人生路上，誰不是斜棟族？身兼多職，大概才是豐盛的指標。
37歲的林夏薇，是視后，也是人妻，她跟丈夫莫贊生結婚9年，一同經營飲食、藝術品等生意，在公在私也拍住上。
最近，因為劇集《黑色月光》，她還多了一個身份——主席。
「哈哈！係因為我嘅角色啫！𠵱家好多觀眾叫我『卓主席』，係我嘅角色卓慧雲。」
入行16年，林夏薇演過的角色，不計其數，而新作中的反派角色，則是她入行以來的突破。
「拎到劇本，知道要演呢個反派角色，我係好興奮嘅，因為終於有新嘗試、新突破。我做咗好多功課，首先我為呢個角色，寫咗個人物小傳，有前傳、中傳同後傳。我希望將呢個角色，印喺我心入面，令觀眾睇到更立體嘅角色。」
對於人生，林夏薇也全心投入，並一直持開放態度，演戲以外，也涉足飲食業，最近還殺入鑽飾界，推出屬於自己的實驗室培養鑽飾物品牌，現實中也成了主席。
「5、6年前我已經有呢個諗法，我覺得我自己嘅生意，都是同我嘅戲劇有關係，有一日我睇咗部電影叫《血鑽》，我好鍾意，而電影引發咗我有一種諗法，就係我想去做實驗室培育鑽，環保啲，唔使咁殘忍，又可以用一個親民啲嘅價錢，擁有一個鑽飾。」
意念千變萬化，源於愛探索的精神。
「我唔會俾框框自己，咁樣只會限制咗自己，我鍾意試、鍾意挑戰，咁樣先會有可能性。雖然未必一定會成功，但係唔試，就一定唔得！」
不只林夏薇，自己的人生，你就是自己的主席。

延伸內容 : 黑色月光︱ 林夏薇奸到出汁「凶」楊茜堯爆喊 結局篇好戲在後頭

延伸內容 : 黑色月光丨林夏薇王浩信激烈床戲 濕吻狂咀 火辣場面逐格睇

延伸內容 : 大搞鑽石生意 林夏薇珠光寶氣開工

直接俾卓慧雲上身

身為學院派，林夏薇為了完美入戲，每次接到角色，也有一個小習慣，這次演繹《黑色月光》的「卓主席」，亦不例外。
「一直以嚟，我演嘅所有角色，我都會為佢寫人物小傳，我覺得成件事好幫到自己，投入落個角色度。
「今次我覺得我係直接俾卓慧雲上咗身，到拍完之後，我都用咗一段好長嘅時間，去跳出嗰個角色。我甚至要做一個儀式，寫咗卓慧雲喺紙上面，然後燒咗張紙，用心理方式去話俾自己知，要同佢講Bye-bye。」
道別以前，她於拍攝的過程中，也把林夏薇完全放下。

投入角色 生人熟人都勿近

「《黑色月光》係橫跨新年咁拍，我私底下係一個好樂觀、好正能量、好鍾意笑嘅人；但嗰段時間，我一直處於一個好低壓、好黑暗、好孤獨、缺愛嘅狀態，我一直要營造自己喺嗰個氛圍，既生人勿近，熟人都勿近，同屋企人又唔交流、唔講嘢、唔笑。」
「我成日匿埋自己，新年唔俾人嚟拜年，自己又唔去拜年，總之嗰段時間，我差唔多消失咗。Social media我盡量都消失，希望自己唔好跳出嚟，要維持喺個角色裏面，係痛苦嘅，但其實又好爽！」
痛但快樂着的過程，換來是完成拍攝後的品評及善後。
「後來我身邊啲朋友同我講番，喺我拍緊《黑色月光》嘅時候，如果喺一啲場合見到我，都不敢同我講嘢。到睇到套劇佢哋先明，點解當時我整個氣場都好唔對路。」
「甚至係我拍完之後，我有朋友介紹我去做聲音治療，就是頌缽嗰啲，去聽吓放鬆吓，我先開始放下一啲嘢。不過，我覺得啱啱拍完嗰段時間，就係《逆天奇案2》宣傳，兩個角色有好大反差。」

