發佈時間：12:43 2025-01-07
吳若希（Jinny）由於不時在社交平台「公審」老公，故她難免予人惡妻的形象；不過，事實又點會咁簡單。日前，在葵涌一幢工廈的停車場，《東周刊》就發現，Jinny正在幫老公何兆鴻 （Alex） 早前推出的紙巾點貨；跟着，她還落手落腳搬貨，冧到老公high爆！
其後，Jinny突然因為月事而痛到標冷汗，所以Alex馬上帶她到咖啡店飲熱朱古力暖肚。接着，Jinny見到老公傻傻地望着自己，於是就大聲呼喝他：「仲企喺度？仲唔去買M巾？」Alex立刻遵從命令，走到隔了兩條街的便利店，買了幾款M巾回來給老婆選擇。Jinny軟硬兼施，將老公玩弄於股掌之中，御夫之術確實誇啦啦！
延伸內容 : 慘遭「公審」狂煲煙減壓 爆吳若希老公絕密風流帳
延伸內容 : 吳若希爆老公殷勤接送女員工 貼文公審：趷起條尾就知你做咩啦 !
吳若希笑老公有被虐癮
現年32歲的吳若希（Jinny）與澳門闊少何兆鴻（Alex）於2017年結婚，婚後誕下一女一子。兩夫妻的相處模式十分有趣，Jinny更笑稱老公有被虐癮：「我老公好鍾意俾我鬧，佢有陣時係冇嘢搵嘢嚟做，鬼鬼祟崇故意走過來，搏鬧兩句就走番出
去⋯⋯有啲嘢我已經費事鬧！佢俾人鬧少咗之後，存在感會好低！」
此外，Jinny曾自揭對付老公的招數，年前因不滿老公常常打機，而掟爛其電腦；另外，她又強行燒掉老公前度女友所送的頸巾，她直說：「嗰次唔關打機事，但係喺佢去打機嘅時候，我發現咗有條頸巾嘅存在；而佢冇同我承認過有呢一位前度，又喺度死口唔認，我咪放火燒咗佢條頸巾。」
老公最驚老婆仔女離家出走
掟爛電腦、一把火燒頸巾都未算是絕招，Jinny坦言帶埋仔女離家出走，才是中正Alex的要害！她憶說：「我好鍾意抱住個女離家出走，同埋我係會一聲不響咁走，呢樣先代表我真係嬲！平時好瑣碎嘅都直接鬧，鬧完就冇事，大件事就會直接離家出走。我諗個女出世到𠵱家，離家出走咗兩次！其實只要唔係佢死口唔認錯，就唔會有呢啲嘢發生。」她覺得老公有做錯就必須要認，打就梗係要企定啦！
結婚之後，Jinny表示對婚姻有新的看法：「我奉勸未結婚嘅朋友仔，千祈唔好亂結婚。如果係為咗小朋友，有一個完整家庭係可以結婚，但如果純粹為咗結婚，我愛你，好想同你結婚。就唔好啦！因為結完婚係絕對唔會有愛。」
經常網上「公審」老公
其實，Jinny在網上「公審」老公，是家常便飯的一件事。今年七月，她就因為不滿老公忽然很積極載女同事返工，而將對話截圖放上社交網，搵網民評理；接着，Alex解釋自己只是找對方簽MPF：「我真係做嘢！我之前幾年做垃圾做唔到嘢又鬧，𠵱家做正經嘢都鬧！」不過，Jinny就反問：「我自己都有公司，都有幫人哋供MPF，我𠵱家先知原來MPF需要老闆親自攞文件俾員工簽。男人呢⋯⋯就好得意嘅，身有屎嗰陣呢，就會話自己已經好多嘢煩，怪番女人唔體諒佢！」
網上「公審」老公有原因
事後，Jinny亦曾解釋過在網上「公審」老公的原因：「我會將好多人擺喺心裏面唔敢講嘅嘢，全部講晒出嚟。好多人覺得家醜不可外揚，但我唔係，唔啱嘅嘢，我講咗好多次，而你都係唔聽嘅時候。我教唔到，咁就由出面嘅人教你，我係咁嘅心態。」聽落又幾有道理。
現實中，Jinny是一個敢作敢為的女人；然而，在新劇《奔跑吧！勇敢的女人們》中，她卻截然不同：「劇中，我係極度仰慕老公（蕭正楠飾），老公就係我喺世上嘅唯一，反而佢出邊有小三（賴慧玲飾）；但現實中，老公只係我嘅一部分。的確拍拖時會好仰慕另一半，但婚後就發覺老公猶如小朋友般，自己好似多咗個仔，並且已經冇咗同老公拍拖嘅感覺嘞⋯⋯」Jinny又透露老公真的很喜歡黐着她，鬼咁冤氣！另外，她又指老公最鍾意爭寵，每次當她啜囝囝的時候，老公又要她錫番啖，這似乎是他們夫妻之間的情趣。
呼喝完老公又忽然索吻
日前，早上10時許，在葵涌一幢工業大廈的停車場，本刊發現Jinny兩夫妻，她正在為老公Alex公司早前推出的紙巾上貨。現場所見，弱質纖纖的Jinny，當日推着一架放了百多卷紙巾的手推車，雖然顯得有點吃力，但為了盡快幫老公完成工作，她毫無怨言地擔擔抬抬；而有老婆幫拖的Alex就全程眉開眼笑，冧爆！可是，Jinny卻突然悶悶不樂，呆呆地站着，原來她月事前來，之後還痛到標冷汗。Alex見狀馬上扶着老婆到鄰近的一間咖啡店，飲杯熱朱古力暖肚。
當Jinny看到Alex傻傻地望着自己時，竟然在眾目睽睽之下大聲呼喝他：「仲企喺度？仲唔去買M巾？」雖然當眾硬食老婆的order，但Alex仍立刻乖乖地遵從，走到隔了兩條街的便利店，買了幾款M巾回來給老婆選擇。當Jinny的身體好轉後，Alex忽然鬼馬地向老婆索吻，希望獲得獎勵，但Jinny即時皺着眉避開。然而，返回公司的途中，兩人又手蹺手，十分煙韌！這對夫婦的相處之道，或許比新劇《奔跑吧！勇敢的女人們》更好看。
《東周網》訪談系列節目《星桄伴我心》2025年1月重磅嘉賓：
劉江「講呢啲」｜ 結婚51周年，分享獨門退讓心得｜爆周潤發古惑招𠱁跑山
