發佈時間：16:07 2023-09-05
既然日本懶理大家死活，不斷傾倒核廢水，我哋當然要留住條命仔，唔通仲飛日本送羊入虎口咩！一於北上消費，盡情吃喝玩樂，歎番夠本，一樣夠Fun啫！
有網友呻，去到深圳福田區，一間近期被港人熱捧的水療骨場「湯崎」，輪候時間竟然誇張到要等兩三小時。
更有港女分享，她一行14人，由星期六的下午三點，玩到翌日的下午兩點，食足四餐，既按摩，又唱K，玩盡不同設施，一家大細過埋夜瞓覺，埋單¥13,000人仔。
係咪物有所值？係咪足不出戶唔怕打風，都可以玩足24小時？係咪未去過按摩都冇資格叫旅遊達人？骨精小編一於擠進人潮裏過關，以客人身份放蛇幫襯，一探究竟。
那天仲夏，我浸到皺皮
由香港坐火車去到落馬洲站，便是福田口岸，過關後向右行約幾分鐘，便到達被喻為最長龍骨場「湯崎」（舊名：水立方）。
小編入行咁多年，都係第一次為咗份稿，要赤身露體去放蛇，所以每一張照片，都係用生命來換取。
你實話點解張張相都係人影都冇個。大佬呀！我要攞條毛巾遮住部手機偷拍，萬一俾啲客仔以為我影佢，一陣撳我落池底打一身，可唔可以報工傷先？
入返正題，去開香港嘅骨場，啲毛巾通常有陣霉味，睇見都唔開胃啦。嗯！湯崎呢度就好乾淨，有種去咗Resort嘅感覺，有乾蒸同濕蒸桑拿，個大浴池又好有溫泉feel，唔會話浸滿紋身漢，似足江湖片咁殺氣騰騰，我眼見啲客都好斯文，唔怕無啦啦會串我：「四眼仔，啤咩啤！」
呢度浴費分兩種，人仔¥280玩6小時，又或者¥360玩24小時，我無謂慳幾十蚊，梗係玩盡全日啦！如果消費滿¥500 ，仲減免浴費喎！
高顏值的技師名冊曝光
浸浴浸到皺皮，沖完身，梗係開始去到另一層休息區，樓梯口有塊大型屏幕，可以逐頁瀏覽全場男女技師名冊，睇啱就要同其他客仔鬥快落booking搶人啦！
湯崎因為主打合家歡市場，適合一家大細來玩，按摩絕無色情成分，老婆大人，你唔好扭我耳仔先啦！最多等我同你揀番個深圳版玄彬幫你按腳啦！
每個技師的資料，都會註明身高同家鄉，大會更會逐一就技師的顏值、技術和服務3項評分，5粒星為滿分。部分技師仲會附加生活日常的生圖，青春可人，我一路揀，一路覺得自己變咗香港小姐評判啊。
和技師的一隻腳距離
「𠵱家係嚟揼骨，人哋有幾高關你乜嘢事？」老虎乸一聲令下，已經同我飛走「翻版龔嘉欣」，揀咗一個實力派技師上場，佢嘅顏值評分唔夠4分，亦全無生活照提供，肯肯肯定平日唔會擺甫自拍，只會鑽研按摩技術。
好！等咗不夠１小時，技師現真身，闔埋眼享受腳底按摩吧！嘩！師傅，呢個穴位好痛喎！係咪腎虧？有冇得救？
話時話，痠痛一陣又開始幾舒服，隻腳輕晒，果然係實力派。我一開始已經望咗隻手錶，到按完對番時間，佢又足鐘冇偷懶喎。
最重要係，個技師完全冇𢱑我任何貼士小費，唔使怕俾得少，嘴藐藐。
貪便宜攞著數大行動
先去吧台憑鎖匙手環換取一杯免費手搖飲品，我就揀咗杯椰子咖啡，如果要添飲先至需要俾錢。仲有椰青任飲時段，唔係走雞呀嘛！
跟手去隊幾杯免費Haagen-dazs雪糕，食番夠本。仲有幾十款時令生果同飲品放題任食，一於每15分鐘試晒唔同味道，由朝食到晚先。因為多款式，好彩唔使同人鬆踭鬥搶。
飲飽食醉後，梗係搵個地方hea吓。估唔到閒日下午都咁旺，細路仔喺漫畫閣跑來跑去，啲機舖遊戲機又坐滿人，感覺似兒童樂園，比較嘈。
咁我去玩VR定睇電影好？抑或趁打風叫埋阿強同阿祥過嚟打通宵牌，房租每小時都係¥69，我一鋪自摸清一色都夠俾有突啦！打到天光，就去蟲洞唞吓，枕頭被鋪都算乾淨，然後再狂食狂飲，再按番part身，咁至係人生嘛。
