發佈時間：16:41 2024-11-11
睽違11年，王菀之（Ivana）日前終宣佈明年2月22至23日在紅館舉行《合體–王菀之演唱會2025》，以紀念入行20年。她稱難得在紅館開騷，每一刻都想跟歌迷在一起，故考慮突破唔換衫；加上揀咗50幾首歌都想唱，當晚更打算由6點唱到11點。早前她更到香港某一角落拍攝宣傳海報，她笑言如果大家估到喺邊度影，就有禮物！
延伸內容：劉德華︱ 52場巡唱圓滿結束 劉德華台北站感動落淚 12月約定Fans紅館見
延伸內容：汪阿姐宣佈邀請Anson Lo做演唱會嘉賓 預告合唱經典歌
「合體」演唱會意義
這次名為《合體》，Ivana解釋：「呢個係入行20年嘅紀念騷，合體除咗係20年來喺創作路上嘅合體，亦係表演者同觀眾嘅合體。」這個世界孤獨一人是很難成就夢想，她續說：「諗呢個名嗰陣，我諗到好多合體，例如機械人合體、自我世界合體等；一個人嘅奮鬥路上，第一件事就係要同自己嘅內在小孩合體，再同身邊人合體，再同世界合體，由小嘅力量變成大嘅力量！」
Ivana表示這20年來，得到不少歌迷的支持，她笑言：「可以開一個演唱會，唱全部由自己作曲嘅歌，我覺得好幸福，亦全因有大家嘅支持。如果喺舞台上，表演者冇咗觀眾，都形成唔到一個成功嘅演出，所以今次邀請大家一齊入場，再一次同我合體，成就呢個紀念日！」
街頭影個唱海報
關於今次演唱會的海報，Ivana不再在影樓拍攝，並揀選了於香港區某角落，以非常純綷、直接和真實的背景，呈現出一個既開心又笑得燦爛的Ivana，她直言：「靈感係嚟自佢哋覺得我最近愛上攝影，仲要係鐘意咗影黑白相，所以想塑造出一個好簡單又直接兼冇任何花巧嘅我。20年嚟我喺觀眾面前，試過好多唔同造型、唔同角色，有唱歌嘅我，拍電影嘅我，舞台劇嘅我，或者卡通配音嘅我；全部合體其實都係一個簡簡單單、同大家一樣生活喺同一個城市入面嘅王菀之，同各Dreamer一齊努力奮鬥。𠵱家有咁多朋友仔鐘意打卡，我哋諗緊係咪玩個合體遊戲？就係如果你搵到我喺邊度影呢張海報，影番同一個位，放上IG度Tag番我，我或者會送份禮物畀你，哈哈！」
今次個唱多突破
提到今次的演唱會， Ivana續稱將會有很多的突破：「通常演唱會都會準備最少6至8套衫，但我好想專注送好多歌同大家分享，所以喺咁珍貴嘅兩個幾鐘，終於可以喺紅館同大家見面，我唔想有一刻唔係同大家一齊，所以今次想突破唔換衫；如果喺演唱會之前，畀大家見晒啲衫好唔好？入場之後就『合體』。不如等歌迷揀喇，寧願我唱多幾首歌定係想我去換衫？哈哈！」
想6點唱到11點
而當務之急，Ivana謂第一件事是與團隊商討唱咩歌，她坦言：「原來我不經不覺創作咗200幾首歌；而好多歌我都唔想放棄、好想唱，所以開咗10次會議都未揀到歌，𠵱家一共有50幾首都係大家唔想放棄嘅，音樂總監就反問：『咁係咪要提早喺6點就要開場呢？哈哈！』」門票優先訂購將於11月20日展開，公開發售日期為12月2日，歌迷要密切留意啦！
