發佈時間：16:15 2025-01-27
吳君祥，是藝人吳君如的胞弟。自2001年從加拿大回流香港後，從事影視製作行業二十多年，由拍電影、廣告，到近年開設網上平台直播帶貨，一直與時並進。
近日他又投資七位數字金額，在銅鑼灣開設一間2000多呎的ALYRO Pilates & Gyrotonic Studio，涉足普拉提和嬋柔運動行業。
「2024踏入九運，係一個新元運，我覺得大家都需要身心靈健康，加上遇到導師拍檔Susan，大家傾落都想將嬋柔運動介紹俾更多香港人，於是就有呢間studio嘅出現。現在無論做任何生意，都一定要迎合潮流，如果唔與時並進，就好快會俾人淘汰。」
近水樓台學嬋柔
訪問這天，吳君祥邀請旗下節目《女皇直播Show》兩位主持陳君宜（Qinnie）和官詠儀(Christine)，跟着導師Susan體驗嬋柔運動，並直落開Live宣傳。
西裝筆挺的吳君祥，正是這間studio的投資人，「我係投資方，只係做生意。我本身係製作底，過去多年拍電影、拍廣告和短視頻，做過電影導演、唱片監製，不過做娛樂同做運動行業係兩回事，所以呢間studio日常營運交晒俾拍檔，我冇參與意見，只會幫手做吓marketing。
「而我亦係用家，本身間中都有跑步同舉吓鐵，𠵱家近水樓台，當然把握機會跟拍檔（Susan）做嬋柔運動。我一直都知有Pilates，但Gyrotonic嬋柔就真係最近先接觸到，在導師指導下，配合專業器械，上次只係做咗15分鐘，感覺舒筋活絡，啲肩頸痛和50肩等都紓緩咗好多。
從事影視製作二十多年，吳君祥一直全力在幕後發功，但原來他在加拿大讀大學時，卻修讀與娛樂事業風馬牛不相及的Electronic engineering。不過畢業後他沒有成為電子工程師，而是走去開車行。「十六歲去咗加拿大多倫多讀書，讀嗰科同𠵱家做嘢係完全冇關係，九唔搭八。不過通常世界係咁㗎，你讀嗰樣，就唔係你做嗰樣。之後去開車行，買賣新車同二手車，又幫人安裝音響和改車，那年代所有靚車都揸過晒。
「但我本身成家都做娛樂，我啲基因都有娛樂底，加上自小夢想做導演，2001年我就決心結束多倫多嘅生意，返香港博一鋪。」
姐夫冷水照頭淋
2001年他從加拿大回流返港後，便向着導演目標進擊，以為有個「影后」家姐，和當時的未來姐夫「最佳導演」陳可辛「照住」，可以快人一步理想達到，誰知卻被對方冷水照頭淋。
「諗住近水樓台，梗係搵姐夫啦，返嚟香港就同佢講：『我要做導演！』點知姐夫話：『阿祥，你走啦！又冇經驗，又冇劇本，巿道又唔好，你返加拿大啦！』嗰年911，我都知個巿好差，但俾佢一盆冷水淋落嚟，真係好傷心。」
不過他堅持不放棄，之後輾轉入了商台同PCCW合營的盈科天馬動力做製作主任，「我堅毅不屈，係都要做導演，之後終於得償所願，拍咗人生第一套網劇，由朱茵和李蘢怡主演的《男女字典》，當時我做副導演，策劃一腳踢，而導演就是著名攝影師夏永康。而我第一套正式拍嘅電影，係家姐吳君如主演嘅《金雞2》，職位都係副導演。」
到05年，他自組公司黃金時代，主力做marketing、活動宣傳和廣告等工作，期間曾幫蒙面歌手龍小菌出唱片。及後他曾到內地電影圈發展，至近年返港開設正做文化製作公司，「我哋製作網劇、電影，近年做埋網上直播和帶貨。因為唔少人對購物概念和模式都改變咗，我哋都要迎合潮流。」
唔夠劉德華靚仔
出身於演藝家庭，吳君祥卻不像父親夏春秋﹙冬叔﹚和家姐走到幕前，而選擇從事幕後，他笑言因為不夠劉德華和金城武靚仔，「實不相瞞，小弟演技確係好叻。我成日同人講，我唔做丑角，唔做諧星，要做一定要做劉德華、金城武演嗰啲角色。但我又真係唔夠佢哋靚仔，我有照過鏡嘅，一照就知，做唔到靚仔小生，都係算吧啦，做番導演好啲。」
話雖如此，但他每次現身直播鏡頭，都自動撻着，動態生鬼，「呢方面要講少少玄學，我八字有食神，食神、傷官代表的演藝、口才，我全部都有，我爸爸、家姐，甚至前妻江美儀都做幕前，好明顯我都有呢方面嘅DNA。其實我演戲都唔差㗎，都有客串自己電影，例如《金雞2》和《12 金鴨》，但得一句半句對白，大家未必留意到。通常都係導演提議：『祥，角色啱你，埋位啦！』我冇主動去爭取嘅。」
江美儀係好老婆
吳君祥曾與江美儀於2006年在美國西雅圖結婚，「我哋04年認識，拍拖冇耐就飛去西雅圖註冊結婚，當時大家都覺得係私事，又唔擺酒，所以唔打算公開，填表時已經標註保密，但都俾人摷到出嚟。」
二人過了十年秘密婚姻生活，但因生活步伐不一致，到2016年協議離婚，不過，他們再見亦是朋友，美儀亦會間中去探望冬叔冬嬸。去年初江美儀憑劇集《下流上車族》莫雯慧一角，在TVB《萬千星輝頒獎典禮》上贏得視后，吳君祥亦即時出po恭賀。
提及前妻，吳君祥豎起手指公大讚：「美儀做老婆真係一流，咁多年對我嘅家庭、飲食，全部照顧周到，又千依百順，出去應酬亦會畀足面我，娶到佢真係好幸福。無奈婚後多年，大家喺生活上逐漸出現分岐，同埋三觀唔係同一個Level上，感情就逐漸變淡，所以先分開，但大家絕對冇第三者，我哋到𠲖家仲係好好朋友，有時見到好男人都想第一時間介紹佢識。」
現時57歲仍然單身的他，一直與父母同住，方便照顧兩老，「爸爸鍾意講笑，但我哋好少閒話家常，一嚟就講世界大事，或者娛樂圈新聞。唔似傳統家庭，講今日食咩餸，阿媽又點點點⋯⋯家姐亦會提點我，我拍電影佢會適時俾意見，如用咩演員，拍咩題材等，現在每周都有family day，大家返屋企聚一聚。」
「祥」路漫漫任我闖，吳君祥坦言現今網上世界𣊬息萬變，自己各方面的工作和生意亦會緊貼潮流。他握緊拳頭說：「我依然會堅毅不屈，與時並進。」
延伸內容：孖前電台主持Christine首做直播 陳君宜變身KOL分享扮靚心得
《東周刊》最新一期提早1月25日出版！隨書附送《蛇年行運東勝》
千呼萬喚的《蛇年行運東勝》於1月25日隆重登場，雲集全港9大玄學名家！隨最新第1118期《東周刊》附贈，於便利店、各大報攤發售，記得去買返本睇吓蛇年如何行大運啦！
《東周網》訪談系列節目《星桄伴我心》1月重磅嘉賓：
即睇：獨家質詢馬清鏗「小三」五索“我係賤人，但我住山頂，你唔恨得咁多！”
即睇：劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