觀眾鍾意睇卓慧雲發癲

劇集播出後，網友反應熱烈，林夏薇笑言，是喜出望外的。
「佢哋鍾意睇我發癲（角色），又會俾好多鼓勵我，然後再帶出鍾意卓慧雲嘅穿搭，引申埋鍾意林夏薇穿搭。我最驚訝嘅係，林夏薇呢個話題，喺內地嘅搜尋播放量超過8億8，係我嘅意外收穫！」
豐富收穫全因天時地利人和，也令林夏薇獲得一個亮麗橋樑，再把其演藝事業與其他事業連結。
「都係機緣巧合，我咁啱新做咗一個實驗室培育鑽嘅品牌，劇入面嘅卓慧雲，就係戴住我自己嘅品牌，啱啱配合到佢嘅高貴優雅。𠵱家好多觀眾係追戲之餘，又會留言俾我，想知道我嘅同款係咩飾物。」
即將於香港開設實體店，她坦言：「我冇特別計過投資咗幾多，到12月就會喺K11 Art Mall開實體店。之前我一邊拍《黑色月光》，一邊籌備，要去睇廠，又要開會，其實當時我唔想跳出嚟，但都趁有幾日假期，就開咗好多個會。
「我都驚我啲同事同加盟商見到我，因為當時我嘅眼神唔係我，可能會嚇親佢哋。好在我有啲Partner喺度，要做嘅事都有做到嘅。」
忙得分身不暇，但總有一大事項，是林夏薇不會落下的。
「如果有時間，我會盡量一個星期兩至三日都做運動。就算拍攝《黑色月光》嘅時候，時間咁密集，但我覺得人係唔可以偷懶嘅，差唔多半夜收工，可能得兩三個鐘休息，我都會抽半個鐘出嚟做吓平板支撐。」

富商丈夫係靈魂伴侶

事業順遂，林夏薇的婚姻生活，亦同樣美滿，跟富商丈夫莫贊生結婚9年，二人恩愛如昔。
「我結婚嘅時候，好多人都話我忽然結婚，其實我係有拍拖㗎好冇！而我老公好好，除咗喺生活上係我嘅靈魂伴侶，無論係演戲定係做生意，佢都俾到好多好實際嘅意見俾我。
「你可能會話，做戲佢俾到啲咩意見我，但真係有，佢係我最忠實嘅粉絲，但係都會俾到我好多令我進步嘅意見，會同我分析某一場戲嘅演繹。」
這次演反派，對枕邊人也有所影響。
「我老公覺得我黐黐哋，佢知道我係戲癡，所以我成個氣場變晒，佢都慣咗。不過，到套劇播，佢見到我變咗個壞人，都會瞓唔着囉。」
這些年夫妻二人各有各忙，但該有的儀式感，無論有多忙也要保留。
「大時大節嗰啲，好似生日、拍拖紀念同結婚周年呢啲，慶祝就梗係指定動作啦！佢有時都會送花嘅。
「不過，要生BB嘅話，我𠵱家要做我嘅生意，又要照顧啲狗狗，就暫時分配唔到時間嘞。當然，如果真係有BB嘅話，我一定會全心全意去照顧同教育佢，𠵱家都係隨緣啦。」

寵愛Pet Pet

《寵愛Pet Pet》是林夏薇的主演作品，現實中，她也是愛狗之人，不需太戲劇化，也是戲如人生。
原本的計劃，是讓林夏薇輕輕鬆鬆，說說跟家中4隻愛犬（金豬、金菠蘿、金木耳及金樂寶）的生活點滴，誰知問題還未問畢，她目光已明顯暗淡了。
「啱啱金豬走咗，不過因為我一直好忙，連難受嘅時間都未俾到自己。佢年紀都大嘞，14歲。佢病嘅時候，我都接他返屋企，因為我唔想佢喺醫院太辛苦。
「我希望我喺屋企嘅時候，都係我去照顧佢，我同我先生輪流24小時換班睇住佢。當時佢已經失禁，我哋就會每兩個鐘頭幫佢放一次尿，又整啲有營養嘅嘢俾佢食，全部都係新鮮煮嘅，一啖一啖餵佢。」
把握有限的時光，林夏薇對家中成員離去的一天，仍然歷歷在目。
「因為我同我先生飛得好密，佢都等我哋返屋企，我嗰日仲係咁打俾我先生，叫佢快啲返屋企。
「我覺得金豬同我先生嘅性格好相似，意志力都係好堅強，其實佢已經十幾歲，好多狗狗已經行唔到，佢隻腳又唔好，但佢都好堅持，每日一定要喺間屋行幾個鐘。嗰日都係咁行，行到我哋返晒屋企，好似要同我哋道別咁，又唔想瞓，我哋就幫佢按摩，到半夜就走咗，都算安詳嘅。」
愛犬走了，但The show must go on，她也強打精神，繼續工作。
「我第二日就要做《黑色月光》第一次宣傳，所以大家會見到我似笑非笑，眼腫又面腫。但冇辦法，因為職業關係，我都講，我暫時冇時間去消化佢呢件事，但我啱啱又接咗佢嘅骨灰，返屋企葬咗。
「𠵱家仲有其他3隻狗狗，佢哋喺金豬走咗之後，個個都抑鬱咗，因為佢哋一齊大，特別係菠蘿，我隻哥基係從細就好錫哥哥嘅，我一陣就要趕返屋企，陪佢遊車河。」
旅程仍要繼續，那份愛，也長存心內。

--------------------------------------------------------------------------------

《東周網》訪談系列節目《星桄伴我心》11月重磅嘉賓：
黎諾懿夫婦互爆閨房樂事 慶結婚10周年
林保怡提名《金雞獎》影帝 送花冧李珊珊 激罕親揭秘密關係
周吉佩牀前唱歌送別：「爸爸聽到眼角滴淚，先至斷氣！」 
梁敏巧哭訴阿媽爛賭輸層樓 悲慘身世揭秘