發佈時間：10:17 2025-01-31
人生如賭博，每一個關卡，是贏也好，是輸也罷，都必須全情投入。張繼聰與蔡卓妍，都已是久經考驗的4字頭，二人的賀歲新作《祥賭必贏》，也是開宗明義的賭。
「唔係只係講賭枱上嘅嘢，亦唔係鼓吹賭博。其實做人都似賭博，為咗屋企、為咗事業、為咗愛情⋯⋯都係博一鋪。」張繼聰認真地說。
而45歲的他，直言人生中也有瞓身豪賭、放手一搏的時候。
「一定係做呢一行！我覺得做呢行，我𠵱家仲喺度搏緊。呢一行好得意，等如我成世都係做Freelance，我哋唔係返朝9晚5嘅公司，而係喺公司做Freelance。朝9晚5嗰種穩定，代表咗冇變數，但我哋係超強變數，又冇底薪。𠵱家我哋經歷成個氣候都好慘淡，連公司都幫唔到你，因為公司自己都要諗計生存。
延伸內容 : 蔡卓妍（阿Sa）、張繼聰主演《祥賭必贏》(My Best Bet)預告片提前睇｜新片介紹
延伸內容 : 賀歲片《祥賭必贏》首條預告片登場 阿Sa破格演病態賭徒 與張繼聰演夫妻爆笑連
蔡卓妍既是「賭徒」也是贏家
「我覺得做演員或者歌手，真的唔係講努唔努力，仲有好多嘢令你可唔可以繼續行落去。每一站，都唔知有咩挑戰，我覺得每一次都要All in（晒冷），冇得話今次做少啲，下次做7成，一定係次次都All in。」
他身旁的蔡卓妍，既是一名「賭徒」，也是一位贏家。
「我同阿聰一樣，做呢一行都係博一鋪。當年未簽公司之前，我爸爸真係同我講，俾兩年時間自己，如果兩年後唔得，可能再考慮升學嘅問題。好感恩，亦都好幸運，我可以做到一份自己鍾意做嘅工。
「到𠵱家我都成日諗，如果我唔係做呢一行，我真係唔知自己會做啲乜，我有咩特別鍾意⋯⋯可能會做一份自己唔係好鍾意嘅工作，就係為咗生存。我𠵱家仲可以為咗自己鍾意做嘅事去拼搏，仲繼續學習，我覺得好正！」
要贏，二人都踏出破釜沉舟的一步，才能嘗到甘甜的果實。
阿Sa笑言「本色演出」坦言好鍾意打麻將
接拍《祥賭必贏》，阿Sa笑言當中有「本色演出」的成分。
「拎到呢個劇本嘅時候，我已經覺得係為我度身訂造㗎嘞，因為我本身真係好鍾意打麻將，真㗎！然後啤牌嗰啲都有玩，所以收到劇本嘅時候，就覺得好正！
「打牌呢，我其實打好細，細到關智斌同阿嬌（鍾欣桐）都嫌棄，嫌到唔同我打，所以我近年係有調整吓嘅，打大啲。不過，我同助手對麻雀都好愛，愛到可以唔玩錢都好開心。」
至於張繼聰，於戲中憎人賭博，而跟阿Sa的合作，則有如其成功指標。
「我由阿Sa背後嘅男人，變成阿Sa身邊嘅男人，係超榮幸！《戀上你的床》前面嘅係青雲哥；就算唔係電影，上次拍電視劇（《PTU機動部隊》）我增緊磅，好肥，睇啲劇照，阿峯（林峯）好瀟灑，我就有個肚腩⋯⋯」
阿Sa盛讚朱柏康 眼神好不覊
二人於戲中為閃婚夫婦，現實中Single and available的阿Sa，反而盛讚另一對手朱柏康。
「朱康係靚仔！眼神好不覊！（一指張繼聰）佢哋係咁Challenge我！」
張繼聰秒回：「冇Challenge，係陸永反應最大，我哋以前讀書已經識，陸永好似比朱康高一班，所以我直接覺得唔係靚仔，係有型啫。我見仲有好多人，見到白只都流口水添！」
阿Sa也回敬拍檔：「阿聰都有型，但佢唔喺個Market入面，所以我會自動屏蔽佢。我覺得今次開心嘅係，全部演員加埋導演共同創作一套戲，我同阿聰多咗好多唔同話題。
「話題可以關於演技上、戲劇上嘅，呢啲唔係好容易同Friend傾到。就算我有新劇本，我都會捉住阿聰，俾佢睇吓故事大綱，大家一齊研究，好似Workshop咁，我覺得好正！」
阿Sa被封「技術型雀后」張繼聰對賭博冇興趣
學術上的討論，跟麻雀枱上的競技差不多，都是靠互相切磋，對於被封「技術型雀后」的阿Sa而言，仍有追夢的空間。
「我有個打通宵牌嘅心願仲未圓到，但最近都打咗一次，係冇打通宵啫，本身係打一個東，點知我贏咗錢，我啲Friend唔俾我走，於是再打一個東，嗰日正正係我最病嘅一日⋯⋯（張繼聰：「你啲Friend覺得機會嚟嘞！」）
「真㗎！好多命理風水師都話，當你好攰、唔夠瞓，就千祈唔好賭錢，因為能量好低，就一定會輸。然後我喺第二個東，輸得好甘。算啦！大家開心，係我輸咗成個櫃桶（籌碼），本身我係贏咗半個櫃桶㗎！最終輸凸咗。」
