發佈時間：14:30 2025-01-09
習慣，是可怕還是可愛，差之毫釐。
人生不同階段中，總有一兩個習慣，予明日的你回味。
世人眼中的爆笑「蝦頭」楊詩敏，於愛情路上，昨日的她也有過一些習慣，令今日的她變成更好的人。
「𠵱家咩年紀嘅男人，對我嚟講都唔係重點。我細個嘅時候好戀父，我嘅初戀係大過我11年，當時我18、19歲，佢好開心呀，因為我得18歲吖嘛。」
延伸內容 : 黃子華、劉嘉玲《香港式離婚》首場 張智霖拖老婆撐場 DO姐華仔城城祝演出成功
延伸內容 : 火燒心！《Wild Wild》爆肌Oppa輪住上 焫㷫蝦頭！
舞台劇《香港式離婚》Maria一角綻放光芒
「細個係鍾意一啲比較爸爸輩，可以照顧我，一種唔係訓話，係一種權威去凌駕我嘅仰慕；隨住我自己嘅年紀增長，我又會鍾意啲細個啲嘅男士，所以年紀唔係重點。年紀幾大都好，佢都可以唔成熟，就算年紀細啲嘅人，只要思想，仲有同我溝通嘅方式，都可以好溫和，咁就冇問題。」
經驗隨年月累積，剛49歲的楊詩敏，活用自身的真實體驗，於公演中的舞台劇《香港式離婚》中，藉Maria一角綻放光芒。
「我𠵱家好明白自己需要啲咩，但有一個階段嘅自己，喺愛情生活道路上面，都會覺得好迷失、好需要愛，好想有人愛我，但其實我唔識得去愛、唔識得去建立關係。」
「所以當散嘅時候，或者唔知喺邊一個Moment，我就會覺得：『你係男人，衰人！』，好憎恨男人嘅階段嘅我，就可以放入Maria呢個角色。」
說穿了，又是人生如戲，這些年的楊詩敏，學懂了愛與其外求，不如先愛自己。
「唔係耍你，因為我正正處於呢個階段，當我更加認識自己，我知道自己需要啲咩、過咩生活嘅時候，男人、錢呢啲嘢就自自然會埋嚟搵我，我放定10萬個心。真㗎！我咁好咁正，唔會吸引唔到其他人。」
「當真係有個咁嘅人行埋嚟嘅時候，我唔會咁易錯過，或者唔去珍惜，我𠵱家會花時間，或者願意展開自己人生嘅另一個階段。不過，其實𠵱家我都好自由自在，幾好。」
習慣，對現階段的楊詩敏來說，如其勾腳甫士一般，是可愛的。
面對黃子華與劉嘉玲獲益不少
被譽為「神Cast」的舞台劇《香港式離婚》，曾於香港公演，但是次由編劇黃詠詩重新編寫劇本，演藝學院出身的楊詩敏，有份演出就更興奮。
「我第一次參演呢個劇目，雖然我未結過婚，但因為角色嘅狀況，覺得丈夫好似背叛咗、離棄咗佢，呢種狀態，某程度上喺我嘅人生階段入面，係唔陌生嘅，所以我會覺得用到一啲喺個角色上面。」
如前頁所述，她把自己的經歷融入演出外，面對黃子華與劉嘉玲兩大前輩，她也獲益不少。
「因為我知道自己唔會結婚，所以我更加知道自己點樣了解婚姻。而今次嘅演出更加可以睇到，例如阿詩（編劇黃詠詩）嘅劇本係點睇婚姻，對於感情關係同婚姻，有好多角度可以睇得到，我都學到啲嘢。」
同黃子華好有緣份
「而且可以睇住子華神同嘉玲姐排戲，或者係大家食飯、傾偈，聽佢哋講嘢已經係⋯⋯就算唔使演呢個角色，我都覺得太幸福嘞！」
說到黃子華，楊詩敏大嘆緣份的奧妙。
「我同子華神好有緣份，我有一日排完戲之後，同佢傾咗一陣，因為嗰日大家表現得好好，導演都好滿意。排完之後，我突然好感觸同感性咁同佢講：『好多謝你一直以嚟，咁支持我，行演藝呢條路。』。」
「因為我讀喺演藝學院讀導演嘅時候，有機會參與《男親女愛舞台劇》（2000年），做副導演，所以當時就識咗佢。但當時佢都唔知我係演員，因為我讀完導演之後先知道，自己嘅性格係唔啱做做導演，就再去讀演員。」
「畢業之後就一直做演員工作，拍《My盛Lady》係因為監製（文偉鴻）睇過我演舞台劇，覺得估唔到我癲起嚟可以咁Crazy，就安排我返嚟搶『廣南哥』（黃子華角色），扮徐子珊。」
夢想都同表演有關
不論喜劇、正劇，對楊詩敏這位表演者而言，也屬表演，現在的她唯一的夢想，也跟表演相關。
「假設我好富有，我就打算建立一個有表演空間嘅⋯⋯可能係一間餐廳。雖然香港𠵱家都有呢啲地方，但好少；總之係一個空間，可以俾人睇表演嘅。不過，我仲未有呢筆錢。」
「我鍾意透過作品，同觀眾有更多嘅Connection，會因為我，認識咗佢哋自己嘅某啲嘢，繼而放下自己，更加開心咁生活。」
「表演、唱歌、講故事，呢3件事係我最享受嘅，將自己呈現出嚟，又會有啲Message同人分享，𠵱家我會更加自在，同埋願意發展呢種Connection。」
