發佈時間：13:36 2024-11-12
2024年是藍奕邦出道廿周年，他笑稱：「我覺得藍奕邦喺呢行生存到廿年都係奇蹟嚟，同埋大家呢廿年都辛苦啦，所以我哋嚟好好慶祝仲健在，哈。」今日(11月12日) 隆重宣佈，藍奕邦出道20周年企劃 —— 明年一月將於西九文化區舉行一連三場「藍奕邦《要不要人見人愛》音樂會」；復刻2004年首張推出的個人專輯《不要人見人愛》製成黑膠碟，以答謝樂迷廿年來毫無餘地的支持。
延伸內容: 藍奕邦新作《男孩子！》開啟出道20周年序章 夥四小鮮肉拍MV奉旨風流
延伸內容: 唱作人吳林峰沒有壓力不成人 生活中搵挑戰
延伸內容: 耀眼星二代大檢閱｜甄子丹之女甄濟如 星味傳承 注目出擊
讓樂迷看到藍奕邦過往的二十年
藍奕邦明年一月舉行的廿周年個唱「藍奕邦《要不要人見人愛》音樂會」，率先預告於歌單上，他將會做香港歌手很少做的事：「我會喺其中一part，將成隻《不要人見人愛》順序由頭到尾玩一次，我一直好想做呢件事，平時真係冇咁嘅時間，當然都會網羅返我咁多年大家都好鍾意嘅歌。」他期待從《不要人見人愛》開始串連起來，讓樂迷看到藍奕邦過往的二十年，以及他未來的音樂旅程。
一直以來，鋼琴陪伴著藍奕邦走過唱作之路，是次廿周年音樂會設計概念亦以一人一琴作主軸，當中更突顯藍奕邦反傳統的個性：「因為一般人影演唱會key art都會影到好華麗，反而我想就咁。」貫徹他廿年前創作的詞「只得一對手掌 一邊唱一邊彈 平凡變得漂亮」，呈現最乾脆俐落的藍奕邦。
身在大染缸 仍然堅持做自己
回顧過去廿年，藍奕邦覺得自己沒甚麼大分別：「好慶幸，喺大家眼中嘅大染缸做嘢，我嘅價值觀、咩係啱咩係錯、我嘅品味，都幾堅持得到，呢個我係幾自豪嘅。」唯一不同之處，是他待人接物的態度：「我永遠都覺得，要識得同人溝通、相處，但係有啲位自己都要去堅持。細個係唔識攞個好嘅平衡，而家會識得搵個平衡點，有自己嘅堅持，同時都可以令人舒服。」
藍奕邦:仲有好多嘢未做
問他這刻的藍奕邦是否最自在？他坦言不知道，但認為自在的時間比不自在的多：「廿年前派第一首《熱帶魚》嗰陣，我有九成時間係唔自在，而家識得喺唔自在之中去適應，更加享受自在嘅時間。」藍奕邦直言未有感懷身世、曾經滄海，反而有種「仲有好多嘢未做」的感覺：「我都好開心㗎，我覺得仲有好多嘢未做、未試，希望嚟緊自己嘅健康、身體同精神所有嘢都繼續好，可以繼續做更多嘢畀大家。」
生存咗20年都係奇蹟 慶祝大家仲健在
提到最想邀請來睇騷的人，藍奕邦想也不想答道：「就係《三點冰室(七點交吉)》(復刻新歌) 其中一個填詞人—— 梁栢堅先生。我知道要做返呢首歌嗰陣，就好想同個填詞好鬼馬嘅人一齊創作，所以就搵咗佢。有日，我喺WhatsApp問佢點解要叫《三點冰室(七點交吉)》，佢話而家啲鋪頭，3點仲做緊生意，7點就可能執咗，一街吉鋪。就係一街吉鋪呢4個字，啱啱好放到落首歌度，咁（首歌）就功德圓滿啦，所以我好希望栢堅會嚟睇吓呢首歌。」
最後，藍奕邦亦邀請新舊樂迷明年入場睇騷：「我覺得藍奕邦喺呢行生存咗20年都係奇蹟嚟，同埋我覺得大家呢廿年都辛苦啦，所以希望大家一齊嚟慶祝，慶祝大家都仲健在。」音樂會當晚，要與歌迷毫無餘地飲住跳、哭住笑。
