發佈時間：15:23 2024-11-11
許靖韻（Angela）於今年4月在內地舉行巡迴演唱會，首場的廣州站，Angela已經爆喊，估不到日前在東莞的尾站，她又再爆喊，認真是「由頭喊到尾」。Angela解釋因今場與觀眾距離好Close，所以當大合唱時，聽得好清楚，歌咪又唱得大聲，真的很感動！在開Show前，歌迷在場外還設立應援物交換點，又推介Angela要品嘗當地有名的燒鵝瀨，令她感覺好Sweet！
延伸內容：許靖韻客串做店長 遇豪氣fans：「你簽幾多，我買幾多！」
延伸內容：劉德華︱ 52場巡唱圓滿結束 劉德華台北站感動落淚 12月約定Fans紅館見
延伸內容：杜德偉巡唱fans冒雨捧場 孖蘇有朋《脫掉》成網站搜話題
3感動位淚如雨下
Angela表示這次與觀眾距離十分接近，所以特別感動，她說：「近到坐第一行嘅觀眾講嘢都聽到，好難得個舞台可以同佢哋咁近距離，大家感覺好Close，佢哋每一個樣我都睇得好清楚。」亦因為這樣，當全場大合唱時，Angela感動得淚如雨下，她續說：「第一個感動位係唱《別為我好》，因為今次我除低咗一邊耳機，聽到佢哋唱歌唱得好清楚，《別為我好》同《謝謝對不起》佢哋一齊大合唱，同埋我冇諗過《情歌之後》都會全場大合唱，嗰個大聲程度仲大過《別為我好》，所以真係忍唔住喊咗出嚟！」
準備應援物打卡點
Angela坦言沒想過尾場會喊，由於這是今年的最後一場，所以特別穿上紅色衫，希望以開心的心情作一個總結，她又感謝歌迷說：「多謝茶茶們（歌迷名稱）每一站為我準備唔同嘅應援物同打卡點，仲會喺開Show前喺場館外設立應援物交換點，好Sweet！」雖然完成尾站，但Angela已急不及待透露明年的計劃，她笑言：「雖然呢一刻同茶茶們暫別音樂會舞台，但2025年會再開，希望快啲可以公佈日子；嚟緊都有好多唔同嘅舞台演出機會，到時會同大家再見。」
全體食東莞燒鵝瀨
除此之外，在巡演未開始前，因大量歌迷留言給Angela稱要一嘗東莞的燒鵝瀨，所以在開show前，Angela特別搵同事「撲」了一碗給她，她解釋：「因為一完Show就要即刻走，所以開Show前一定要食咗先，而且全體同事都一齊食，大家都覺得超好味，我都係第一次食東莞燒鵝瀨，真係覺得好好食，特別係嗰個粉係好唔同。」
