人潮歎靚景 千畝花田宛如走進莫奈油畫
隨住高鐵網絡越來越完善，港人北上旅遊嘅版圖不斷擴展，華東地區嘅小眾景點逐漸成為新寵。而正值春日花期，杭州徑山花海正處於全年最美狀態，與市區人頭湧湧嘅熱門景點截然不同，呢度佔地足足千畝，依山傍坡而建，處處都係驚喜。園內遍植冰島虞美人、魯冰花、喜林草同紫藤花，各色鮮花交織纏繞，鋪成一片色彩繽紛嘅天然地毯，微風吹過，花浪輕搖，滿滿都係「油畫感」，鬆弛感直接拉滿，難怪被網民譽為「杭州版阿勒泰」。
最佳賞花日曆｜不同季節有不同驚喜：
· 春季（3-5月）:鬱金香、虞美人、油菜花（色彩最豐富）
· 夏季（6-8月）:馬鞭草(紫色花海)、向日葵、荷花
· 秋季（9-11月）:粉黛乱子草、波斯菊、地膚草（網紅打卡季）
· 冬季（12-2月）:臘梅、冰島虞美人
必玩打卡項目｜復古小火車+熱氣球體驗
講到徑山花海最受歡迎嘅打卡項目，就一定係「復古蒸汽小火車」！旅客可以坐喺充滿懷舊風情嘅車廂入面，聽住「哐次哐次」嘅車輪聲，用20到30分鐘嘅時間，慢悠悠穿梭喺斑斕嘅花海之間，從不同角度欣賞呢片大自然嘅饋贈，就好似坐緊時光列車，駛入春日童話入面。
如果想追求刺激同新鮮感，咁徑山花海附近嘅「天跡漫谷航空飛行營地」就千祈唔好錯過！營地提供熱氣球升空體驗，坐住熱氣球慢慢上升，喺高空360度俯瞰五彩繽紛嘅花海，同埋層巒疊嶂嘅茶園山巒，視野超開闊，風景超震撼；膽量夠大嘅朋友，仲可以挑戰由專業教練陪同嘅動力滑翔傘，翱翔天際，感受風嘅速度，體驗雙倍嘅快樂，絕對係難忘嘅回憶。
親子休閒好去處 順遊周邊古蹟浸文化
除咗適合情侶打卡，徑山花海都係一家大細「放電」嘅好地方。園內設有小農夫樂園，提供蔬果採摘、萌寵餵食、旋轉木馬同彩虹滑道等多種互動設施，小朋友玩到唔舍得走。大人可以帶住小朋友，喺園內平坦嘅草坪上野餐、露營，吹住微風，享受愜意嘅午後時光，一家人齊齊整整，溫馨又開心。
徑山花海周邊景點眾多，不妨順道串聯暢玩，深入感受當地嘅歷史文化氣息。附近嘅徑山茶文化公園，可盡覽杭州茶文化嘅深厚淵源；良渚古城遺址公園，能近距離感受遠古文明嘅獨特魅力；仲有小古城村，可沉浸式體驗田園風光與鄉村風情，讓一次北上之旅收穫加倍。
門票購買詳情：
地址：徑山花海（余杭區徑山鎮龍皇路99號）
门票：30元
復古小火車：套票都需要60元
熱氣球（天跡漫谷航空飛行營地）：成人票238元／位，儿童票180元／位
开放时间：07：00—19：00（18：30停止入内）
地鐵：港人抵達杭州後，可乘坐地鐵2號線至「良渚站」，出站後轉乘的士前往，車程約35分鐘
公交：可轉乘7498路公交車直達景區
自駕／包車：景區門口設有大型停車場，無需擔心泊車問題
立即追蹤《東周刊》全新WhatsApp頻道，緊貼全城熱話、突發猛料、獨家消息！
https://bit.ly/4gnvlZf
