發佈時間：17:36 2024-12-30
十隻手指有長短，每一隻都暗藏玄機。曾經以打女形象發展的葉問徒孫陳嘉桓，絕迹娛圈多年，如今已變成大腦皮紋分析師。突然轉換跑道，要回帶到她10年前開始接觸皮紋，被恩師兼契媽Janey點醒：「你入錯行呀！皮紋顯示，你先天運動最渣。」
知道自己欠缺運動天賦，自然要開發新方向。陳嘉桓花了5年時間做準備，睇手睇足逾2,000隻，才正式入行分析皮紋，尤其幫小朋友發掘潛能，贏在起跑線。
「詠春？我仍然記得，但沒有再打了。轉型後，幫人做皮紋報告或培訓分析師，互動比較快，和做幕前的滿足感不同，不用像拍戲般要等一段長時間。」
比以前更了解自己，開心已經無價。
延伸內容: 32歲陳嘉桓未脫「單」 竟開班教人談戀愛 ?
延伸內容: 瑪姬處女個唱歌精舞勁技驚四座 與尹光 楊詩敏合唱掀高潮
延伸內容: 陳嘉桓與舊經理人16年長約屆滿 榮升國際皮紋分析導師雙喜臨門
開發潛能大
每個人的手指皮紋都是獨一無二，例如有正箕紋、弧紋和伸長斗紋等，而每隻手指連結的大腦區域也不同。透過指紋，可以了解先天潛能和性格特質，有如另類讀心術。
陳嘉桓說：「皮紋分析和風水命理、星座完全不同，睇唔到幾時發達和結婚，但可以睇到你要配合咩性格嘅人，點去溝通才可以一拍即合。皮紋是原廠設定，35%性格特質是先天，其餘65%靠後天成長環境配合，可以改變。」
2009年入行、現年32歲的陳嘉桓，當日有感出去social經常欠缺話題，於是走去學皮紋分析當興趣，怎料改寫人生，現在當上國際皮紋學總會副會長，與契媽兼恩師Janey並肩作戰，開班授徒。
幾年前學功夫 早知自己資質差
「10隻手指的皮紋加埋會有總分，平均140至180分，越高分代表學習能力越好。我得50分，哈哈！有5隻弧紋計唔到分數，唔開發是零，但開發後潛能就會無限大。有學生9個月就學識睇皮紋，而我就耐一點，用了五年，相比起其他人要花更大努力。
「我10幾年前學功夫，已知道自己資質差，當時去橫店開工，我要早一個月去，每日天未光就出發，跟龍虎武師練習到天黑，但師兄杜宇航開工前3日才到，每日練3個鐘就可以，那時候我便知道自己和世界武術冠軍的距離好遠。不過又不能說揀錯武打演員這條路，起碼我都學識了刻苦耐勞和認真。」
逢人「講手」 險拆散情侶
由對皮紋一無所知，到學滿師可以獨當一面，陳嘉桓當然下了不少苦功，逢人「講手」，連朋友見面，都要「出手」引誘她。
她笑說：「我有啲社恐，但有時想收集數據，都會幾大膽。試過有朋友問我出唔出去食飯？我怕悶，話唔去，佢就話：『有陶大宇和譚校長喎！』我因為好想睇佢哋嘅指紋，所以就答應咗出去，結果成功收集到，對照下，真係好似佢哋嘅性格。」
做皮紋師，除可增強自信和溝通能力，幫到人亦是一大樂趣。例如小朋友想報興趣班，可以根據皮紋報告去重點栽培，甚至可以再早一步，在媽媽懷孕時做好準備，將性格特質遺傳下去。
「睇皮紋，會知道人究竟對視覺、聽覺或觸覺比較敏感，我幫過很多圈內人找到讀劇本最快入腦的方法，要淨睇？讀出聲？創作故事方便記憶？抑或落手落腳排戲先得？人人唔同。有次搭電車碰見胡子彤，我就在短短的車程幫他睇皮紋，發現他原來一直用錯方法記劇本。」
閱「手」無數的她，遇過不少難忘的客人，更有次幾乎拆散了一對準新人，「有次一對情侶來睇皮紋，完事送他們離開後，聽見他們在電梯口吵架：『原來你咩都遷就我㗎！不如唔好結婚啦！』我即刻出去打圓場，解釋男方比較隨和，遷就人是他本身的性格。」
擇偶要睇手 揀另一半要求高咗
很多人都會有職業病，陳嘉桓亦然，見到新朋友，會第一時間估對方有哪一種皮紋。身邊的朋友會叫她幫眼睇男仔，也吸引很多男仔拜師，學來追女仔。
問她學識了皮紋後，對擇偶條件有否改變？她亳不猶豫地說：「絕對有！了解自己後，知道以前細個和男友的相處有乜問題，所以跟他和解了。我揀另一半的要求亦高咗，以前會問人星座，跟住彈走人，現在會用指紋做準則。
「對方必須要有好關愛的正箕紋，逆向思維的人未必啱我，我比較簡單，未必了解他們。我好驚太有主見的人，同埋最緊要識計數，因為我唔識，哈哈！皮紋以外，我比較鍾意養狗的人。」
生日願望係桃李滿門
本月8日，陳嘉桓剛度過32歲生日，生日願望是希望在皮紋學方面桃李滿門，令皮紋學普及化，以及老土也要說的身體健康。「我好好彩，大細佬組織了家庭，有個8個月的BB，我唔需要自己生，已經有得
玩，所以暫時沒有拍拖或者結婚生仔計劃。」
她坦言並不抗拒幕前工作，最緊要夾到時間，但如果要二擇其一，她說：「做皮紋分析師開心好多！命運是對手，皮紋改變了我的命運，令我很多事情變得正面，知道自己的強項和弱項，甚麼東西適合自己。」
聽見她的笑聲，便知道她揀對了路。
瀏覽《東周網》更多精彩內容，獲取更多娛樂資訊:
《東周網》訪談系列節目《星桄伴我心》11月重磅嘉賓：
黎諾懿夫婦互爆閨房樂事 慶結婚10周年
林保怡提名《金雞獎》影帝 送花冧李珊珊 激罕親揭秘密關係
周吉佩牀前唱歌送別：「爸爸聽到眼角滴淚，先至斷氣！」
