發佈時間：17:45 2023-08-28
MIRROR成員呂爵安(Edan)一連3場嘅個人演唱會《EDAN LUI “IN MY SIGHT OF E” SOLO CONCERT 2023》於昨晚（8月27日）圓滿結束。
呂爵安(Edan)人緣好，除了有一班粉絲支持外，更獲得圈中人到場支持，例如梁詠琪、古巨基、Stanley@MIRROR、沈殷怡（Shirley）及小儀等捧場，更請來台灣人氣組合「五堅情」成員邱鋒澤及陳零九擔任嘉賓，三人一齊唱出《天黑請閉眼》掀起全場高潮。
雖然有不少人大讚Good Show，但都有人惡評，而於演唱會結束後，今日下午呂爵安(Edan)就於社交網站連環出Story公開挑機網民同他的對話截圖。
有網民留言向呂爵安(Edan)挑機，斥他：「唔夠歌走去學人開show都算...但為咗攝時間擦存在感博見報而攞隊友嚟恥笑...呢啲人真係祝佢落地獄！」及「唱得好唔穩定...真係要練多啲歌」，呂爵安(Edan)就淡定地留言：「感恩感恩」。
該網民再留言：「加油！但睇你一陣走音」，呂爵安(Edan)再以同一句說話：「感恩感恩」來回敬這位網民，而這位網民仍未罷休，繼續留言挑機話：「唔好令大家失望，好期待聽你一陣唱到走晒音」，呂爵安(Edan)就話：「應該可以嘅，等我問吓我經理人先！」
呂爵安(Edan)以平淡語語KO這個網友的惡評後，又有網民留言指佢「擦鞋擦到」、「點解你個talk show唔講自己食女嘅？但又講人哋啲緋聞」、「驚得罪啲CJ？做咩唔cut恥笑人果啲？驚得罪啲屎？大雜燴的show將一堆嘢炒埋一碟就擺上台，真心咁都可以開演唱會笑死人」及「又扮慘」，呂爵安(Edan)最後用第三句金句回覆：「呢條係一條好好嘅問題」。並留言：「講真，有哩（呢）三句應付真係個心都舒服啲，希望大家做人都可以relax ddddd，應該會過得開心啲啲」。