身為資深雀迷 阿Sa分享催運法
作為資深雀迷，阿Sa也有一些小迷信，還有催運法，僅供參考。
「嗱，西圈真係唔會周圍走，好邪㗎！而且如果你東圈、南圈都冇食胡，到西圈開胡，就惡過老虎，好犀利、好旺㗎！正所謂『西圈食胡，惡過老虎』，真㗎！仲有，譬如當你輸到甩褲嘅時候，就咁（拉張繼聰褲子）掹人哋條褲，就可以贏番！」
至於家傳戶曉的紅內衣，阿Sa坦言：「我都會着紅底底㗎，因為我去年犯太歲，所以係必須嘅，全年日日都係咁（穿紅色內褲），嚟緊今年冇事嘞，就可以着吓其他顏色。」
一旁的張繼聰，對賭博不太有感，跟其經歷相關。
「細個同啲Friend去長洲玩嘅時候，輸咗啲零用錢好大罪咎感，所以我就決定唔再賭錢。𠵱家係新年囉，同屋企人玩，我係想輸嘅，寧願佢哋快點贏，咁我就借啲意派錢，等佢哋開心吓。
「我老婆都係派錢嗰個，佢玩嚟都冇意義，我嘅錢係佢嘅，如果我打莊，佢贏我啲錢，其實都是贏自己啲錢，所以佢唔玩嘅。通常呢啲時候，我老婆係煎糕、攞茶俾大家，或者負責監場，睇吓我有冇賠少咗俾人。」
張繼聰入行20年 以〈白紙一張〉表白心迹
今年是張繼聰入行20年，早前他於自己45歲生日時，以新曲〈白紙一張〉表白心迹。
「保持住自己白紙嘅心態，𠵱家做得耐咗，有時都開始俾人叫前輩，人哋係咪真心叫前輩都好，擺喺呢啲位其實係好唔着數嘅。我又唔想做『Old seafood』成日話當年，但我開始明白點解會話當年，幾個Friend聚埋一齊都會咁，所以永遠都要當自己係白紙。」
事業上保持初心，張繼聰回到家中，也沒有擺出「一家之主」的架子。
「我覺得做自己鍾意做嘅事係最好嘅，做父母唯一可以做，係全力支持自己嘅小朋友，即使佢最想成為嗰個版本，唔係我心目中嘅版本，其實都唔好出聲。我自己就係咁，我父母都冇勒住我，所以我對個仔都係咁。
「我經常提醒佢，鍾意就要全情投入，佢想做體育老師，但其實我都好想佢讀運動治療。（阿Sa：「可以幫你治療。」）係！我就係諗，如果我個仔係物理治療師，我就可以慳番好多錢，佢又可以報答到親人，每天返嚟幫爸爸鍊一鍊。」
面對快將18歲的兒子張瞻與7歲的「前世情人」張靖，爸爸則有不同的思維。
「我鼓勵個仔拍拖㗎，佢又唔拍，我成日都話佢，聖誕節仲黐住我，有冇搞錯！我仲叫他出去玩吓；仲有佢讀國際學校吖嘛，就要同唔同國籍嘅同學玩，爸爸當年做唔到嘅事，就應該要去幫爸爸圓夢！佢又冇㗎喎，係帶成班男同學嚟屋企玩。」
（阿Sa：「你諗吓你個女第日拍拖。」）
「唔可以！總之我同阿女講，如果有男朋友，就等爸爸同佢傾吓偈先，阿女自己出去坐一陣。對住個男仔，我就會攞白只幅相出嚟，播埋《踏血尋梅》佢睇，問佢：『你知道呢個叔叔坐過監、殺過人㗎可？』。」
迎來的是阿Sa一句戲謔：「雙重標準！」
前方未知與驚喜 旅程更見趣味
人生有趣的地方，不只如賭博，前方的未知與驚喜，也令旅程更見趣味。
要娛樂大家的張繼聰，就準備了一些短期驚喜。
「我有一套自己好期待嘅拳擊片《金童》，拍咗6年，終於上嘞！所以會做一啲宣傳；另外今年我希望可以實踐到自己嘅導演計劃，嘗試做導演，咁嘅時勢，我都唔知得唔得，但我希望可以做到。」
蔡卓妍的「驚喜環節」，並非來自其計劃，「我做完呢套戲嘅宣傳，就真係要放假，因為真係太攰嘞！上一年都冇停過，去做World tour，喺屋企嘅時間太少。𠵱家完成晒，又拍咗啲綜藝、拍咗啲電影，今年要養好身體。
「所以我要去旅行！同埋阿嫲、其他屋企人，我阿嫲都好犀利㗎，96歲仲好健壯！」
她的孝心早已聞名，而阿Sa隱藏的驚喜，是她也為一名動漫迷。
「戲入面我有『火影跑』（來自漫畫《火影忍者》），係滿足導演嘅要求嘅，但係我都係動漫迷嚟㗎！之前好迷《咒術迴戰》，但係佢爛尾！（聲線高8調）竟然Bye bye咗我最鍾意嘅五條⋯⋯
「仲有《我推的孩子》，兩季動畫睇晒！」
當告訴她後者漫畫版也被列入「爛尾」之作，她即不懼劇透，追問結局，得知後報以一聲「吓？」。
還是保留神秘、有驚喜好一點？
《東周刊》最新一期提早1月25日出版！隨書附送《蛇年行運東勝》
千呼萬喚的《蛇年行運東勝》於1月25日隆重登場，雲集全港9大玄學名家！隨最新第1118期《東周刊》附贈，於便利店、各大報攤發售，記得去買返本睇吓蛇年如何行大運啦！
