發佈時間：19:47 2024-03-22
現為獨立歌手的陳逸璇（Jolie），早前偕朋友一行十多人到日本二世古滑雪。她表示以前學過滑雪，但因受過傷而停了十幾年，至去年再學番就愛上了，所以今年決定再接再厲。此行除了滑雪，還首次玩雪上電單車，非常刺激。今次食盡好嘢，最吸睛莫過於她着Bikini浸溫泉，她笑言見到KOL同Model影完放IG咁靚，自己都好想試吓，而效果滿意，下年一定會再試！
滑雪受傷
Jolie十幾年前在韓國學過滑雪，但意外受傷仲要入院縫針，所以一直好驚唔敢再學。至去年才有勇氣跨過陰影Pick Up番，技術仲突飛猛進，事緣為食的她，知道雪山上一間叫「望羊莊」的餐廳的便當好好味，所以好想去。但因為走時要自己滑番落山，嗰度又有條好斜同好窄嘅山路，於是她去年學番滑雪時，就用3日時間由初學者練到去中級，好開心做到，所以今年都有去番呢間餐廳幫襯。她還首次玩雪上電單車，她說：「玩雪上電單車唔使牌照，但有教練全程睇住，因為速度幾快，我都幾驚，有一嘢我仲反咗車跌落雪度，好彩冇受傷，所以一定要注意安全，玩時要戴頭盔。」
溫泉打卡
今次Jolie去咗6日，只係玩咗4日，她解釋：「因二世古嘅天氣唔係好穩定，有一日好熱又落雨，大家都話比較危險，雪唔靚，又有霜，有啲朋友去滑都整親，所以就決定休息下，浸溫泉影吓靚相。」由於今次她住在朋友的Villa，入面有個溫泉，所以她帶備Bikini去，她笑言：「個Villa有好多人，所以唔可以唔着衫浸溫泉。至於點解着Bikini喺雪地影相？因為我喺IG見到好多KOL同Model都係咁影好靚，所以想試下，同埋我好好彩一凍就可以跳落溫泉度，嗰時氣溫都攝氏零下，但影出嚟個效果都幾滿意，希望下年再去時可以再影過。」
歎盡美食
而Jolie今次歎咗好多美食，除咗上雪山「望羊莊」食拉麵和咖哩豬扒飯外，又有幫襯新餐廳Dan和MAME食懷石料理，因今次有個朋友到當地慶祝生日，還吃了頓豐富的日本菜，她坦言：「都好值得，因為真係好新鮮，價錢又比香港平少少。」有一日還Book了帳篷食下午茶，她表示：「原本個Tea係喺雪地進行，佢會整啲冰枱、冰凳坐喺雪地上，但因為天氣惡劣被逼喺帳篷內進行，咁我哋玩完雪上電單車就可以入去食吓甜品、飲杯熱朱古力，畀大家休息下。」
親自下廚
最難忘是有一日，她去了Supermarket買材料如菜、牛肉和湯底等返Villa整Shabu Shabu，喺咁凍天氣下真係好溫暖、好舒服。由於打完邊爐淨番好多海鮮如蝦和魚，她又煲了海鮮湯，等第二日朋友們滑完雪返去時有碗熱湯飲，她續說：「住Villa好處係有個好大嘅廚房，我自己又鍾意煮嘢食，煲完湯，我仲煮過All Day Breakfast畀朋友食。」今次玩得盡興，她明年打算再去。