不只觀眾，楊詩敏也與昔日的自己連結，要說後悔？她斬釘截鐵表示：「冇！」
「我覺得每一個人、每一件事，都令我有成長咗好多，先會建立到𠵱家呢個我。我覺得係好順暢同滿足。如果我想早啲去涉獵某啲嘢，我就會覺得，我要早啲去認識咩係理財會好啲。」
「因為我由細到大，對錢都冇咩概念，賺咗啲錢返嚟之後，其實都唔知使咗喺邊，可能食咗⋯⋯就係唔懂得點樣運用財富。如果我早啲去認識理財，可能我會累積多啲財富，可以做更多幫到其他人嘅嘢。」
30歲先發覺要賺錢養家
幸福嗎？
「我覺得自己係幸福嘅，屋企人都好支持我去讀演藝學院，冇反對已經係好大嘅支持。我一直唔需要養家，直至屋企人面對一個經濟轉變，我先發現，要賺錢返嚟養家，當時我係差唔多30歲。
「我有一個經歷，我諗住做舞台劇賺得好少錢，於是我出去搵，好多演員都會見Waitress，我都去餐廳應徵。見工嗰陣，我俾Resume佢睇，佢話我學歷好高，但佢冇睇到，我個Degree係關於導演嘅。不過，佢最終都冇請我，因為佢以為我係嗰種方法演技嘅演員，去拎做Waitress嘅體驗。」
過往太認真 楊詩敏學習放輕鬆
歲月的流逝，讓楊詩敏變得更自在。
「我係好認真嘅人，有時太認真，好多嘢都好上心，其實會好痛苦，亦都會有好多煩惱，煩惱係成日逼迫自己，但我覺得，呢個係一個階段，只要識得欣賞自己，人哋俾一個意見你，其實唔使太執着呢個意見。
「人生有好多嘢，都係要未必有答案嘅，但我有時轉咗去認真Mode，反而唔夠Funny或者人性。其實我好鍾意自省，我知道自己要Relax啲，𠵱家我都學緊。」
「鮮肉」好定係「臘肉」正 ?
由認真Mode學習放輕鬆，楊詩敏對另一半的「用途」也有所轉變。
「細我10年都算係鮮肉，思想溝通到就Ok。無論比我大定細都唔重要，可能係用法唔同。年紀大啲嘅男士，可能同你有好多嘢分享，人生閱歷、生活上嘅事物；年紀細啲嘅朋友，會同你吃喝玩樂，我覺得功能有啲唔同。」
鮮肉也好，「臘肉」也罷，她稱一生一世這個承諾，行動比傳統更為實際。
「對我嚟講，如果要生小朋友，就一定要結婚，無論如何都要俾小朋友一個名分，要有父母，但我自己知自己事，其實我應該唔會有B生。既然唔使生小朋友，就唔使⋯⋯
「我覺得承諾唔係簽嘅嗰一張紙，而是你真係覺得同嗰個人係一生一世嘅，其實唔需要結婚。承諾就係，會一生一世視嗰個人為一個終身嘅對象，會履行所謂結婚嘅誓言。如果遇到呢個人，是唔使一紙婚書嘅。」
即使抱不婚態度，對愛情，楊詩敏還是有憧憬的。
「我覺得上天對我好好，每一個喺我生命中出現嘅重要男士，都令我變得更好。我都想遇上一個我可以付託終身嘅人，希望佢仲健在啦！」
母愛泛濫 楊詩敏母性的祈禱
一個人從來都可以盡興，現正單身的楊詩敏，享受一個人的精彩，也有領會自己今昔不同的時候。
「我一直都覺得，我唔可以同啲Ex做朋友，因為有幾愛一個人，亦都會好憎呢個人，某個階段嘅我係咁。
「但我發現，我跟阿火（火火）⋯⋯我同佢係唯一一個可以，我仲係佢啲小朋友嘅契媽，我係『蝦契』。原來我比自己想像中，唔係咁識得去憎恨一個人。」
問她成了「蝦契」後，可會激發其潛在母性，她即搞爛Gag。
「我冇性㗎！嗰個階段過咗嘞，有一個階段突然諗，唔理嘞！想生一件出嚟，自己湊！而且我細個嘅時候仲諗過領養，其實我係一個好有母愛嘅女性，我好有耐性同小朋友玩，用一啲有趣嘅方法教佢哋戲劇，令佢哋有所得着、有啲領悟、學到啲嘢。
「我以前教過中學、小學，我好鍾意同小朋友一齊，搵佢哋嘅強項、弱項，我覺得呢啲係我鍾意做嘅事，所以我唔排除，喺我某一個退休嘅時間入面，去貢獻一下自己嘅母愛。」
楊詩敏的未來藍圖，目標相當明確。
「我細個嘅時候，只會諗自己，覺得自己做得唔好，亦好自我，但𠵱家會諗，你睇到呢個我嘅時候，有啲咩可以Share，令大家會有啲得着，可以更加清楚自己係點樣，就會更加清楚自己想過啲咩嘅生活。
「人生過咗一半，其實仲有一半嘅路要行，仲可以好多姿多彩。你睇我由我出世到𠵱家嗰一半幾豐盛？經歷過咁多好嘅事、遇到咁多好人，先至成就到今日嘅我。
「仲有一半路程嘅時候，我可以做到好多嘢，將呢一半貢獻俾所有人，就係我嚟緊想做嘅事。」
《東周網》訪談系列節目《星桄伴我心》2025年1月重磅嘉賓：
劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
